استفسار عن سوق الجملة بالدمام

سما قطر · 01 / 10 / 2009, 20 : 06 PM

مساء الخير

ممكن اسأل عن سوق الجمله بالدمام وين يكون بالضبط ؟؟

وبالاخص محل ( الافكار الذهبية )؟؟

وين مكان يبيع صواني اللي حق التقديم وتكون مزينه ومعدلة .

وابي اعرف وين اماكن يبعون فيها شغلات للتغليف والهدايا مثل الورد والشرايط ابي محل يكون عنده سوالف

كثيرة وخرز وحركات التغليف بالدمام ويبيع بالجمله .

وين اماكن يبيعون سوالف وحركات رومانسيه مالت الحريم اللي في النت طاييحن فيها ؟؟

ولكم مني كل الود والاحترام

أبوعبدالعزيز · 01 / 10 / 2009, 04 : 07 PM

محل الافكار الذهبية

تجون من شارع الملك سعود تاخذون يسار مع شار الامير نايف (42سابقا) يصير رامز على يمينكم تطولون وما تطلعون الكبري تدخلون من تحته وترجعون يجي على يمينكم محل الدنيا الصغيرة(عنده اغراض الحفلات) بعده محل خطوة بخطوة اول شارع بعده تدخلون يمين المحل يجي على يساركم ولوحة المحل كبيرة وواضحة .

اما سوق الجملة

اسهل طريق له تجون من دوار الصدفة بالكورنيش بعدين بيجي المارينا مول على اليمين تاخذون من عنده يمين ولازم تنتبهون لان الشارع مو واضح ولاصق بالمجمع بعدين تطولون اول اشارة تعدونها ثاني اشارة تاخذون يمين اول شارع يسار تخشون معه تجي على يمينكم مواقف بفلوس وقفوا السيارة فيها اضمن عن المخالفات المرورية والسوق عندكم جملة العطور - والالعاب وقرطاسيات ومحلات اكسسوارات ومحلات التغليف

سما قطر · 01 / 10 / 2009, 55 : 07 PM

مشكور اخوي ابو عبدالعزيز كفييت وفييت

جزاك الله كل خير اخوي

أبوعبدالعزيز · 01 / 10 / 2009, 10 : 08 PM

العفو بارك الله فيك

سما قطر · 24 / 10 / 2009, 58 : 11 PM

كلمة شكر بحق اخوي أبو عبدالعزيز

الصراحة ما شاء الله عليك وعيني عليك بارده

اخيرا رحت محل الافكار الذهبية

اخذت الوصف .. وخزنتة بجوالي .. وانا ماشيه بالطريق واشرح حق اخوي الطريق

وماشاء الله وصلنا على طول وفعلا كان الوصف دقيق وسهل وبسيط ومبين

الله يبارك لك اخوي ابو عبدالعزيز وجزاك ربي كل خير

اما بالنسبة لسوق الجمله رحت وما رحت مدري

مو من الوصف والله .. لا بالعكس من اللي معاي وما يسمع الكلام

سكنا بشقق اللؤلؤة خلف المارينا مول .. هادية ونظيفة وسعرها اوكي

بس للأسف مافي معاي كميرة عشان اصور المرة الجايه بأذن الله

بس .. اللي عرفته من عامل بالمحل ان لهم فرع ثاني قديم واكبر

طبعا هو وصف لي بس انا ما قبضت شي من اللي قاله لي

المرة الجاية الرحلة بتكون استكشافيه والبحث عن محل الافكار الذهبية القديم

ومرة ثانيه ابو عبدالعزيز .. مشكور اخوي .. وجعلة في ميزان حسناتك يارب

ناصر كويتي · 25 / 10 / 2009, 11 : 12 AM

الحمدلله على السلامه وثاني مره اخذي معاج الكاميرا علشان نشوف السوق والمحل

جذآآآب القلوووب · 20 / 05 / 2010, 17 : 05 AM

الافكار الدهبيه كم فرع له بالدمام