مقدمه 
لما قررت أسافر الشيك بحثت وايد عن معلومات عنها
ولكن للاسف مالقيت عنها وايد تقارير واللي لقيته كان قديم من سنوات
ففكرت أنزللكم هذا التقرير عشان تستفيدون منه في حالة قررتوا تسافرون لها
وتعرفون الكثير من التفاصيل اللي ان شاءالله بتنفعكم
الهدف من الرحله سمعت عن الشيك وايد ومن زمان كان خاطري أجرب منتجعاتها
وفكرت أجرب عندهم برنامج التخسيس ( تنزيل الوزن )
عن تقولون عني دبه تراني مب دبه بس أحتاج أنزل وزني شويه 
اجراءات الحجز في البدايه عطينا شركه سياحه في الشارجه تخلصنا اجراءات الفيزا ولكن وايد بهدلونا وتأخروا علينا شهرين وكنا بنكسل السفره 
وعقب قلتلهم ما ابا عن طريقكم الفيزا وخلاص نحن كنسلنا سفرتنا
وعقب اتصلنا ع السفاره الشيكيه في الامارات وسألناهم عن الفيزا
وخبرونا انه في شركه للسياحه في دبي أسمها سينمار هم وكيلهم
مرينا عليه وكان الموظف من الشيك قال بعطيكم الموعد حق البصمه وخلال أيام بتجهز الفيزا
ماصدقت اللي سمعته 
الله يغربله هاك الهندي كيف غربلنا وأخرنا وآخر شي يقولنا اذا تبون فلوسكم كلموا المدير 
أما هذا المكتب قاللي الشيكي :
اذا تحبون بحجزلكم بكج للرحله
قلته عطني عرضك
وخبرته عن التفاصيل اللي اباها
طلبت نسكن في منتجع ثيرمال وناخذ منهم البكج الخاص بنظام التخسيس مدة اسبوعين
وطلبت تكون الغرفه عندهم سويت وفي الادوار المجدده
بالاضافه للسكن في فندق 5 نجوم من فنادق براغ في آخر يوم
وتوفير سياره توصلنا من منتجعنا الثيرمال في آخر يوم الى براغ
ويكون العرض شامل التذاكر
بعد ماعطاني العرض غيرت رآيي
شفت انه التذكره عن طريق النت أرخص بـ 100 درهم ، فحجزت بروحي تذاكرنا
والتوصيل حسيته غالي عطاني ياه ب 550 درهم
وقلت مابستعيل ولما أكون هناك بسأل عن سعر التوصيل
والفندق اللي في براغ عطاني عرض لفندق 5 ستار بس حسيته بعيد شوي عن الداون تاون
وأخويه كان مادحلي الانتر في براغ ولكن طلع في بوكينج فل
وهو حصل عندهم بس سويت ووايد غالي
بس أنا تميت الاحق بوكينج كل يوم وأشوف اذا حد كنسل لين حصلت حجز فيه
وحجزت غرفه غرفه جونيور بـ 1700 درهم
نرجع للشركه
قررت أحجز عن طريقه بس بكج المنتجع الصحي رغم انه عطاني أغلى من النت
لأنه من خلال بحثي وجدت موقع عن طريق النت نقدر نحجز مباشره منهم
وهذا هو الموقع ...
