ليه أنا عيني تشوف وماتشوف إلا بهاكي ؟ تقرير النمسا 2014
ماشاءالله تبارك الله ولا قوة إلا بالله
الحمد الله الذي بنعمتة تتم الصالحات ، اللهم لك الحمد حتى ترضى، ولك الحمد إذا رضيت ، ولك الحمد بعد الرضا
انواع الكاميرا المستخدمه في التصوير لهذه الرحله
Canon EOS 550D
iphone 5
Samsung Galaxy S4
canon powershot sx50 hs
كانت الرحله الى النمسا والمانيا عبر الخطوط الاماراتيه درجة الضيافه عدد الاشخاص بالرحله 4 اشخاص
الذهاب : المدينه – دبي – فيينا بتاريخ 1 – 5 – 2014
العودة : ميونخ – دبي – المدينه بتاريخ 18 – 5 – 2014
مدة الرحلة كامله 23 يوم لاني اقمت بعد عودتي من ميونخ 5 ايام في دبي ( ماشاء الله ولا قوة الا بالله تبارك الله )
كانت خطتي بالسفر 4 – 4 – 2 ههههههههههههههههههه امزح امزح
فيينا الاقامه فيها من 1 – 5 - 2014 الى 5 – 5 –
2014
من ثم الانتقال الى بالقطار ( raileurope على الدرجه الاولى ) الى سالزبورغ
والاقامه فيها من 5- 5 – 2014 الى 9 – 5 – 2014
ومن ثم الانتقال كابرون عن طريق سيارة استأجرتها من يوروب كار
في مطار سالزبورغ والاقامه في كابرون من 9 – 5 – 2014 الى 14 – 5 – 2014
بعدها العودة من كابرون وتسليم السيارة في مطار سالزبورغ واستقلال قطار من
(raileurope على الدرجه الاولى ) الى ميونخ
كانت اقامتي في فيينا في فندق
Best Western Premier Hotel Harmonie Vienna
فندق مصنف 4 نجوم الفندق كمستوى ممتاز كنظافه وكأثاث ومن ناحية الأفطار لكن اقرب محطة مترو عنه 600 متر , بالقرب منها سوبر ماركت سبار وعدة مقاهي .
قصر الشونبرون حديقة الحيوانات الملاصقه لقصر الشونبرون
التجول بنهر الدانوب بالقارب
التجول في شارع ماريا هلفر و ساحة ستيفانز
وتغدينا بهذا المطعم التركي الرائع 
هنا الصورة يومها كنت مصخن والحراره مرتفعه بسبب تغيير الجو 
كانت اقامتي في سالزبورغ في فندق
Wyndham Grand Salzburg Conference Centre
فندق مصنف 4 نجوم الفندق هذا توج بجائزة اكثر الفنادق اقامه في عام 2013 في سالزبورغ واخذ اعلى تقييم ممتاز من كل النواحي وكبير وفخم نظافه واثاث رائع لم اجرب الافطار فيه بس صالة الفطور كانت كبيرة مرره مواقفه كبيره جداً اعطيه 5 نجوم وموقعه وانت طالع من محطة قطارات سالزبورغ تلقاه خلف ماكدونالدز مباشره اخذت تاكسي من محطة القطارات للفندق بسبب الشنط معي كثيرة واخذ علي 4 يورو لو مامعي شنط كثير كان رحت له مشي .
بحيرة ( wolfgang see ) صور من عند البحيره وصور للبحيرة من الاعلى من التلفريك
بحيرة ( fuschle see )
حديقة الحيوان ( HELBRUNN )
ذهبت للتسوق فيه خلف مطار سالزبورغ مباشره كان عادي جداً انصح بزيارة الاسواق والاوت لوت في ميونخ فهي افضل منه بمراحل .
