الموضوع: تقرير سياحي: رحلتــي الى جزيرة كيـش
عرض مشاركة واحدة
22 / 06 / 2011, 06 : 10 AM
رقم المشاركة :  1 
][::.. درجة أولى ..::][



الملف الشخصي
تاريخ التسجيل : 15 / 06 / 2011
رقم العضوية : 28263
الإقامة : uae
المشاركات : 848
التقارير : 4
الجنس : أنثى
الحالة : nooni غير متواجد حالياً
إبتسامة رحلتــي الى جزيرة كيـش









السلام عليكم ورحمة الله وبركاته
حبيت ان اشارك اعضــاء منتدى زاد المســافر هذه الرحلــة الممتعة
وموافاتهم بتفاصيل دقيقة ومعلومات شيقة عن هذه الجزيرة التي قل ما يعرف عنها الكثيرون
وهو اول موضوع اقدمه لكم .. واتمنى ان ينال استحسانكم ..
جزيرة كيش الأيــرانيــة
* تعرفت اليها بعد ما وصلتني بعض الصور عن طريق الايميل ..واعجبت بها .. قررت البحث عنها
وفعلا سويت بحث وطلعت كل بياناتها ( من الانترنت ) طبعا .. :3:
وقررت الذهاب لهــا دون تردد ..
_________________
الرحله متكونه من : شخصين بالغين
انا وزوجي ..
قيمة التذكره : 450 درهم اماراتي (رخيصه )
الاقامه لمدة : 4 ليالي (5 ايام )
التكلفة : 1200 درهم
الاقــلاع من مطــار : دبي
كانت بتاريخ : بداية ابريل (4) 2009
الجو ( صحو , غائم , زخات خفيفة متفاوته فالليل - الى غزيرة فالساعات المتأخره من الليل -بعد الواحده )
التومان والدولار والدرهم الاماراتي وهو الافضل بالنسبة لهم ..
الطائـرة :تابعة لشركة كيش للطيران (( بخبركم بعدين ليش امعصبه ) هههههه
حجز الفنادق : قمت بالحجز مسبقاً عن طريق الانترنت .. بدون دفع اي رسوم .. فقط قمت بتسجيل بياناتي .. بحثت مطولا عن الموقع الذي قمت بالحجز من خلاله وهو موقع تابع لكيش
ولكن لم اجده للاسف :4:
_____________________
ندخل فالتفاصيل ..
خارطة جزيرة كيش .. ووالمسافه بينها وبين دبــي