بس ليش أنا حجزت عن طريقه ؟
الصراحه بغيت أفيده من فرحتي انه سفرتي ماانلغت وانه بحصل الفيزا فقلت عن خاطري باخذ لو شي واحد من عنده
الشخص = 17 الف درهم تقريبا
شامل السكن + الوجبات الثلاث + برنامج لنظام التخسيس لمدة اسبوعين
من غير الضريبه اللي خذوها مني لما سويت الشيك أوت
بعدين أكتشفت لما سرت هناك انه طلع علينا وايد غالي ، والصراحه مستوى الفندق مايستاهل السعر اللي دفعته
بالنسبه لفيزا أعتقد دفعنا 400 + 150 تأمين صحي ( ع ما أذكر )
تاريخ رحلتنا من 21/ 5 / 2014
لين 5/ 6 / 2014
الفنادق اللي سكناها في كارلوفالي
منتجع ثيرمال
موقعهم ع النت
من 21/ 5 / 2014
الى 4/ 6 / 2014
اسبوعين
وفي براغ
فندق الانتر كونتتتنيتال
وهذا موقعهم
من 4/ 6 / 2014
الى 5 / 6 / 2014
يوم واحد
وقت الرحله طيران الامارات توفر رحله وحده يوميا
رحلة الذهاب تكون في الصباح 9 الا5 دقايق بتوقيت الامارات
والعوده العصر الساعه 3,45 دقيقه بتوقيت براغ
ليش أخترت منتجع ثيرمال بالذات
من خلال بحثي الكبير استقريت ع منتجع ثيرمال بالتحديد للاسباب هاي :
انه جدا قديم وخبرته كبيره خصوصا في برامج التخسيس
انه اكثر العرب يزورونه وبالتالي فهو يوفر للعرب احتياجاتهم وبالتحديد حق الحريم
لأنه فيه خصوصيه لنا يمكن مانحصلها في منتجعات ثانيه
واقصد بالخصوصيه هي وقت الجلسات
تعلموا اخواننا الشيكين انه الحريم منفصلين عن الرياييل
وعشان جذي كل البرامج المخصصه لنا تكون مفصوله عن الراييل
بالاضافه انه كل اللي يقومون ع تنفيذ هاي الجلسات هم اناث وهاي أكثر نقطه ريحتني وشجعتني أختاره
بالاضافه انه وايد أشياء مكتوبه بالعربي
وموفرين مترجمين للي يحتاج
والأكل بعد مراعينا بأنهم يحطون لافتات ع الاكل اللي في خنزيرومكونات الاطباق اللي يقدمونها
تدرون يوم جربت هالفندق وشفت الخدمات حسيت كأني في بانكوك
وخصوصا مستشفيات بانكوك اللي فيها كل شي موفر للخليجين
ووايد موظفين منهم تعلموا وايد كلمات عربيه ، ساعات نضحك لما ينقون بعض الكلمات وقمت انا بعد أعلمهم بعض الكلمات 
الصراحه وايد انبسطنا فيه
ولكن عندي ملاحظات عليه بقولها في آخر التقرير
المواصلات من المطار لين منتجعنا في كارلو فاري كانت السياره من طياران الامارات عشان نحن ع البزنس
ولكن السائق خذا عني 120 يورو وقال أكثر من 50 كيلو ينحسب عليكم
ونحن منطقتنا خارج براغ
طبعا دفعت المبلغ ولكن وايد تضايقت لأنه محد بلغني قبل
ولو كنت أعرف كنت شفت الفرق بينهم وبين أي سياره لو حجزتها بروحي
عموما أنا ماسكت وقدمت شكوى لطيران الامارات عن هذا الموضوع وكان ردهم انه المبلغ صحيح 
رغم اني أجرت سياره من منتجعنا لين براغ في آخر يوم ب 100 يورو يعني أرخص عنهم
أما من فندقنا الانتر اللي في براغ لين المطار
كان التوصيل عن طريق طيران الامارات بس هاي المره ماخذوا عنا اي مبلغ لأنه نحن داخل براغ
مطار الشيك الاجراءات سهله وسريعه ومرت أمورنا بسلام ولكن لاحظت شي في مطارهم ماشفته قبل في مطار ثاني
لما طلعنا من الطياره ومشينا صوب الكاونتر عشان نختم جوازاتنا
اتفاجأنا انه نحن نمشي وسط السوق الحره ولو مب كنا تعبانين كنا تسوقنا شويه ، الصراحه تزغللت عيونا
في العاده نشوف السوق الحره في العوده
ولكن لما رجعنا البلاد بعد مشينا في نفس الممر اللي فيه هاي المحلات
يعني السوق الحره يمرون عليها القادمين والمغادرين
العمله تسمى كرونا
100 كرونا تقريبا تساوي 18 درهم وكسور
جزء صرفناه كرونا وجزء يور
الاتصالات اشترينا بطاقة فودافون وبخبركم التفاصيل في التقرير
معلومات عن النظام الغذائي النظام الغذائي يشمل وجبة الافطار ووجبه خفيفه بين الريوق والغداء ويعطونا ياها في علبه عند الريوق