شارع المشاه والمدينه القديمه
قطار raileurope
ركبته مرتين مره من فيينا الى سالزبورغ ومره من سالزبورغ الى ميونخ القطار جداً مريح ورائع وكأنك راكب طياره بس لاحظت ان القطار اللي كان متجه من سالزبورغ الى ميونخ كان افخم هذا اللي لاحظته افخم من الجلسات الداخليه حقته والرائع ان كل الكراسي فيها اماكن للأفياش كهرباء 220 في كل الرحلتين كنت حاجز على الدرجه الاولى واشوفها ممتازه رحلتي من سالزبورغ الى ميونخ 4 اشخاص ب 180 يورو درجه اولى رحلتي من فيينا الى سالزبورغ درجه اولى ايضاً بس ناسي والله كم كان سعرها عموما محطة القطارات رائعه وانت داخل محطة القطار ما يحتاج تروح برا تتعشى او تتغدى المطاعم مليانه حوليك حتى موجود سوبرماركت كبير جداً وايضاً محلات للايسكريم محلات خاصه بالمدخنين فيه غرف للانتظار فيها كراسي وفيها شاشتين كبيره شاشه تعرض مواعيد القطارات القادمه ووقتها واين متجهه ورقم الرحله والى أي مدينه متجهه واسم القطار ورقم المسار اللي بيوقف فيه القطار والاخرى عكسها تعرض مواعيد القطارات المغادره القادمه ووقتها واين متجهه ورقم الرحله والى أي مدينه متجهه واسم القطار ورقم المسار اللي بيوقف فيه ايضاً يوجد مكان لوضع الامانات فيه بفلوس ولك صندوق ويعطونك مفتاح وما الى ذلك .
هذي لقطات للقطار من الداخل لما نقلني من فيينا الى سالزبورغ وبعدها استأجرت سيارتي من يوروب كار من مطار سالزبورغ ومشيت 
صور للطريق المتجه الى كابرون 
وهنا الدوار الصغير وبعدها كابرون يمين وزيلامسي دور وارقع على قول اخواننا المصريين 
كانت اقامتي في كابرون في شقق
Avenida Residenz an der Burg by Alpin Rentals
الشقه مكانها بالأعلى عند قلعة كابرون اخر شقه بعدها ينتهي الخط انا كانت شقتي المطله على الجبل وزحليقة كابرون الصيفية رقمها كان رقم 2 من الشقق حسب ترقيمهم لها دور ارضي مع حوش غرفة نوم وصاله مع مطبخ نظام امريكي مفتوحه على بعض دورتين مياه ( وانتم بكرامه ) غرفه للامتعه غرفه للغساله ومواقف امام الشقه + بطاقة كابرون للاماكن السياحيه .
صار لي فيلم وانا طالع من سالزبورغ رايح لكابرون حركت من سالزبورغ الساعه 12 الظهر بتوقيت النمسا ما وصلت شقتي في كابرون الا الساعه 4:30 العصر كان معي قارمن موديل 3790 نوفي القارمن كان فيه مشكله يطلعني من الخط السريع الى طريق زراعي وكان يجيبني مع طريق نهايته يكون مغلق للصيانه القارمن ماكان محدث الطريق اللي يروح معاه صح بس كان مغلق للصيانه مو هنا المشكله لان هذي سهله مشكلته كان يطلعني من الخط السريع على الطريق الزراعي غصب وبالنهاية يطلعني على خط مغلق للصيانه ونرجع ندور من جديد والله هجول فيني القارمن بالطريق من سالزبورغ الى كابرون بس داخل كابرون وزيلامسي وضعه مضبوط ما هجول فيني كثير يمكن لأن الخط اسهل بالقرى والارياف وماكان فيه مخارج كثيرة مثل الخط السريع .
وصار لي فيلم ثاني وانا رايح من سالزبورغ لازم امر زيلامسي قبل لا امر زيلامسي كنت ماشي قدامي سيارة صغيرة وقدام السيارة الصغيرة شاحنة فجأة راعي الشاحنة ضرب فرامل بقووة واللي قدامي ضرب فرامل بقووة انا كنت شبه ملاصق للسيارة اللي امامي ومعاهم مسكت فرامل بقووة الحمد لله ماصدمت اللي قدامي وما احد صدمني من ورى المهم اطالع لقيت السبب بأنه وقف عشان بطه تعبر الشارع مع عيالها الكتاكيت تقريباً عددهم 7 وتقطع وتنزل على الوادي الملاصق للطريق يسار الخط جلست ادعي عليه حسبي الله عليه بغيت اصدم اللي قدامي على حساب بطه وعيالها وتخرب علي سفريتي .
