السلام عليكم ورحمة الله وبركاته
طابت اوقاتكم بكل خير ..,
كثير من مرتادي دول إوروبا يعانو من نصب وإحتيال شركات تـأجير السيارات بشكل عام ..,
فـ عند عودتنا إلى أرض الوطن نتفاجئ بخصومات مالية من الفيزا او الحساب الجاري بدون وجه حق ونتفاجئ أيضا برسايل على البريد بوجود مخالفات مرورية وبعضها تكون بـ أسعار فلكية
نحن نجهل قوانين الطرق او نتجاهلها احيانا .., لكن ماتقوم به شركات التأجير ماهو إلا نصب وإحتيال لدرجة أن البنك الخاص فيك لايستطيع حل مشكلتك فيجعلك في حيرة من أمرك !!
انا من عشاق دول الشنقن واقوم بزيارتها مرارا وتكرارا ..,
وللأمانه زيارة لدول اوروبا بدون م تستأجر سيارة احسها م تنفع كون انو اغلب الدول قريبه من بعض ...,
انا من زمان كنت اتعامل مع شركة sixt car وسبق واستأجرت سيارات من عندهم سواء كان عن طريق الإنترنت او عن طريق المكتب ..,
وكان تعاملهم جدا راقي وسريع ويلبو متطلباتك قد م يقدرو ( رغم انو احيانا مبلغ الوديعة يكون كبير جدا ) لكن بمجرد م تسلم السيارة يردو لك المبلغ ..,
آخر رحلة لي في اوروبا كانت اواخر شهر مارس وبداية آبريل 2017 .,
واستأجرت سيارة من sixt car في سويسرا وإيطاليا..,
طول الرحلة م اخذت إلى مخالفة واحدة بس اللي هيا وقوف خاطئ في روما لقيتها على قزاز السيارة ., قيمتها 30 يورو
ولما رجعت إلى جدة وبعدها بكم يوم فكو الحجب عن مبلغ الوديعه واستغربت م خصمو قيمة المخالفة ., وانتظرتهم يخصمو لكن م خصمو المبلغ
بعدها بكم اسبوع اتفاجئ برسايلهم على ايميلي افادو انو عندي مخالفات في سويسرا وفي ايطاليا ..,
في البداية تجاهلتهم وبعدها بكم شهر صار عدد المخالفات بيزيد؟؟ ويدوني تاريخ محدد اسدد فيه واكتشفت انو اغلب المخالفات كان تجاوز السرعة القانونية بمقدار بسيط فقط ., وبنفس الوقت كانو يضيفو رسوم إدارية
طلبت منهم يرسلو لي ايميل الشرطة الإيطالية والسويسرية عشان اتواصل معاهم واتأكد., لكن تجاهلوني ويردو انو إذا م سددت راح يوكلو محامي وبعدها المبلغ بيزيد عليا
إللي مستغرب منه انو المخالفة اللي متأكد منها تبع الوقوف الخاطئ م جاتني ؟!! وقامت تنهال عليا مخالفات م ادري من فين رغم اني اتقيد جدا بالانظمة المرورية
والآن يطالبوني بمبلغ 271 يورو في ايطاليا
ومبلغ 160 فرنك في سويسرا
يكرهوك في اوروبا
الموضوع له تقريبا 8 اشهر وقبل 4 ايام ارسلو لي وقالو انو عندك مخالفة جديدة بس ننتظرها تجينا من الشرطة؟؟
معقوله بعد 8 شهور يطلعو عليا مخالفة جديدة ., مدري اضحك ولا ابكي ؟
وبشوف نفس المشكلة هذي بتواجه كثير من مرتادي اوروبا
مع العلم اني الاسبوع الجاي ان شاء الله مسافر على المانيا ..,
هل من الممكن يستوقفوني بالمطار؟
او وضعي في البلاك ليست لشركات التأجير ., لأنو ضروري لازم استأجر سيارة
برأيكم ايش الحل معاهم؟
اللي سبق وصارت له مثل ذي المشاكل يكتبها تحت وخلونا نستفيد من ذا الموضوع ويكون مرجع لنا إن شاء الله