توجهنا لمطار دبي ..
وانتظرنا حتى موعد اقلاع الطائره
وعند المناداه توجهنا للبوابه التي تقلنا للطائرة
طبعا انصدمت .. معقولة نركب هالطيارة
المهم اتوكلنا على الله .. وركبنا الطيارة .. كانت صغيره الحجم .. وقليلة العدد من حيث المقاعد ..
غير مريحة ..
كانت ترافقنا بعض الجنسيات الاسيوية .. ومواطن واحد .. وعرفنا منه انه بينزل فالجزيرة وبعدها
اصدقاءه من داخل ايران بييون وبيشلونه من الجزيرة ..
اول ما شغل الكــابتن الطيارة خفت .. كان الصوت فظيع .. وهو صوت المراوح
يعني بنطير فالجو بطيارة تشتغل على المراوح .. ( يا الهــي )
الرحــله تستغرق 45 دقيقة
طبعا ضيفونا الجماعه ماقصروا
افتتحوها .. بحلاوة
وبعدين يابولنا كيك . عصير . لب .
المطبات الهوائية فالجو ( حدث ولا حرج ) فلم رعب بمعنى الكلمــة .. لدرجة اني قلت
بحرم اركب هالطيارة مره ثانيه
نسيت اخبركم .. الطياره فيها مضيفة وحده لاغير .. وتيلس فأخر الكرسي .. وماتحب تخدم ابد
حتى الابتسامة ماتشوفها
وصلنا بحمدالله للجزيرة .. ومن الطائرة للمطار مسافة قصيره مشي عالاقدام ..
ودار من بينا هذا الحــــوار على الكاونتر :
الموظفه : باستغراب بعد ما شافت جوازاتنا (( ليش يايين الجزيرة )) ؟؟!!!! وعلى راسها
الف علامة استفهام ..
قلنالها ::: سيــاحة
طالعتنا باستغراب وضحكت .. ماتبغي اتصدق ..
قالت . . اتخلون دبي واتون جزيرتنا سياحه !!!؟؟؟؟
قلنالها هيه :a575f059f95cc9160e9
وفعلا ماكانت مقتنعه .. هههههههههه .. المهم ختمت لنا
وكملنا الدرب عسب ناخذ الشنط
وبأتجاه البوابة
حصلنا سايق شايل لوحة مكتوب عليها
مريـــم هوتيـل
وهذي خدمة اتقدمها الفندق مجانا ..
____________
سبب اختياري لهذا الفندق ؟؟
الموقع بالتأكيد :: حيث يمكنك ان تجد كل ماتبحث عنه من محلات تجارية , مطاعم
اماكن ترفيهيه .. فنادق , وكلها قريبه من الفندق
لن تحتاج للمواصلات لكي تقلك الى هذه الاماكن
يمكنك الوصول اليها مشيا ً
وهذا الممتع
حتى الشاطئ قريب من الفندق ويمكنك الوصول اليه مشيا ً .. لن تأخذ اكثر من 7 دقائق للوصول اليه
__________
طولنا عليكم .. ولكن حبيت اني اعطيكم فكرة كافيه عن الجزيرة للي حاب يزورها مستقبلاً
__________
صورة الفندق .. تصميم رائع .. فعندما تدخل للفندق .. كأنك تتواجد في احد القصور التي تأخذ
الطابع القديم .. قمة فالروعه


وهذه الغرفة .. (( تنويه == غرف الفنادق الموجوده بكيش بشكل عام تأخذ نفس الطابع (( البساطة= يعني الفندق يكون فخم من الخارج ((اتقول هذا هو )).. لكن الغرف عادية جدا ً
وكأنك يالس فشقة مفروشة .. هههههههه
الغرفه فيها تلفزيون .. ودش للقنوات اللي هم مختارينها ..

الخدمات اللي اتقدمها الفندق متعدده ..
الانترنت : فري .. وتشبك ونته فغرفتك
فيها مطعم : بداخل الفندق .. اكله راقي جدا ولذيذ
يعطونك : تذاكر لدخول صالة الالعـاب الخاصة بالفندق .. ك تخفيض للسعر .. وك لعب مجاني لاول لعبتين
والصاله منفصلة عن الفندق .. وتروحلها مشي .. بضع خطوات من الفندق
طلعنا نتمشى حوالين الفندق .. وكانها مقابلها حديقة عامــة بدون اسوار ..

قررنا نتجه لصالة الالعاب ..
الصالة فيها قاعتين كبار ..
الدور الاول : قاعة بولينق .
الدور الثاني : قاعة بليارد

صالة البولينق

اللعب فيها كان ممتع .. وكان المكان هادي ..ونادر ماتحصل حد يلعب ..
__________________
طبعا عند عودتنا للفندق .. بلغونا ان اليوم الثاني .. راح يوصل باص الفندق عشان
يودينا رحلة حول الجزيرة والتعرف على معالمها
وطبعا هذي الخدمة بعد فري من الفندق .. ياسلام
فاليوم الثاني اتغدينا فمطعم الفندق (( خفنا اتفوتنا الرحله )) هههههههه
والأكل : لايعلى عليه

انتظرنا الباص .. ولما وصل ..

مافي احلى من هالباص (( دورين))
وكانوا معانا سواح من الجنسية الايرانية
تنويه : اغلبية سواح الجزيرة هم ايرانيين _ من داخل ايران _ :182fd25f9b06446ba41
السايق شغل لنا اغاني ايرانية .. مافهمنا شو السالفه .. بس كانت ربشة
والايرانين طول الوقت ههههههههه
فالبدايــة اخذنا على منطقة اثــرية :
هذي بوابة لدخول المنطقة الاثريه :

اتجولنا فالمكان



شجرة معمره منذ القدم

وفالطريج .. مرينا على مسجد .. لكنه اثري .. ومقفل .. طبعا السايق مانزلنا عسب انشوفه
وماعرف السبب بالضبط .. لكن خذتله صوره من الباص


______
بعدها انطلقنا لجولة ثانية
وكنا متجهين لمنطقة اثرية كانت غارقة تحت البحر .. اروع مازرت
عند الوصول : صعدنا لمسافة مرتفعه مشياً على الاقدام



من الداخل .. يوجد مطعم ولكن ليس للاكل فيه .. خخخخخخخ ..