ووجبة الغدا ووجبه خفيفه بين الغداء والعشاء وتكون من الساعه 4 لين 5 نآخذها في كوفي الموجود في اللوبي
وآخر شي وجبة العشاء
النظام المتبع لهاي الوجبات أول ماندخل نيلس ع طاولتنا المخصصه لنا
في اول يوم أخترنا طاوله ويلسنا عليها ، وعقب حطوا عليها رقم غرفتنا ومن هذاك اليوم وهاي تعتبر طاولتنا
بعد مانيلس اتينا المسؤوله وتسألنا شو برنامجنا ونقولها D فتعطينا خيارين للغداء
وعندنا بعد خيارين للعشاء بس الريوق يكون محدد
في حالة لو اي وجبه ماعجبتكم ممكن تغيرونها من البوفيه بس ماتاخذون كميه ويكون من نفس الأكل
مثلا اذا حطولكم دياي مع نوع من الخضار وانتوا ماتحبون هالنوع
في هاي الحاله ممكن تغيرون بنوع ثاني اذا موجود في البوفيه
أهم شي انه يكون أكلكم في نفس النظام
عموما هم يعطونكم من أول يوم جدول الوجبات الخاص فيكم
معلومات عن الجلسات بشرحلكم ياها من خلال التقرير
الأشياء المطلوب أخذها عند السفر للمنتجع الصحي (( خاص بالنساء ))
1- لبس رياضي مناسب وهذا بينفعكم في الطلعات مع قروب المشي
2- أحذيه رياضيه
3- مايوهات متنوعه منها بوقطعه مب لازم يكون اسلامي ، ونوع بوقطعتين حق بعض الجلسات
وممكن مايوهات اسلاميه اذا بغيتوا تتسبحون في الحوض العام
تصدقون ماحصلت فرصه اسير اشوف المسبح العام
4- كاب خاص للشعر حق حوض السباحه
5- فوطه كبيره وصغيره للاستخدام الشخصي لأني حسيت انه فوطهم مستهلكه والحمدالله ماخذه فوطي
6- أثواب او جلابيات خفيفه ومريحه ممكن تلبسونها فوق المايو
او فوق لبسكم اللي بتلبسونها وانتوا سايرين الجلسات
الجلسات كلها في نفس الفندق وفي طوابق مختلفه
أحيانا كنت البس عبايه فوق لبسي
لأنه اوقات تضطرون تلبسون المايو وتسيرون ع طول الجلسه في هاي الحاله
تحتاجون تلبسون شي فوقه ، أتمنى فهمتوا عليه
7- شنطه عشان تحطون في أغراضكم وانتوا سايرين للمسبح
8- نعال مريح تلبسونه داخل الفندق وبعد نوع ثاني مناسب للمسبح
هذا اللي اتذكره واذا ذكرت شي برجع أضيفه
أرقام بعض السماسره العرب
عرفت وانا هناك انه في كثير من العرب المقيمين هناك يشتغلون في تقديم خدمات للسياح
واللي يايين يتعالجون ويسهلون عليهم عمل الحجوزات المطلوبه ويالمنتجعات اللي هناك
وبأسعار افضل عن اللي حصلناها
ويوفرولكم مواصلات من والى المطار ومواصلات لأي مكان سياحي
بالاضافه ممكن يكونون مترجمين لكم لأنه الشيكيين مب كلهم يجيدون اللغه الانجليزيه
بآخذ رأي الاداره واذا وافقوا بحطلكم الارقام
يعني اترييوا
الاداره نبا رآيكم ؟
المعلومات اللي جمعتها قبل السفر
المواصلات حجز التكسي من الانترنت عن طريق شركه
الصراحه جربتهم وعطوني سعر 95 يورو من كارلوفاري لين البراغ
بس انا حجزت ب 100 من السماسره العرب اللي كانوا موجودين في الفندق
أولا / براغ 1- الداون تاون أسمه
Wenceslas Square
الساحة الحيوية المليئة بالمحلات و المطاعم
2- الباص السياحي
Prague Grand City Sightseeing Tour
و التي تغطي أهم المناطق السياحية في المدينة
ثانيا مدينة كارلوفي فاري اماكن سياحيه فيها 1- في المدينه جوله ع الركشه وسعرها 40 يورو لمدة نصف ساعه
2- وفيه قطار سياحي
3- قطار جبلي جميل مدخل وفي كشك يبيع التذاكر للقطار . والتذكره 70 كرونا
4- مزرعة فراوله ، المكان قريب من كارلوفي فاري 25 دقيقه .
وتقريبا كان الحساب في حدود 75 كرونا
5- فندق القراند في كارلوفي فاري الفندق جميل وفخم وبعيد شوي عن الثيرمال تقريبا 20 دقيقه.
الفندق ماخذ مساحه كبيره .. والمحلات اللي تحته راقيه
وفيه كافييه في الفندق وله باب من برع .
6- مدينة درسدن الالمانيه
المدينه جميله تصلح للتسوق فيها مجمعات تسوق كثيره مطاعم
انتظروني في يومياتي في منتجعات كارلوفاري
أعتذرعن عدم الرد على الرسائل الخاصه
وطلب الاضافة .
