إضافة رد
07 / 11 / 2015, 46 : 11 PM
رقم المشاركة :  21 
مشرفة زاد المسافر الى تركيا



الملف الشخصي
تاريخ التسجيل : 21 / 10 / 2007
رقم العضوية : 523
الإقامة : فلسطين الداخل
المشاركات : 2,561
التقارير : 3
الجنس : أنثى
الحالة : نصراوية غير متواجد حالياً
رد: مغامراتي البحريه ع كروز MSC للأراضي النرويجيه

موضوع رائع جداقرات الكثير عن رحلات الكروز وكنت وعدت باعداد موضوع عنها ولكن لم يتسنى لي ذلك والحمد لله جاء موضوعك قمة في الاحاطة بكل المعلومات المطلوبة .
MCS االيطالية من اشهر شركات رحلات الكروز وقبل 10 ايام سيرت لها رحلة من حيفا كنت اتمنى ان اكون عليها .
الرحلات بالسفن هي الحل الامثل لمن يعاني من طول الجلوس في الطائرة. ففي رحلتي الاخيرة انا ووالدتي الى اسبانيا صرحت والدتي بحزن انها وبسبب الام الجلوس لن تسافر الى الدول التي تكون بها مدة الرحلة اكثر من ساعتين بالطائرة فقلت لها اطمئني هناك رحلات مريحة في السفن سنتحول اليها.
سؤالي قبل ان انسى هل يمكن قطع الرحلة عند وصولها الى احد وجهاتها وعدم المتابعة كما اردتي ان تفعلي لتزوري اوسلو؟


البرشور هو عباره عن كتيب من صفحتين او 3 يعني تكون عدد صفحاته قليله

ويكون فيه معلومات ودعايه عن شي معين



انها المطوية أختي ام عيسى فلقد قام منتدانا مشكورا بتعريفنا بالمعنى العربي لكلمة بروشور من خلال اصدار الكثير من المطويات عن مدن شتى في انحاء العالم

شكرا لك على هذا التقرير المميز الذي اتمنى ان اعيش تجربته في يوم ما.
08 / 11 / 2015, 15 : 09 AM
رقم المشاركة :  22 
عضو مجلس الإدارة



الملف الشخصي
تاريخ التسجيل : 26 / 06 / 2007
رقم العضوية : 82
الإقامة : الــــكـــــو يــــت
المشاركات : 48,656
التقارير : 7
الجنس : ذكر
الحالة : ناصر كويتي غير متواجد حالياً
رد: مغامراتي البحريه ع كروز MSC للأراضي النرويجيه

ترجعين بالسلامه ام عيسى الله يحفظكم
المواضيع الموجودة في الموقع تعبر عن رأي كاتبها ويتحمل مسؤوليتها فقط ولا تعبر بالضرورة عن رأي موقع زاد المسافر
08 / 11 / 2015, 12 : 12 PM
رقم المشاركة :  23 
مسافر جديد



الملف الشخصي
تاريخ التسجيل : 03 / 11 / 2015
رقم العضوية : 113754
المشاركات : 23
الجنس : ذكر
الحالة : قاسم غير متواجد حالياً
رد: مغامراتي البحريه ع كروز MSC للأراضي النرويجيه

بصراحه أول مشاركة لي في المنتدى
ربي يعطيك الصحة والعافية
بداية ممتازة
وبأمانه حلم يراودني لزيارة النرويج بيشكل عام
ولو تحقق لكان الخيار الأبرز عبر هذه السفينة العملاقة
سافرت عدة دول ، آخرها تركيا
10 / 11 / 2015, 50 : 06 PM
رقم المشاركة :  24 
خبيرة سفر وسياحة



الملف الشخصي
تاريخ التسجيل : 11 / 02 / 2008
رقم العضوية : 1140
الإقامة : الامارات
المشاركات : 2,023
التقارير : 14
الجنس : أنثى
الحالة : هداوه غير متواجد حالياً
وسام خبير سياحي

رد: مغامراتي البحريه ع كروز MSC للأراضي النرويجيه

اقتباس: المشاركة الأصلية كتبت بواسطة zad77
معلومات قيمة عن عالم الكروزات ..
اقتباس: المشاركة الأصلية كتبت بواسطة zad77
هنا فقط لدى هداوة نجد المعلومات في مكان واحد ..

بارك الله لك ..

تابعي فنحن نتلهف لأي حرف تضعيه هنا ..



أشكرك أخويي وحياك الله



اقتباس: المشاركة الأصلية كتبت بواسطة Eman82
عسى المانع خير الغاليه ام عيسى
اقتباس: المشاركة الأصلية كتبت بواسطة Eman82


في انتظارك وانتظار تقاريرك المميزة 🌷



سوري الغاليه كنت مسافره ان شاءالله بنكمل



اقتباس: المشاركة الأصلية كتبت بواسطة mas222
ام عيسى علقتينا ورحتي عسى المانع خير
والله رحله ممتعه والله يوفقك ويسعدك
خوش رحله وخوش تقرير
ننتظر الباقي ........