مقتنيات اثريــة .. قديمة العهد ..





لو تلاحظون المدرج .. حيث يمكنكم التجول داخل المنطقة الاثرية بأكملها

____________
بعدها توجهنا لرؤية سفينة اثرية قابعــة فالبحر .. ولو اتلاحظون فهي حليانة بالكامل .. لكنها صامده


حبينا نسترخي .. شويه .. لان الرحلة طويله ومتعبه لكثرة المشي والتجول ..
وكان عالبحر دكان صغير يبيع العصاير وبعض الاكلات الخفيفة ..
عاد نحن كلنا (( باجيلا ))ههههههههه .. كانت لذيذه .. وشربنا جاهي . . :4f7c50bc2e7eee3c450
وطبعا بعد معاناه فهم راعي الدكان شو نبغي بالضبط .. لان الكل كان ياخذ من عنده هالصنف بالتحديد
واشرنا على واحد كان يستمتع بأكل الباجيلا ,, ومشت الامور ..هههههههه

وبعد الاستراحــة .. رجعنا للفندق ..
_________
طلعنا نتمشى بالليل .. ومرينا على مركز تجاري صغير وكان قريب م الفندق
اتجولنا فيه .. واشترينا بعض الاشياء من عندهم
اما العشا كان فمطعم قريب من فندقنا .. وكان الاكل لذيذ ..
_________
عند العوده سألنا الفندق عن الرحلات السياحية غير اللي رحنالها .. فقالو لنا
في رحلة للحديقة .. وهي حديقة حيوانات .. ويسوون فيها عروض للدلافين ..
طبعا عطونا التذاكر .. على اساس انروح لها اليوم الثاني ..
وفعلا رحنا عن طريق التاكسي اللي وفره لنا الفندق .. وبشكل عام .. التكاسي تلقاها فكل مكان تمشي فيه .. وقلنا يوصلنا للحديقة .. طبعا عطيناه التذاكر وهو فهم
وطبعا لما وصلنا .. كانت الحديقة مزدحمه .. وهي لها وقت معين للدخول .. من الساعه
4 والنصف .. والى وقت انتهاء العرض .. عند السابعه
وقفنا بالدور عشان نعطيهم التذاكر وندش الحديقه
لما ندخل .. فيه مرشد ياخذنا كمجموعه .. عشان انشوف الحيوانات الموجوده فالحديقه
طبعا الحديقه كبيره وايد .. والمشي فيها متعب .. لكن يروح التعب لما اتشوف الحيوانات
المتنوعه والغريبه .. وفيها قطار للي مايحب يمشي ..خخخخخ



هالطير حبيته وايد .. بس ماعرف شو اسمه

واعذروني على قلة الصور بالنسبة للحديقــة .. لان اغلبية الصور محتاجه الى تعديل بالفوتو
لوجودنا بالصور .. وراح ياخذ من وقتي الكثير ..
_____________________
بالنسبة لعروض الدلافين :
قمت بتصويرها بالفيديو .. ويصعب علي رفعها ..
لا مانع لدي بأرسالها لمن اراد مشاهدتها
وهي عروض ممتعه للغايه .. وعلى فكره ..اول مره احضر عرض للدلافين .. واستمتعت ..
فالبدايه العرض كان مع الفقمة .. ومن بعدها الدلافين ..
وكانت تلعب بكره السله .. وتطلع فوق سطح الماي بصورة خياليه ومرتفعه ..
وتلبي طلبات مدربيها ..
وفالنهايه الدولفين قام برسم لوحة قمة فالروعه بريشه الالوان المائية
كنت اتمنى الحصول على اللوحه ولكن لم يحالفني الحظ
______________
بعد انتهاء العرض قمنا بالعوده الى الفندق واخذ قسط من الراحه
بعدها توجهنا للمركز التجاري الضخم (()) مشيا على الاقدام ..
وهو يعتبر اكبر مركز تجاري .. يعني اكبر من دبي مول ومن ابن بطوطه


