اولا كل عام وانتو بخير بمناسبة عيد الأضحى المبارك
ثانيا انا بصراحة ماكنت ناوية اكتب عن هالرحلة السريعة .. بس من الفضى هاليومين قلت خلني اكتب عنها .. والتمس منكم العذر لأي نقص او قصور ممكن تشوفونه في التقرير الخفيف ان شاء الله ..
والحين خلونا ندخل بالموضوع << جاهزة ماشالله
قبل عيد الأضحى بكم يوم كان عندنا اجازة اليوم الوطني لدولة الإمارات وطبعا انتو عارفين ايام التدريس تحمل من الهموم ماتحمل .. بصراحة كنا انا والمعلمات نعاني من ضغط نفسي شديد في المدرسة بسبب المشاكل مع الادارة ..
وقدر الله انه الاجازة تبع اليوم الوطني تندمج مع اجازة عيد الاضحى وتكون طويلة نوعا ما .. يعني اكثر من عشرة ايام ..
قبل الاجازة بيومين كنت افكر وين ممكن ألاقي مكان ارتاح فيه وانسى كل المشاكل اللي نمر فيها واسترخي شوي واكون بعيدة عن كل مايشوش مزاجي ..
وبالطبع فكرت في المنطقة الشرقية وبالأخص منطقة دبا الفجيرة اللي فيها فنادق وشاليهات عالمية ..
بس الهم الوحيد كان منو بيكون معاي هناك.. فاتصلت باخوي وكان في الدوام طبعا .. وخبرته اني تعبانه نفسيا وابغي اغير جو وسألته اذا يقدر ياخذ اجازه من الدوام ونطلع مع بعض .. وسبحان الله صدفة طلع اخوي ماخذ اجازه بالفعل واجازته راح تبدأ مع اجازة اليوم الوطني .. فرحت وايد وقعدت ادور بالنت على الفنادق والشاليهات .. وحجزت عن طريق الانترنت في فندق جال الفجيرة.. وهذا موقعه على الانترنت http://www.jalfujairahresort.ae/index.aspx الغرفة الوحدة الديلوكس مع الضرائب = 1240 درهم ..
اخذنا ثلاث غرف ..غرفة لي .. غرفة لأخوي .. وغرفة ثالثة حق ولد اختي وزوجته ..<< عزمتهم ويانا بالغصب
طبعا لما اتصلت في ولد اختي كان في الدوام ( في بوظبي )وطبعا كان عندهم طوارئ وماعنده اجازه الا يومين بس وقالي انه راح يواصل الين الفجر وراح ينزل راس الخيمة على طول وانه راح يوصل راس الخيمة تقريبا الساعة 6 الصبح ...فاتفقت وياه ان لما يوصل راس الخيمة ينام الين الساعة 12 الظهر وبعدين نطلع ..
قدر الله في هذيك الليلة واهي ليلة 3 ديسمبر ان تنزل امطار ماشالله تبارك الرحمن امطار غزيرة.. عشان جيه تأخر ولد اختي في الطريق وهو راجع من بوظبي .. ولما وصل راس الخيمة تذكر بعض الشغلات اللي لازم يسويها .. وتخيلوا متى وصل البيت عشان ينام .. طبعا وصل الساعة 10 الصبح .. يعني ساعتين قبل موعدنا ..
المهم دقيت له تيلفون وصحى من النوم وتجهز اهو وزوجته وركبنا كلنا في سيارة وحدة..
انطلقنا الساعة 1 الظهر .. من راس الخيمة متوجهين الى دبا الفجيرة ..
طبعا اللي رايحين معاي مايعرفون فندق جال الفجيرة .. وقاعدين تعليقات في السيارة .. (( اكيد حاجزة لنا في فندق بو نجمتين .. واللي يقول اكيد ارخص فندق في الفجيرة .. وهات ياضحك ))
وانا عاد واثقة ان الفندق راح يعجبهم فما كنت مهتمة بتعليقاتهم وكنت اضحك معاهم << وحشر مع الناس عيد ..
الجو يومها كان اكثر من راااااااائع .. غيوم وبراد ونفات مطر ..
لما وصلنا الفندق عيبهم وايد واستانسوا عليه .. وهذي بعض الصور للفندق من الانترنت وبعضها من تصويري الشخصي .. 
الكرسي اللي عليه دائرة حمرا هو بالضبط المكان اللي قعدنا فيه عشان نتعشى بالليل .. 