السموحه منكم


ع الاقل فرحتوني وحسيت حد يتابعوني


الله يخليكم شاركوني بردودكم عشان أحس بوجودكم



اقتباس: المشاركة الأصلية كتبت بواسطة Abu sultan
أعتقد أنه لا يوجد موضوع عن رحلات الكروز في المنتدى إلا مريت عليه وقرأته وكتبت فيه كم رد .. الكروز عشق وأمنية من زمن طويل .. ركبت الكروز في اليونان مع الوالد الله يرحمه قبل حوالي ولا بلاش ما ودي أقول علشان ما يسخرون مني الشياب ,, كان هذا منذ زمن بعيد .. وكلما قرأت موضوع عن الكروز تحرك شوقي لخوض هذه التجربة لكن أم سلطان تخاف من السفن ومن البحر ورحلات الكروز .. أحب الاسترخاء والبحر والتأمل والبعد عن الضجيج خاصة عندما تقل الحركة في السفينة في الصباح الباكر أو في منتصف الليل حيث النجوم والقمر والظلام إلا من أضواء السفينة .. أعتقد أن أكثر مكان هاديء في السفينة ولا يوجد فيه أحد هو هذا المكان :






نعم المكتبة .. المكتبة أعتقد أنه المكان الوحيد الذي لا يدخله ولا يهتم به أحد! .. هذا هو المكان الذي يناسبني فيما لو سافرت على الكروز وحدي .. متابعين يا أم عيسى بقية الرحلة فلا تتأخري علينا

ياهلا وسهلا فيك


وأن شاءالله تقتنع أم سلطان وتتمتعون بأحلى رحله


بس أنا معاك في أوقات معينه ماشي زحمه وهدوء وخصوصا بالليل


لأنه الاجانب أغلبهم يرقدون بدري


ولكن فيه أماكن كثيره فيها هدوء واسترخاء مثل المكتبه وأحلى


مثلا أنا كنت أحب أيلس في المطعم آخر شي


من كبره فيه يلسات في آخره محد ايلس فيها وتكون ع البحر وهاديه



اقتباس: المشاركة الأصلية كتبت بواسطة Japantokyo
تقرير مميز ودسم ومليئ بالمعلومات لعشاق رحلات الكروز والباحثين عنها أمثالي
يعطيك ألف عافيه أختي الفاضلة هداوه
عندي استفسار لو سمحت
بالنسبة لفيزا الشينغن
هل طلعتها من السفارة النرويجية أم بلد الوصول الألمانية ؟
وشكرا جزيلا لك
اقتباس: المشاركة الأصلية كتبت بواسطة Japantokyo


أرسلت بواسطة iPhone بإستخدام Tapatalk



الله يعافيك أخويي


الصراحه نحن ماسوينا الشينجن لانه معفايين منها


وماعندي فكره عن الموضوع هذا



اقتباس: المشاركة الأصلية كتبت بواسطة نصراوية
موضوع رائع جداقرات الكثير عن رحلات الكروز وكنت وعدت باعداد موضوع عنها ولكن لم يتسنى لي ذلك والحمد لله جاء موضوعك قمة في الاحاطة بكل المعلومات المطلوبة .
اقتباس: المشاركة الأصلية كتبت بواسطة نصراوية
MCS االيطالية من اشهر شركات رحلات الكروز وقبل 10 ايام سيرت لها رحلة من حيفا كنت اتمنى ان اكون عليها .
الرحلات بالسفن هي الحل الامثل لمن يعاني من طول الجلوس في الطائرة. ففي رحلتي الاخيرة انا ووالدتي الى اسبانيا صرحت والدتي بحزن انها وبسبب الام الجلوس لن تسافر الى الدول التي تكون بها مدة الرحلة اكثر من ساعتين بالطائرة فقلت لها اطمئني هناك رحلات مريحة في السفن سنتحول اليها.
سؤالي قبل ان انسى هل يمكن قطع الرحلة عند وصولها الى احد وجهاتها وعدم المتابعة كما اردتي ان تفعلي لتزوري اوسلو؟


البرشور هو عباره عن كتيب من صفحتين او 3 يعني تكون عدد صفحاته قليله
ويكون فيه معلومات ودعايه عن شي معين

انها المطوية أختي ام عيسى فلقد قام منتدانا مشكورا بتعريفنا بالمعنى العربي لكلمة بروشور من خلال اصدار الكثير من المطويات عن مدن شتى في انحاء العالم

شكرا لك على هذا التقرير المميز الذي اتمنى ان اعيش تجربته في يوم ما.


ياهلا وسهلا فيك أخويي


بالننسبه لسؤالك ممكن تقطع الرحله من اي مكان ولكن الشركه مابترجعلك أي مبلغ


الرحله مدفوعه بدون استرجاع


بالنسبه للبرشور انا متعوده أقول برشور وممتعوده أقول مطويه وماكنت أعرف أنه اسمها مطويه


الا لما عرفنا عليها منتدى الزاد مشكورا ، وع فكره أنا عندي مطوية عن سيئول


ولكن أنا أشرحها للي مايعرفها


الله يحقق أمنيتك ان شاءالله






اقتباس: المشاركة الأصلية كتبت بواسطة قاسم
بصراحه أول مشاركة لي في المنتدى
ربي يعطيك الصحة والعافية
بداية ممتازة
وبأمانه حلم يراودني لزيارة النرويج بيشكل عام
ولو تحقق لكان الخيار الأبرز عبر هذه السفينة العملاقة
سافرت عدة دول ، آخرها تركيا

