يسعد مساكم جميعا
رحلتنا باذن الله في 28 يوليو الى 18اغسطس يعني 22يوم 21 ليلة
وصولنا ورجعتنا ميونيخ وهي بس لمجرد وصولنا لها بنطلع منها لفيينا يومين ومن فيينا لزيلامسي
7 ايام ونبي نغطي القرى اللي حولها والفعاليات ونزور سالزبورغ وكابرون والشلالات وكذا
وبعدها نطلع لانسبروك يوم ومن انسبروك لفرايبورغ كمان 5ايام بنزور فيها اهم القرى اللي حولها والشلالات وبعدها لديزني لاند 4 ايام نطلع منها على باريس يوم نزورها زنرجع
ونرجع بادن بادن يوم وليله نريح فيها ونرجع ميونيخ يومين
كل تنقلاتنا بالسيارة ان شاءالله
اسئلتيكيف المسافات لمخططنا هل هي معقولة ؟وبرضو الطرق هل امنه ومريحة او وعرة وصعبة؟
-بخصوص الاستيكرات تبع المدن في كل مرة ندخل مدينة نشتري الاستكر هل هو يغني عن دفع رسوم الطريق اللي بتواجهنا؟؟هذا اهم سؤال ابي اجابة شافية عشان ارتاح لاني شايلة هم الرسوم كثيرة
-ايش هي اقرب المدن السويسرية لفرايبورغ من واقع تجربتكم وزياراتكم انا نفسي ازور انترلاكن منها وجنيف زيارة طريق يعني مرور الكرام بس اشوفها مو شرط نغطي الاماكن فيهم اللي ودي فيه ازور مصنع الشوكولاته نستله والجبن هل هو ممكن في مخططي هذا
-مخطط الرحلة باذن الله انو يكون بالشكل الاتي نصحى بدري نفطر وننطلق للمشاوير البعيدة وعلى المساء نرجع نرتاح ونغطي الاشياء القريبة اللي حولنا السنتر وكذا
الله يسعدكم الله يسعدكم الله يسعدكم هذي اول رحلة عائلية لي وابيها مميزة باذن الله وابي مساعدتكم في الرد على اسئلتي علشان اعتمد واحجز ولان المسافات هي اللي اكثر شي شايله همها
وجزاكم الله كل الخير

للرفع والاجابة الله يسعدكم لمن لديه معلومة

اول شي .. الله يهنّيكم وجعلها سفره سعيده...

بالنسبه للمدن انا ماسكنت فيها كثير لأني ما احب زحمتها...
سكنت في ميونيخ لمدة ليلتين.. وجدتها مدينه جميلة افضلها اكثر من فرانكفورت.. ليلتين معقوله...
استمتعت حقيقة في الحديقه الاولمبيه... كإستراحه...
وحديقة الحيوانات جدا مرتبه ومنظمه وحلوه الى ابعد حد...

بالنسبه لزيلامسي.. فانا انصح بما انه عندكم سياره انكم تسكنون في كابرون.. اجدها أشرح وأرتب من زيلامسي.. والفرق بينهم دقايق بس بالسياره... ومنها تقدرون تروحون الى شلالات الكريمل.. والى مناطق اخرى..

انسبروك يكفيها ليله او تقدرون تخلونها محطة استراحه...

من فرايبورغ .. لازم تروحون لشلالات الراين ...رووووووعه ومتعه... ومنهاتمرون على كوستانس .. فيها عالم البحار ومجمع قدّامه...

بالنسبه لفرنسا.. مارحتها ...

بالنسبه للطرق... نعم امنه وتسوق وانت مرتاح.. لأن كلهم يتبعون النظام... والسفر متعه بالسياره... مناظر طبيعيه تشرح النفس.. ونظافه والاهتمام بمحطات الوقود شي على مستوى عالي... ولا يفوتكم الكروسون اللي فيها.. ادمااااااااااااااان..

المسافه اللي طويله راح تكون من بادن بادن الى ميونيخ... لكن تقدرون تريحون في كذا قريه راح تواجهكم... سواء على بحيره او في كوفي او مطعم... الواحد وانا اخوك يستمتع هناك...

الاستيكرات تلقونها في محطات الوقود.. سواء للنمسا او سويسرا...

فرنسا على ما ذكرولي الاخوان.. انها رسوم على الطرق... بوابه وتدفع وتمشي...

الصح زي ماذكرتي انتي .. انكم تقومون بدري وتفطرون وتسعون في ارض الله...

جدولة الاماكن اللي بتزورونها بشكل يومي من الاشياء المهمه.. بيوفر عليكم جهد ووقت ولا يرهق الميزانيه...
بالنسبه للسوبرماركت.. يسكرون هناك تقريبا الساعه 5 او 6 .. فاعملوا حسابكم انكم تتقضون من بدري.. والمغرب اذا ماكنت غلطان الساعه 9 تقريبا...

تقدرين تطلعين على تقارير الاخوان.. ندعيلهم بظهر الغيب هم وادارة المنتدى على المجهود ( المفيد ) اللي يقومون فيه..

أي استفسارات انا حاضر...

الله يسعدك اخوي خلف الستار
وجميع القائمين على هالمنتدى وووربي كلمات الشكر ماتوفيهم على حجم المعلومات اللي تطرح ويتم تبادلها .. مثرية بحق
بس ابي اتأكد هل هي الاستيكرات للسائح تغني عن دفع الرسوم في انظمة طرق المدن الثلاث اولا
مع خاااااااالص شكري على الافادة وجزاكم الله كل الخير

اذا ماكان فيه بوابات رسوم للطريق فهي تغني...

على سبيل المثال...

استأجرت سياره من المانيا... لما ابي اتوجه لسويسرا او النمسا..
في محطات البنزين تلقون استكرات على حسب المده اللي بتقعدونها... تشترون استكر وتلزقونه على القزازه اللي قدام في زاوية السائق ..

لكن اذا بتروحون كم ساعه وراجعين.. ما اظن يحتاج...

لأني لما جيت ابشتري استيكر لسويسرا عشان شلالات الراين اسئلتني اللي في المحطه عن مدة مكوثي في سويسرا فقلت زيارة الشلالات كم ساعه وراجع .. فقالت مايحتاج ..