اسعد الله اوقاتكم بالخيرات وبالمسرات ..
اخواني الكرام حبيت انقل لكم تجربتي بالتعامل مع شركة Spain select بداية معرفتي بالشركة هو اني حجزت عن طريق موقع بوكينج في ملقا وبعدها بيوم او يوم جاني ايميل من اللي حجزت منهم الشقة وقالو فيه خطأ في بوكينج والحجز اللي طلبته غير متوفر وهو كان شقة بغرفة نوم واحدة قلت له مافيه مشكلة ابغا حجز عندكم في نفس المبنى قالي متوفر شقة 3 غرف نوم قلت أوكيه احجزها لي مع العلم ان عددنا 2 بالغين 2اطفال بس الصورة ذي هي اللي خلتني اخذ في نفس المبني ...
تمت عملية الحجز وقلت فرصة بسألهم اذا عندهم شقق في مدريد قالي موجود قلت اوكيه احجز لي شقه غرفة نوم وحدة وبالفعل تم الحجز قالي ادخل على موقعنا وسدد، طبعا سويت تسجيل (او انهم هم اللي سجلوني )في الموقع دخلت على الموقع وطلع لي الحجزين اللي سويتها طبعا الموقع او المنصة الخاصة بالعميل فيها كل اللي يبيه العميل من الحجوزات والمدفوعات والمطلوبات والتفاصيل الاخرى من الوصول وبيانات العميل من الاسم ورقم الجواز وعدد المرافقين وتفاصيل ثانية، السداد بيكون عن طريق الفيزا ويعطيك خيار الدفع باليورو او بالريال السعودي وبعدها يعطيك الوصل بالمبلغ اللي تم دفعه وبالنهاية راح تلقى المبالغ اللي تم دفعها او المتبقية في الفاوتشر حق الحجز اللي تقدر تطبعه من الموقع وراح يكون فيه مبلغ تأمين راح يخصم من الفيزا ويرجع المبلغ لك بعد عمل تسجيل الخروج بعدها ب 7ايام راح تلقى المبلغ رجع للفيزا.
نجي لتفاصيل الحجز:-
ملقا
تم عمل حجز في ملقا 21-09-2014 الى 25-09-2014وكان الحجز في شقق Calle Nueva V طبعا الشقق ما يتوفر فيها مواقف لذلك توقف في مواقف عامه وفيه مواقف قريب منها اسمها Camas ومن المواقف الى الشقة تقريبا مشي من 3-4 دقائق ما يميز مكان الشقق ان المنطقة اللي انت فيها ما يدخل فيها سيارات وهذا السنتر في ملقا على حسب كلام مندوب الشركة وما يميز موقع الشقق ان كل شي قريب منك( ماعدا السوبرماركت ) التسوق ومطاعم وكفيات ومخابز كلها قريبة منك في نفس المنطقة والمنطقة حيوية جدا ومريح السكن فيها طبعا اذا قربت للوصول للشقق اتصل على مندوب الشركة وموجود الرقم في الفاوتشر وهو راح يقابلك ويشرح لك الموجود في الشقة ويعطيك مفتاح الشقة ويكون موجود في الشقة نفسها وهي نسختين من المفاتيح طبعا الشقة فخمة متوفر فيها غسالة ملابس وغسالة اطباق ومناشف ومناديل
رابط عنوان المواقف عن طريق قوقل ماب:
التكلفة كانت كالتالي :
اجارالشقة : 960 يورو
رسومحجز : 70 يورو
تأمين: 300 يورو
مدريد تم الحجز في 25-09-2014 الى1-10-2014 وكان الحجز في شقق Campomanes وهي شقق كلاسيك وفخم وكذلك هذي الشقق ما يتوفر فيها مواقف خاصة بها ويوجد موقف عام قريب منها في الشارع الخلفي لها وتبعد عن الشقة من 2 – 3 دقائق مشي ما يميز الشقة انها قريبه جدا من القصر الملكي تبعد تقريبا من 5 -7 دقائق مشي وكذلك قريبة من شارع التسوق المشهور GranVia تقريبا من 5- 10 دقائق مشي والشقق قريب منهاالسوبرماركت والمطاعم والكفيات والتسوق ونفس الكلام السابق اذا قربت من الشقق اتصل على المندوب وراح يقابلك عند الشقق وراح تكون المفاتيح موجود بداخل الشقو وهي نسختين ، ونفس الشقة السابقة متوفر غسالة ملابس وغسالة اطباق ومناشف ومناديل .
رابط عنوان الشقة عن طريق قوقل ماب :
التكلفة كانت كالتالي :
اجارالشقة : 870 يورو
رسومحجز : 70 يورو
تأمين: 250 يورو
اعتذر عن الاطالة والتفصيل وفي الختام اليكم بعض النقاط :-
1-موقع الشركة على النت هو
2-الشركة عبارة عن تأجير شقق فخمة وعندهم خدمات ثانية مثل استئجار السيارات والحارس الشخصي وغيرها
3-اقل مدة استئجار من عندهم على حسب ما فهمت منهم هي 3 ايام .
4-خدمات العملاء عندهم متعاونين جدا سواء عن طريق الايميل او الهاتف.
5-ممكن بعض الشقق لديهم يكون فيها عرض وهو يكون لك يوم مجانا انت تختاره عشان التنظيف لان التنظيف سعر لحاله.
6-الشركة حتى بعد ما رجعت للرياض وهم ارسلوا لي كم مرة يقولون كيف خدمتنا واذا لك ملاحظات علينا وهذا يبن مدى اهتمامهم بالعميل.
7-ارجو الانتباه لتفاصيل الحجز لأني تورطت في حجز ملقا حجزت شقة من 3 غرف عندهم كله عشان الجاكوزي وفي النهاية طلع الحجز بدون السبا وكان موضح في الفاوتشر هالشي بس للأسف ما انتبهت له .
وبالتوفيق للجميع ،،،