هذا من حظي الحلو اني أو مشاركاتك


اللهم آمين ولك بالمثل


ياسلام ع تركيا ودي أزورها مره ثانيه ولكن كل ما أخطط عليها ماتنجح

10 / 11 / 2015, 09 : 07 PM
رقم المشاركة :  25 
خبيرة سفر وسياحة



الملف الشخصي
تاريخ التسجيل : 11 / 02 / 2008
رقم العضوية : 1140
الإقامة : الامارات
المشاركات : 2,023
التقارير : 14
الجنس : أنثى
الحالة : هداوه غير متواجد حالياً
وسام خبير سياحي

رد: مغامراتي البحريه ع كروز MSC للأراضي النرويجيه

الجزء الخامس

يومياتنا في الكروز

يوم الوصول 12 / 8 / 2015



مقدمه


توقيت وتاريخ رحلتنا


رحلتنا بالسفينه يوم 12 / 8

والسفينه بتتحرك الساعد 6 المغرب من هاليوم

ونحن طيارتنا بتوصل الظهر

كانت موعد اقلاع طيارتنا ع الساعه 9 الصبح والوصول 1.40 الظهر

كان عندي خيارين

الاول انه نوصل هامبورغ تاريخ 11 يعني قبلها بيوم وثاني يوم نطلع ع السفينه

والخيار الثاني

انه نسافر في نفس يوم الرحله يعني من المطار الى السفينه

بعد تفكير أخترت


الثاني

لأنه فيه وقت كمن ساعه قبل لاتتحرك السفينه

طبعا هاي مغامره مني

لأنه لاسمح الله لو صار أي تاخير من الطياره أو أي سبب ومالحقنا ع السفينه وراحت عنا