فيه محلات تجاريه راقيه .. وضاعه ممتازة .. واغلبها ماركات بنفس الاسم لكن الكتابه بالعربي:a575f059f95cc9160e9

وفيه اكثر من كوفي شوب
وقررنا نتعشى فهالكوفي شوب .. وكان راقي .. واتعرفنا على صاحبه .. وهو بريطاني ..
وكان الاكل لذيذ .. وخصوصا البرغر .. طريقته عجيبه .. وله طعم مميز ..


____________________
البحر .. طبعا هالمكان زرناه 3 مرات ..
لروعته .. وهدوءه .. ولطبيعته .. وشاطئه النظيف .. وترتيب المكان رائع . وبه ممشى
و سياكل ( دراجه هوائية)
ونحن نتمشى عالبحر مرينا على دكان صغير .. يبيع المشروبات والاكلات الخفيفه ..
وكان شخص واقف .. ويتريا طلبه .. عاد لما نحن رمسنا الريال عسب ناخذلنا جاهي ..
مافهم علينا ..الريال اللي واقف فهم علينا ..ههههههههه
وهو فهمه .. طلع يرمس عربي .. بس يتكلم بلهجة شويه غريبه لكن مفهومه ماعدا بعض المصطلحات
وقال ان اسمه شجاع .. ومن اصفهان .. وياي كيش سياحه ..
المهم كان طيب وكريم .. وماخلانا ندفع .. على اساس هو عازمنا
المهم .. الشاطئ فيها نشاطات ثانيه .. والاغلبيه يلعبون كره طايرة ..
والمكان امان .. وفيه
وهذا الممشى .. تمشى ومن تحتك البحر ..


______________
بعد انتهاء رحلتنا .. قام الفندق بنقلنا للمطار ..
ولكن المعامله فالمطار .. ترفع الضغط .. تفتيش بدائي ..
وحتى الشنط.. اتقول سارقين شي ..
فيوم العوده .. الجو كان ماطر .. اما فالامارات فكان غائم مع رياح متوسطه
فتأزمنا فرحله العوده .. وفلم رعب ثاني فالطائرة ..
.. والحمدلله وصلنا البلاد سالمين ..
وكل مره افكر اروح لهالجزيرة اغير رايي بسبة الطياره ..
____________________
انتهى تقريري .. اتمنى ينال اعجابكم ..
____________________
نظرة سريعه عن الجزيرة :
الطائرة : متعبه ومخيفه
الجزيره : سياحيه .. سكانها بسطاء .. راققين فالتعامل .. مسالمين
الهدوء يعم الجزيره بشكل عام ..
امنه :: لا داعي للخوف .. عند المشي .. والتجوال .. فشوارعها لا تخلو من دوريات الشرطة
الجزيره نظيفه .. وتتطور بشكل سريع .. خدمات ممتازة ..
اللغه : هو العائق الوحيد .. حيث قل ماتجد شخص قد يتحدث الانجليزيه
الصلاة : توجد اشاره (( سهم )) بداخل درج الغرفه .. لاتجاه القبله .. وتوجد سجاده صلاه
ولكن يفضل احضار سجاده الصلاه الخاصه بك .. :6f6754d5085b1c123a5ههههههه
الأكــل : الذ اكل كلته فحياتي .. مستحيل تاكله فأي مطعم فبلادنا ..
وهذا اللي احن له .. هههههههههه
_____________
انتظروني قريبا .. تقرير مفصل عن جزيرة موريشيوس == وتقرير عن ماليـــزيا .. :GIF_59:
تقريري عن جزيرة موريشيوس الساحرة

تقريري عن جزيرة كيش

.. النمسـا 10/10/2011
ستـاد الليانـز ارينا - بايرن منشـن الالمـاني