هنا صورة لحوش شقتي المطل على الزحليقة الصيفية بكابرون وفيه حاجز بسيط بيننا وبين مسطحات خضراء كبيرة فيها ابقار .
وهنا الحوش بشكل اوضح قسسسم بالله اتفرج وماني مستوعب ماشاءالله تبارك الله ولاقوة الا بالله
شقتي هي اللي بالخلف الاخيره
منطقة زيغ موند في تون كلام في كابرون Sigmund thun klamm kaprun
كان لي فيها مرور سريع وما اعجبتني حسيتها عاديه يبغالها لياقه السيارات ماتوصل لها يبغالها مشي
قمة كابرون الثلجيه kitzsteinhorn
ثمرباخ
من اعلى قمة ثمرباخ صورة بحيرة زيلامسي وفندق جراند
الطائرة الشراعية
صور متفرقه
هنا صور للطريق من كابرون الى سالزبورغ رايح اسلم السيارة وبعدها متجه بالقطار الى ميونخ 
المترو بالنمسا غريب تركب المترو لا توجد بوابات تحط فيها بطاقة المترو لتسمح لك بالدخول البوابات مفتوحه بامكانك ركوب المترو وبدون شراء التكت الخاص بالمترو لكن هناك جولات تفتيشيه مفاجأة لما تنزل من المترو يطلبونك التيكت اذا ما معك تيكيت للمترو تدفع غرامه 100 يورو نقداً مباشرة , يعني السالفه حظوظ والله الحافظ لذلك انصح بشراء التذاكر حقت المترو .
اكثر الارياف النمساويه جمالاً من ناحية تنظيم وجمال طبيعه والخدمات لذلك انصح بالسكن فيها
3- تكسنباخ قبل زيلامسي ب 17 كيلو
مافيه مواقف بفلوس الا في شلالات كريمل كان ب 5 يورو الباقي كان كله مجاناً حسب ما واجهت .
يوم الاحد في دولة النمسا والمانيا كل شيء يقفل مطاعم محلات تجاريه سوبر ماركت اماكن سياحيه وهذا يوم فيه اجازه للشعب كامل ما تلقون فاتح الا المطاعم التركيه تقريباً .
زيلامسي عادية جداً بدون مبالغه مافيها الا بحيرة زيلامسي شوارعها ضيقه وكلها محلات وقهاوي ومطاعم وكلها خليجيين شباب وعوائل مافيه أي خصوصيه ابداً الافضل اسكن بالارياف مثل كابرون وماريا الم والقرى هذي , قبل لا اسافر النمسا كنت اشوف صور لمسطحات خضراء والناس كاتبين تحتها زيلامسي رحت وشفت بعيوني الصور كانت لقرية كابرون وقرى اخرى جميلة وليست لزيلامسي لان زيلامسي ببساطه مافيها مسطحات خضراء كابرون الجميله نسبوا طبيعتها وجمالها لزيلامسي .
كل الحجوزات كانت بمجهودي عن طريق الانترنت سواء شقق وفنادق من بوكينج او استأجار السيارة عن يوروب كار او استأجار القطارات عن طريق موقعهم raileurope اما التذاكر فكانت عن طريق مكتب طيران الامارات
جربت فيزا الراجحي مسبقة الدفع للفنادق في اوروبا الحروف والارقام محفورة ما واجهت معها اي مشاكل ولله الحمد وجربت ماستر كارد الاهلي مسبقة الدفع في فنادق بدبي واستأجرت سيارة في سالزبورغ في النمسا عن طريقها وكانت الحروف والارقام محفورة ما واجهت معها اي مشاكل ولله الحمد .
شركة الأتصالات T-Mobile Austria اخذت من عندهم شريحه بيانات بس بيانات ب 10 يورو فيها 10 جيجا .