وقتها مافي أمل نلحق عليهم وبتروح فلوسنا وبتروح علينا الرحله

وبيكون هذا حالنا

ولكن الحمدالله مرت الامور بسلام مثل مارتبتها




يوم الوصول

تجهزنا ويتنا سيارة المطار تاخذنا من البيت وتاخرنا ع الدرويل وجان يروح عنا

الحمدالله بوعيسى وعيسى وسايقنا موجود

رتبنا عمارنا وطلعنا المطار وسارت الامور ع خير وركبنا طيارتنا



غدايي








وصلنا هامبورغ








استقبلتنا السيارة الخاصه بطيران الامارت



وهذا سايقنا يركب شنطنا


ماشاءالله وايد شالين شنط



وانطلقنا للميناء

كنت طابعه العنوان احتياطي

عموما الميناء معروف







بدينا نشوف السفينه







سفينتنا






وصلنا الميناء


وأول مانزلنا لقينا هالكاونتر ياخذ عنا شنطنا

وعطيتهم رقم غرفتنا اللي من قبل محددتنها وقت الحجز








عقب ماحطوا الاستكر اللي فيه رقم غرفتنا سلمونا أظن ورقه ما اتذكر شو بالضبط

بس عطونا شي

هم دخلوا الشنط ونحن سرنا صوب المدخل الرئيسي




بيسلمونا شنطنا داخل السفينه












دخلنا الصاله وكانت المفاجأه

الصاله كبيره مثل المطار ، وناس وايد





أول مادخلنا عطونا عصير ترحيبي





عقب سرنا صوب طاوله حاطين عليها اوراق ولازم ناخذها


ونملي البيانات اللي عليها وعقب يعطونا رقم








هاي هي الورقه اللي عبيناها




عطونا رقمنا وسرنا عند الكراسي ننتظر





كل شي منظم عندهم ومرتب ورغم كثرت العدد بس مافيه ازدحام وخرابيطنا

كله بالدور واللي يقولون رقمه يوقف ويسير عند الكاونتر

والباقيين ايلسون وينتظرون في هدوء وراحه





قلت للبنات أنا بتمشى وبصور للتقرىر وبرجعلكم

وأنا أمشي واصور جان أشوف ناس واقف هالصوب


وركزوا ع البنت اللي بتطلع في الصوره





هاي البنت وقفت بكلمها


وكنت حابه أسالها عن النظام وانا مفكرتنها أجنبيه

جان تطلع عربيه من المغرب

ع طول رحبت فيني بالعربي وطبعا انا فرحت وماصدقت اني شفت عربيه ويانا


وموظفه بعد

يعني كل اللي أباه بقدر أسألها ياه

سالتها وجان تقوللي

كم رقمكم ، خبرتها عن رقمي

قالت سيري هاتي البطاقه وانا بعطيج بدالها بطاقه ثانيه


وهاي البطاقه تدخلكم ع طول عند الكاونتر الخاص

بالـ VIB والحالات الخاصه مثل اللي ع كرسي متحرك وغيره

طبعا أنا طرت من الفرح اني حصلت واسطه وبدخل بسرعه بدون انتظار

عرب مانيوز عن سوالفنا

رجعت عند البنات وقلتلهم
تعالوا ورايا

وشرحتلهم السالفه


سلمتنا البطاقه وع طول ع الكاونتر












عطيناهم جوازاتنا وورقة حجزنا


ونسيت بعد شو عطيتهم أظن الورقه اللي عبيناها

المهم هنيه صار شي

وااااااااايد مهم

في السفينه عندهم نظام خاص في الدفع

يعني ونحن هنيه ع الكاونتر سألوني



بأي طريقه بتدفعين داخل ؟

قلتلهم ببطاقة الفيزا


وسلمتهم بطاقة بوعيسى وما أدري ليش ماانقبلت

والحمدالله كانت بطاقتي معاي وانقبلت

ممكن تحبون تدفعون كاش بدال البطاقه


في هاي الحاله تعطونهم مبلغ معين بس اللي ما أعرفه

هل المبلغ هذا أنا أحدده ولاهم


الصراحه ما أدري ونسيت أسأل

انزين الحين شو اللي سووه بطاقتي وليش خذوها ؟

الله يسلمكم يربطون بطاقتي الفيزا ببطاقة الغرفه لي وللبنات

لأنه كل واحد منا له بطاقه بأسمه للغرفه

وبعدين لما نكون داخل أي شي بنشتريه بندفع ببطاقة الغرفه كأنها بطاقة الفيزا

يعني محد يدفع كاش في أي شي

واللي بيحط في بطاقته كاش بدال الفيزا نفس الشي بيستعمل بطاقة الغرفه

ليش هالنظام ما أدري ؟


بس في رأيي الشخصي ممناسب

في حالة لو ضاعت البطاقه

في هاي الحاله ع طول تبلغون الرسبشن وهو يلغي كل البطاقات


ويصدرلكم بطاقات يديده

في هاي الرحله مره وحده بنتي ضيعت بطاقتنا وغيرت كل بطاقاتنا

عقب ماخلصنا اجراءاتنا سلمونا بطاقتنا


ومكتوب ع البطاقات اسمائنا ورقم غرفتنا





وسلمونا هايالكوبونات واللي فيها نحصل ع ماي معدني مجاني


وكل وحده منا لها رزمه من هاي الكوبونات

في البدايه ماكنا نعرف هالشي


وعقب عرفنا بعد ماصارلنا موقف بخبركم عنه في أحداث رحلتنا





عقب ماخلصنا عند الكاونتر ونحن سايرين صوب المخرج للدخول للسفينه

شفت هالحلوات في استقبالنا





زخوني بنات بالي وحاولوا يقنعوني اشتري منهم

وعطوني عرض حق الاسبا وقالولي لو خذيتي من هنيه بتحصلين خصم





فكرت وقلت أنا بسوي مساج بسوي


وأكيد هاذيل مايجذبون

فخذيت بكج حق جلستين مساج


ورغم انه بالخصم بس كان غالي

تقريبا الجلستين طلعوا عليه بـ 1000 درهم

بعد ماخلصت معاهم تجدمنا صوب المغادرون





بعد ماعبرنا الجهاز صعدنا السلالم









في داخلنا فرحه وحماس تسبق خطاوينا




ونحن نعبر من فوق خذينالكم صوره







شوفوا الناس وهي تنتظر دورها والطوابير









الحين بندخل الخرطوم كأنه بندخل الطياره








أشوف شنطنا من فوق وهي تدخل السفينه






وقربنا ندخل السفينه


وقرب الحلم يحقق





وندخل بريلنا اليمين ونقول


بسم الله






تابعوني في الجزء الخامس


وأول يوم في السفينه


14 / 11 / 2015, 04 : 05 PM
رقم المشاركة :  26 
مسافر جديد



الملف الشخصي
تاريخ التسجيل : 27 / 07 / 2013
رقم العضوية : 60515
الإقامة : السعودية
المشاركات : 14
الجنس : ذكر
الحالة : Japantokyo غير متواجد حالياً
رد: مغامراتي البحريه ع كروز MSC للأراضي النرويجيه

متابعين معك ومنتظرين بكل شوق
بالنسبة للحضور للميناء يكون قبل الرحلة بكم ساعة ؟


أرسلت بواسطة iPhone بإستخدام Tapatalk
15 / 11 / 2015, 13 : 09 PM
رقم المشاركة :  27 
مسافر جديد



الملف الشخصي
تاريخ التسجيل : 05 / 11 / 2015
رقم العضوية : 113814
الإقامة : Ksa
المشاركات : 7
الجنس : أنثى
الحالة : Eman82 غير متواجد حالياً
رد: مغامراتي البحريه ع كروز MSC للأراضي النرويجيه

ماشاءالله مو متخيله كل هالبشر في سفينة وحدة😱😱


زين حصلتو احد يدخلكم بسرعة واضح ان الإجراءات تأخذ ساعات وأنتو جايين من سفر وتعب😥


متابعين معاك قواك الله 👍🏻👍🏻
16 / 11 / 2015, 17 : 01 PM
رقم المشاركة :  28 
خبيرة سفر وسياحة



الملف الشخصي
تاريخ التسجيل : 11 / 02 / 2008
رقم العضوية : 1140
الإقامة : الامارات
المشاركات : 2,023
التقارير : 14
الجنس : أنثى
الحالة : هداوه غير متواجد حالياً
وسام خبير سياحي

رد: مغامراتي البحريه ع كروز MSC للأراضي النرويجيه





اقتباس: المشاركة الأصلية كتبت بواسطة Japantokyo
متابعين معك ومنتظرين بكل شوق
بالنسبة للحضور للميناء يكون قبل الرحلة بكم ساعة ؟
اقتباس: المشاركة الأصلية كتبت بواسطة Japantokyo