غرفتي .. ولا تستغربون من وجود سريرين .. لان اخوي طلب غرفتين بينهم باب فكانت غرفته بو سريرمزدوج وعلى حظي غرفة بو سريرين .. 
وهالصورة من بلوكونة غرفتي << خربت علي النخلة الله يهداها خخخخ 
طبعا ماارتحنا على طول طلعنا ندور مطعم النوخذه الموجود في الفندق عشان نتغدى بس الوقت كان متأخر تقريبا 3 ونص او قريب ال 4 عشان جيه المطعم طلع مسكر ..
وبالرغم من وجود مطاعم ثانية بس فضلنا نتغدى برع .. وياريت اللي جرا ماكان خخخخخخخ .. لان قعدنا ندور ونحوس في دبا وخور فكان عشان نلاقي مطعم عدل مالقينا .. ويمكن لقلة خبرتنا في هالأماكن فما عرفنا وين نتغدى وبأي مطعم .. المهم لما وصلنا خور فكان وبالتحديد منطقة الكونيش كنا ميتيين يوع خلاص الساعة قاربت على 5 واحنا ماتغدينا وماكان فينا صبر .. شفنا مطعم اعتقد كان اسمه بارس واعتقد ايراني بس انا مارضيت انزل لان شفت سيارات وايد جنبه قلت يمكن زحمه وانا اكره الزحمة.. وبعده بأمتار قليلة لقينا مطعم اسمه تاج خور فكان واستقرينا عليه وهو مطعم مأكولاته هنديه.. وللاسف بصراحة ماعجبني اكله ابداااااااااا .. بعدين طلعنا تمشينا في الفجيرة وشفنا مسيرة كبيرة في الشارع بمناسبة اليوم الوطني لدولة الإمارات وبصراحة الشباب مب مقصرين مسوين ربشه وحركات استهبال بس رهيبة الصراحة يعني مثلا لابسين اقنعة ويرقصون في الشارع واللي راسمين على ويهم ومن هالحركات اللي تقريبا تصير في المسيرات عموما .. وكان الشارع تقريبا واقف بسبب المسيرة ..الأمر اللي خلانا نجاوز السيارات بطريقتنا الخاصة خخخخخخخخ << اهل راس الخيمة مايتوبون عن حركاتهم.. بعدين قعدنا ندور على مركز تجاري << مدام السالفة فيها حريم يعني لازم يكون فيه وقت للتسوق لووووووووول لكن للاسف الفجيرة مافيها حتى الآن اي مركز تجاري كبير .. المراكز التجارية لاتتعدى ان تكون متاجر عادية كمركز اللولو مثلا .. فاخذنا ندور وندور وندور الين لقينا مركز صغير جدا فيه بعض المحلات مثل محل اريج ومحل الساعات ريفولي .. نزلنا تمشينا فيه دقائق محدودة لانه مره صغير وطلعنا على طول . طبعا قررنا نرجع للفندق ونتعشى هناك لان الساعة صارت 8 حبينا نتعشى على إطلالة البحر .. فجلسنا في الشرفة اللي وريتكم صورتها قبل .. وهذي صورة العشا صورتها بالموبايل لان كاميرتي كانت في الغرفة .. 
تعشينا وبعدها قعدنا نتمشى في الفندق من ناحية البحر وكان فيه احواض سباحة متعددة للصغار والكباروبعض الالعاب المائية وجلسات رائعة جدا .. اعذروني التصوير بالموبايل .. 
وبعد ماتعشينا وقضينا وقت ممتع في السوالف مع بعض توجه كل واحد لغرفته ونام .. الصبح قمنا تريقنا في الطابق الاول في مطعم Breeze وبالتأكيد طبعا الفطور كان عبارة عن بوفيه ..
بعد الفطور تمشينا عالبحر وركبنا القوارب البلاستيكية اللي تتحرك بواسطة الدواسات.. 
هالصورة التقطتها واحنا على القارب .. ولما صارت الساعة 12 الظهر لمينا اغراضنا وسوينا شيك أوت وبصراحة كنا مستانسين وايد وودنا نقعد اكثر بس للاسف ولد اختي ماعنده اجازه ولازم يرجع .. رجعنا راس الخيمة بس وين سرنا ؟؟ راح اخبركم بالجزء الثاني من الرحلة ان شاء الله .. 
طبعا احنا طبعا متغدين وخالصين بس علثه عشان ندخل المنتجع ..