كانت لي تجربه مع يوروب كار طلبت سيارة AUDI A4 STANDARD
· تأمين ضد الغير وضد السرقه لكنه لا يغطي الاصبات الشخصصيه للسائق بس كان عندي ورقة تأمين صحي
الاستلام والتسليم في يوروب كار في فرعهم مطار سالزبورغ
وعند التسليم طلبوا مني فقط ان تكون السيارة مليانه ديزل استلمتها فل تسلمها فل هذا شرطهم
المهم جيت بستلم السيارة قابلت وحده اسمها شتيفاني كما تنطق بالالمانيه قالت لي ماعندنا السيارة اللي انت طلبتها عندنا سيارة اسمها SKODA او نعطيك AUDI A3 ونخصم لك الفرق طبعاً انا رفضت واصريت على طلبي وهي كانت مصره ان السيارة هذي ماهي عندهم قلت لها بشوف السيارات رحنا للمواقف لقيت السيارة AUDI A3 صغيرة وماتشيل شنطي ابداً وقالت لي تراها بنزين وليست ديزل وشفت السيارة SKODA حلوة ممتازه وسيعه ماتشكي من شي وقالت لي انها ديزل اضطريت اخذها السيارة حليوه مافيها شيء بس انا كان نفسي بال AUDI A4 STANDARD المهم قررت اخذها واتوكل على الله , وعند التسليم سلمتها لهم اول سؤال سألني الموظف حق يوروب كار السياره الديزل فُل ؟ قلت له نعممم فل . قالي خلاص حط المفتاح وروح قلت له تراني وقفتها لكم بالموقف 19 C قالي خلاص روح واتركها احنا نطلعها ما عليك .
بعد تسليم السيارة بيومين جتني رساله من يوروب كار يبغوني اقيم تجربتي لديهم للنظافه والاريحيه بالسيارة وما الى ذلك التقييم كان من 1 الى 10 وبالنهايه كان فيه فراغ تكتب فيه رايك الشخصي الشهادة لله تقييمي لهم كان ممتاز بس بالفراغ حق رايك الشخصي كتبت لهم طلبت AUDI A4 STANDARD واعطيتوني SKODA اذا ما راح تلبون لي السيارة اللي انا اطلبها ليش تحطون بالموقع السيارات الموجوده انا لما اخترت AUDI A4 كنت اريد هذي السيارة ولا غيرها على أي اساس تعطوني سيارة ثانيه انا اللي اختار ولا انتم ومن هالكلام المهم مادريت الا بعد يومين كاتبين لي اننا نعتذر مانقدر ننزل كلامك هذا بالتقييم ارجوك اعد التقييم من جديد قمت مسحت رسالتهم بالحقيقه انصدمت من تجربتهم وماراح اعديها كلامي كان قاسي بس ما تخطى حدود الادب هم خافوا لما شافوا الكلام لان بصراحه فعلا ليش تحط لي سيارات وتطلبني اختار وبالنهايه تقوم ماهي موجوده عندي وهم عندهم خبر ونسخه من الحجز اني بأستلم السيارة اللي نوع كذا باليوم كذا عموماً تجربه لن اكررها معهم ابداً .
••
كي تكوني
في عيوني
ومن حنيني
وبس فيني
ومو بدوني
يا أعذب من الأمنيات •• يا عالم من الأغنيات •• يا أجمل الشعر البديع •• من آخره لين أوله ••
شـــــكر خاص لكلاً من " رجل شرقي , دموع الوجد , العندليب , خالد الشمري , وليد الرس , طائر الغربه , هداوه , يوما ما سنلتقي , Abu sultan "
أتقدم بخالص الشكر والعرفان كل من ساعدني بمعلومة أو قام بتوجيه نصيحة لي والتي ساعدتني كثيرا في سفري واعتذر اذا نسيت أحد
نسأل الله العلى القدير ان يجعل ما قدموه لنفعه اعضاء هذا المنتدى في ميزان حسناتهم انه ولى ذلك والقادر عليه أمين يا رب العالمين .
** ( هذا ما عندي أن أصبت فمن الله وان اخطات فمن نفسي والشيطان ) **
جميع الحقوق محفوظة المدمر هنري ©
سُبْحَانَكَ اللَّهُمَّ وَبِحَمْدِكَ ، أَشْهَدُ أَنْ لا إِلهَ إِلَّا أَنْتَ أَسْتَغْفِرُكَ وَأَتْوبُ إِلَيْكَ .