أرسلت بواسطة iPhone بإستخدام Tapatalk





يوم أشوف ردودكم أحس بوجودكم وهذا يشجعني اني انزل اللي عقبه


افضل قبلها بـ 4 أو5 ساعات


يعني نحن وصلنا تقريبا قبلها بأربع ساعات وكانت القاعه متروسه وقائمة الانتظار طويله


وخصوصا سفينتنا جدا كبيره وفيها أكثر من 4 الاف مسافر






اقتباس: المشاركة الأصلية كتبت بواسطة Eman82
ماشاءالله مو متخيله كل هالبشر في سفينة وحدة😱😱
اقتباس: المشاركة الأصلية كتبت بواسطة Eman82



زين حصلتو احد يدخلكم بسرعة واضح ان الإجراءات تأخذ ساعات وأنتو جايين من سفر وتعب😥



متابعين معاك قواك الله 👍🏻👍🏻





هيه والله عدد كبير ماشاءالله
وانتي هناك غصبن عنج بتتذكرين تايتنك


هيه والله رحمه انه حصلنا هاي الحرمه ودخلتنا ولاجان خسنا من الانتظار
16 / 11 / 2015, 30 : 01 PM
رقم المشاركة :  29 
خبيرة سفر وسياحة



الملف الشخصي
تاريخ التسجيل : 11 / 02 / 2008
رقم العضوية : 1140
الإقامة : الامارات
المشاركات : 2,023
التقارير : 14
الجنس : أنثى
الحالة : هداوه غير متواجد حالياً
وسام خبير سياحي

رد: مغامراتي البحريه ع كروز MSC للأراضي النرويجيه

الجزء الخامس

اليوم الأول والثاني لنا في السفينه



حسب برنامج كروزنا بيكون أول يوم وثاني يوم كله في السفينه

فبدمجه في تقرير واحد


قلنا بسم الله ودخلنا

أول شي سرنا ندور غرفتنا اللي كانت في الدور 9

وأحلى شي انه نحن بدون شنطنا كنا خفاف

بس فيه شي لفت نظرنا من أول يوم وهو

نظرة الناس لنا

كأنه مستغربين من وجودنا معاهم
بس عقب عرفت السبب

الظاهر انه هاي الكروزات نادر يكون فيها عرب وخليجين بالذات

وكنا الخليجين الوحيدين في السفينه

ومره وحده صادفت عائله مغربيه


والباقي كلهم أجانب وأغلبهم من الطليان والاسبان

يعني العب ياولد ماشي خليجين


هههههههههههههههههههههههه

أمزح طبعا



بس صدق حسينا براحه أكبر انه محد ويانا من عربنا

حريه أكثر


نرجع لموضوعنا


رحنا الدور التاسع ومشينا في ممرات طويله ندور غرفتنا





أخيرا وصلنا غرفتنا






أول مادخلنا الغرفه شفت حاجتين ماحبيتهم فيها


الاولى



الغرفه صغيره





هذا سريرنا أنا وبنتي الصغيره
















دبدوب بنتي مآخذ ويانا مكان في الغرفه





هاي الكنبه تتحول لسرير ولما تنفتح تاخذ المساحه كلها لدرجة


مانقدر نمشي واضطرت بنتي تنام عليها بدون مانفتحها طول الرحله كلها

قسم التسريحه

تحتها فيه ثلاجه صغيره ، وفوق حاطين ماي للشرب


وعقب أكتشفنا انه هالماي بفلوس ونحن ماندري وللاسف انه مافيها غلايه

واعتقد انه تقدرون تتطلبون ماي حار للشاي والقهوه وهم يوصلونه لكم

الصراحه أنا ماسبق طلبت وكنت دايما أسير أشرب في المطعم عشان أجابل البحر




















لما شفت الغرفه صغيره ع طول كلمتهم وطلبت غرفه سويت وقلتلهم بدفع الفرق

اعتذرولي وقالولي السفينه فل وماشي غرف فاضيه

العيب الثاني


اللي شفته وخرب عليه الرحله كلها وخلا في قلبي حسره

العيب كان في البلكون

كان حاجز البلكون من المعدن مب زجاج شفاف


والحاجز كان مرتفع وهذا حرمنا انه نستمتع بالبلكونه

آآآآخ يالقهر


يعني لويالسه ع كرسي واحد مابيكون مستوى البحر ع مرمى نظري

مره قلت بجرب ويلست ع كرسيين بس مب حلو كنت أبا زجاج









تخيلوا السفينه تقريبا كل بلكوناتها لهم حاجزمن زجاج الا جزء صغير


ومن نحاستنا كانت هالجانب من الغرف من نصيبنا





حسيتوا فيني وعرفتوا شكثر هالشي يزعل ويقهر


وخصوصا لما يينا بنحجز كانوا مطرشيلنا صوره للبلكونه أم زجاج

وشكثر تخيلت نفسي يالسه فيها ومتمغطه واقرأ كتابي ولكن حرموني حلمي

كلمت بوعيسى وقلتله كلم الشركه واشتكي من



الوضع وقال أوكي بس ماكلمهم

ومن ناحيه السفينه فل ومافي مجال يعطونا غرفه ثانيه



في الاخير قبلنا بالامر الواقع وحاولت ما أخلي هاشي يعكر مزاجي


وقاطعت البلكونه والجلوس فيها

يمكن طلعت كم مره بس عشان أصور وارد أدخل


والبنات حولوا البلكونه لستور ههههههههههه

حطوا شنطهم فيها ونعلتهم عزكم الله لأنه الغرفه صغيره وماشي مكان





بالنسبه للشنط

العمال يوصلون كل الشنط ويحطونهم جدام باب غرفكم وانتوا تدخلونهم

قمة الترتيب والنظام






أول مادخلنا الغرفه شفنا محطيلنا أوراق وهاي جدا مهمه


لأنه يخبرونكم بكل برنامج السفينه لهاليوم واليوم اللي عقبه

أي نشاط أو فاعليه أو شي كله موجود وبالوقت ويحددون المكان

يعني مجله أخباريه فيها كل شي





وكل يوم يحطولنا هاي المجله الاخباريه

مثلا

اذا باجر بننزل منطقه معينه يخبرونا عنها متى بتوصل وكم درجة الحراره فيها


وشو الانشطه اللي فيها

وشو الرحلات اللي موفرتنا السفينه مع القروبات لهاي المنطقه ...الخ


مهم جدا

الافضل حجز كل الرحلات اللي تبونها قبل السفر أو في أول يوم توصلون فيه


عندهم مكتب خاص للرحلات


لأنه الرحلات تسكر اذا صلت لعدد معين

أهم شي هاي المجله الاخباريه لازم ماتهملونها

ما أدري اذا الكروزات الثانيه نفس نظامنا ولاغير

المهم كان في المجله الاخباريه اعلان عن تجمع معين وفيه بيعرفونا ع الكروز


وهذا فاتنا كنا متأخرين

والاعلان الثاني

انه ناخذ معانا سترة الانقاذ اللي موجوده في الدلاوب ونسير نتيمع


في صالة القمار

أيوه من بدايتها خراب

هههههههههه

التجمع عشان يعطونا تعليمات وارشادات حول طريقة استخدامها في حالة لو صار شي

ما أدري ليش تذكرت تايتنك ... مب وقته


خذت كل وحده منا سترة النجاه وسرنا في المكان اللي حددوه لنا


ولانه بعدنا مانعرف أجزاء السفينه

كانوا هناك موظفين مهمتهم انه يوجهونكم صوب التجمع

قمة في التنظيم




















عقب ماخلصنا التدريب رجعنا الغرفه ورجعنا السترات


وسرنا صوب المطعم اللي حجزناه لما حجزنا الكروز

لين الحين نحن ماندري اذا نقدر نآكل في مطعم ثاني


كنت مفكره انه هو هذا المطعم بس

أسم المطعم




المطعم فخم وراقي

ولكن نظرات الناس علينا عجيبه

انا براويهم اذا ماسويت غزو خليجي عليهم





ملاحظه مهمه

لازم تاخذون معاكم دايما بطاقة الغرفه وتحافظون عليها


بنتي ضيعتها في ثاني يوم وغيرناهم كلهم

اول مادخلنا المطعم خذوا منا البطاقه وحطوها في المكينه وظهر عندهم حجزنا

دخلونا عند طاوله معينه وخبرونا انه هاي طاولتنا ع طول وحتى لو ماحضرنا تبقى فاضيه

وبعد مايلسنا يابولنا المنيو

وفيه سلطات ومقبلات واطباق رئيسيه وحلو واظن عصاير

اللي يشتغلون أغلبهم مسلمين مخلطين من اندونيسيا والهند ومن آسيا عموما

وهالشي وايد ريحنا لأنه بفضلهم أحيانا نعرف اذا بعض الاطباق حلال ولا لا

عاد اللي يضحك في الموضوع مب نحن فرحنا بوجودهم بس

حتى هم وايد كانوا فرحانين بوجودنا يمكن لأنه نحن الوحيدين


المحجبات في السفينه وكانوا يخدمونا بعيونهم

عاد وايد يسولفون ويانا ساعات كنت أتضايق



بس أنا ما احب أعامل حد لطيف ويايي بقسوه

وهم لما عرفوا مني اني يايه مع بناتي وانه زوجي مشغول وماقدر ايي ويانا هالرحله

أحسهم اكثر قاموا يهتمون فينا

من خلال سوالفنا وياهم عرفنا انه فيه مطعم ثاني وفيه بوفيه ومفتوح 24 ساعه

وخبرونا انه نقدر نطلب كل الاطباق اللي في المنيو لو نبا


ونقدر نطلب أكثر من مره نفس الطبق لو نبا

واخترنا بعض الاطباق


























عقب ماخلصنا طلب من الموظف كوبات الماي عشان يسجلهم

وانا ماكنت فاهمه



وعقب هو فهمني وقلتله ماجبتهم

مسكين مشاها لنا والمفروض يدفعنا



هاي واسطه ثانيه


ومن هالموقف عرفت انه هالكوبونات للماي مجانا ولما نطلب ماي

لازم ياخذون كوبون عن كل دبة ماي ويوقعونكم انكم استلمتوا الماي

عقب بخبركم شو سويت في باقي الكوبنات اللي زادت عندنا

أظن في اي مكان في السفينه نقدر نستخدم الكوبون حق الماي

لكن الماي اللي في الغرفه هذاك ماكان مجانا ونحن فتحناهم فحاسبونا عليهم

عقب تعلمنا الدرس بس الغريبه نفس الماي اللي نحصله مجانا ما أدري ليش يحسبونه علينا

بعد ماتعشينا أو تغدينا الصراحه ما أقدر احدده هاك الوقت شو نوع الوجبه


كانت الساعه 6 ونص نقدر نعتبرها مزت المغرب هههههههه

وعموما كان لنا لقاء مع مطعم البوفيه فليل والهجوم عليه



هههههههههه





طبعا السفنه تحركت وأنا وبناتي بدت جولتنا الاستكشافيه في السفينه

هاي قوارب الانقاذ


ان شاءالله مانحتاجهم ونرد سالمين





لحظات الغروب





أذكر أنا وبناتي كنا سعيدين وفرحانين وايد بالرحله ومتحمسين لها

والسفينه حلوه وتبهر






وتمينا نتمشى ونتفرج وبالليل دخلنا مطعم البوفيه نشمشم فيه



ههههههه





البيتزا جدامكم يسوونا في الفرن






كل طبق موجود عليه كارت كاتبين فيه مكوناته وعدة لغه

فكنا نعرف الاكل اللي فيه خنزير


رغم هذا كلت مره طبق كان فيه خنزير

خلاص في كل سفره ياماكله خنزير ولافيه خمر




















الصراحه عقب ماشفنا مطعم البوفيه طلقنا هاذاك


هههههههههههههههههه

مرات قليله مرينا عليه من باب الفضول نشوف شو جديدهم




















البوفيه كل يوم غير ومتنوع ومغري الصراحه



وزاد الوزن بسببه






























المطعم يفتح للوجبات الثلاث في اوقات محدده

مثلا
الريوق أظن من الساعه 7 لين 10 ونص


والغدء من 12 لين 3


والعشا من 7 أو 6 لين 10 او 9

الصراحه ممتأكده من الاوقات

اما باقي الوقت وأقصد اللي بينهم ويكون مفتوح
طول اليوم ويقدم

انواع من البيتزا والساندويشات والفواكه ومشاريب ساخنه من قهوه وشاي وأعشاب وغيره

يعني ماتيوعون في السفينه أبدا



وهاي بعض الخفايف اللي تكون في غير أوقات الوجبات الرئيسيه































































تذكرت شي

كانوا موفرين في المطعم مكينه فيها ماي


ولكن نحن كنا نطلب ماي معدني بالكوبونات واحيانا

نطلب زياده وناخذهم الغرفه حق حاجتنا

وشفت ناس تشل أكل وتوديه الغرفه اعتقد ممكن تاخذون أكل معاكم الغرفه لو تحبون

وبعد اعتقد انه ممكن تتطلبون ريوق يوصلكم للغرفه بس اتأكدوا

نتابع تفاصيل هاليوم


في هاليوم كنا تعبانين ومرهقين من الرحله

ورقدنا أنا والبنات بدري

واليوم الثاني نشيت بدري قبلهم



وطلعت أتريق وهم عقب يوني

ولأنه
الارسال مقطوع في السفينه كنا ننتفق وين بنيلس





أحلى ريوق مع هالمنظر





عقب ماتريقت طلعت اتمشى والبنات تموا في المطعم

طلعت ع طول من باب المطعم ع المسبح


ع فكره المطعم والمسابح في
الدور 14

لما كنا نطلع من غرفتنا نمشي لين آخر الممر لين آخر مصعد

وهويطلعنا ع طول ع مطعم البوفيه

شوفوا مخطط السفينه

اللي باللون الأخضر هي المصاعد وغرفتنا وين السهم

والمصعد الاخير هو اللي يطلعنا مباشره

طبعا كل المصاعد ممكن تودينا للدور 14 بس هذا كنت أحسه
أسهل

بس أمشي في الممر






لما طلعت من المطعم شفت عند المسبح حاطين مسرح وكان فيه


وحده وواحد يسوون حركات رياضيه والمسافرون يشاركونهم

يعني اللي يبا ايي ويصف وياهم



والحركات متناغمه مع الموسيقى

الصراحه وايد روعه بس اللي ماحبيته انه كان يوم مشمس















عقب رجعت الغرفه أستعد للمساج

في هاليوم حاجزه آخذ جلسة مساج عقب تعب أمس أبالي راحه واسترخاء

وسرت الاسبا الاكثر من رائع والبنات خليتهم بروحهم يستكشفون السفينه


وتواعدنا نلتقي في المطعم وقت الغدا

























نسيت أخبركم


اني كنت حاجزه من أمس جلستي هاي وحجزت

الثانيه حق آخر يوم قبل الوصول بيوم





عداله الصالون











هذا الكوفي الخاص بالاسبا وطبعا المشاريب بفلوس











وهنيه الاستقبال واستراحة الاسبا وعداله الجيم






بعد ماعطيتهم بطاقتي وورقة الحجز استقبلتني هاي الاموره من الجهه الثانيه






ومشوني صوب غرفتي






هاي غرفتي











وهاي مدلكتي تحييكم






أنا خلصت المساج ورجعت الغرفه وعقب سرت المطعم


البنات لعبوا بولينج وتمشوا وعقب يوني المطعم ع الموعد






عقب رجعت ريحت في الغرفه


وبعدها سرت مكتب الرحلات السياحيه عشان أضبط برنامجنا

وحجزت رحله يديده وسالتهم عن باقي الرحلات اللي حجزتها

قالتلي اذا حجزتوا بالنت فخلاص تذاكركم بتوصلكم الغرفه

عقب حضرنا عرض مسرحي


تقريبا كل يوم شي عرض ويعرض مرتين


واحد يبدأ الساعه 7 ونص والثاني 9 ونص

نحن حضرنا عرض 7 ونص











انطباعي في هاليومين


والمواقف اللي مرينا فيها




1- السفينه جدا آمنه وونيسه

2- خاليه من العرب مثل ماخبرتكم وخاصه الخليجين


ولكن تعرفنا ع موظفين عرب مثل ساره المغربيه اللي خبرتكم عنها

وعثمان بعد مغربي ويبيع عطور،
وهاذيل ساعدونا في بعض الامور جزاهم الله خير

مره صار موقف وساعدني فيه عثمان

مره نسيت بطاقتي في الغرفه وسرت أدور البنات وماحصلتهم وكنت أبا ادخل الغرفه



طبعا كنت أقدر أطلب من الرسبشن بس في هاي الحاله بيغيرون كل البطاقات وانا مابغيت هالشي

قاللي عثمان خلي اللي ينظفون يفتحولج الباب


وفعلا سرت وكلمت عامل النظافه وفتحلي أصلا هم حافظينا

3- الموظفين جدا حبوبين ومتعاونين وكانوا يعاملونا معامله خاصه


واغلبهم مسلمين ومن الجاليه الاسيويه

موقف

مره من المرات لما بناتي دخلوا المطعم راحلهم الموظف وقالهم


امكم يالسه هناك


ويابهم عندي هههههههههه

4- أسعار بضاعاتهم في السفينه وخصوصا من الماركات العالميه جدا رخيصه


وعندهم عروض وخصومات وخصوصا العطور

مثلا

اشتريت عطر من عندهم أنا كنت شارتنه قبل بـ 100 يورو وعن طريقهم حصلته بـ 70 وشويه


وخذينا أغلب عطورتنا من السفينه ، طبعا مب كل شي متوفر



من العطورات اللي نبها واغلبها عطورات قديمه

5- الاكل متنوع ولذيذ ومافي يوع بس فيه متن هههههههههه

6- ارجع واقول كل شي منظم ومرتب ومحد يضيع فيها

7- الرسبشن مفتوح 24 ساعه لأي استفسار

8- احجزوا كل رحلاتكم مع القروب


خصوصا في جانب النرويج الافضل مع القروب واصلا أكثر متعه

9- العروض المسرحيه تجنن لاتفوتنها ابدا وهاي مجانيه

10- مافي خوف من اللي يلعبون قمار أو يشربون كل شي عليه ضوابط


والسفينه محروسه من جيش الموظفين اللي فيها

والصراحه ماقابلنا أي موقف منهم ولاشفنا شي يخوف



11- السفينه مناسبه لكل الاعمار وحتى للمعاقين

12-مشكله كبيره ماتوقعناها

في هاليوم حطولنا تذاكر مال الرحله اللي حجزتها من عندهم

أما باقي الرحلات اللي حجزناها بالنت مموجوده

لما راجعيتهم مره ثانيه اكتشفت انه الرحلات اللي حجزها بوعيسى مموجوده عندهم

وقتها ما عرفت شو السبب


وحاولت اتدارك المشكله وتميت أحجز الرحلات حق باقي الايام

ولكن فيه رحلتين ماحصلتهم ووحده اعتبرها من أهم الرحلات

كيف حليت هاي المشكله بخبركم عنها في الجزء الياي



تابعوني في الجزء 5
واليوم الثالث ووصولنا لأول منطقه في النرويج


16 / 11 / 2015, 34 : 02 PM
رقم المشاركة :  30 
مسافر جديد



الملف الشخصي
تاريخ التسجيل : 16 / 11 / 2015
رقم العضوية : 114135
الإقامة : المدينه المنورة
المشاركات : 2
الجنس : ذكر
الحالة : على خطى العرب غير متواجد حالياً
موافق رد: مغامراتي البحريه ع كروز MSC للأراضي النرويجيه

السلام عليكم ورحمة الله تقرير جميل. جميل جميل جداً أهنئك على ذوقك ومغامراتك الجميله وإنشاء الله ونترقب منك المغامرات القادمة وانت والجميع بصحه وعافيه
إضافة رد

المواضيع المتشابهه
الموضوع كاتب الموضوع المنتدى الردود آخر مشاركة
[تقرير مصور ] رحلة فردية للأراضي الامريكية ... Tamem زاد المسافر الى الولايات المتحدة الامريكية 67 20 / 12 / 2015 28 : 11 PM
رحلتي للأراضي الإيطالية abeer27 زاد المسافر الى ايـطـالـيـا 32 26 / 07 / 2015 11 : 12 AM
[تقرير مصور ] إحدى مغامراتي في السفر إلى أمريكا ناظم زاد المسافر الى الولايات المتحدة الامريكية 33 27 / 11 / 2007 15 : 12 PM
إحدى مغامراتي في السفر إلى أمريكا ناظم زاد المسافر الى الولايات المتحدة الامريكية 33 27 / 11 / 2007 15 : 12 PM


المواضيع ، تعبر عن رأي كاتبها ويتحمل مسؤوليتها فقط ، ولا تعبر بالضرورة عن رأي شبكة ومنتديات زاد المسافر .