السلام عليكم ورحمة الله وبركاته

سبق وكتبت عن رحلتي الاولى للنمسا في عدة منتديات واعيدها هنا للفائدة

واستعادة للذكريات الحلوة .


حجزي كان على امسترادم لاني كنت ناوي اجلس فيها بالعوده كم يوم لكن ماكتب الله هالشي وصلت لامستردام وبدلت طياره وبعدين على فينا نزلت لفينا ما فيه جوازات ولا شي دخلت سيده من الطياره للشارع واخذت تاكسي من المطار الى فندق الماريوت بحوالي ثلاثين يورو واغلب سكان الفندق من السعوديه وفينا مدينه راقيه جدا واهلها محترمين والنقاب عادي بفينا كل الشوارع تقابل فيه السعوديين والسعوديات بعبايتهن ولاحظت كثرة المصريين فيها واكثرسواقين التكاسي مصريين مدرسين وبالصيف يكدون تكاسي فيه نظرات من بعض الناس وخصوصا الاطفال للعبايات لكن عادي جدا طنش .
أهم الاماكن بفينا :
1- قصر شمبرون :قصر كبير لملك وفيها حدائق وغابات خياليه تدخل من سور القصر مجانا وتتجول في ساحاته وحدائقه لكن نفس القصر بفلوس وما انصح احد يدخل له لان اغلبه اصنام وخرابيط مالها داعي عليك بالحدائق والنوافير اللي ورا القصر وفيه عربات تجرها الخيول بس غاليه اركب بالعربه الكبيره سعرها حلو 8 يورو أوفر من الصغيره ب30يورو وجزء من غابات القصر يوجد حديقة حيوانات الله يكرمكم لكنها عاديه الدخول بما يعادل 130 ريال وصغيره ما فيها زود .
2- براتر: مدينة الملاهي وهي عباره عن ملاهي صغيره لكنهم مكبرينا بالشوارع ومباعدين بين الالعاب حتى تكون كبيره .
3- برج فينا منه تشوف فينا اسمه (دون ناوبارك )

4- سي قروتي : وهي عباره عن مغاره مثل هيت اللي بالرياض كان هتلر يصنع فيها الطيارات ايام الحرب العالميه الثانيه وما احد يدري عنه وهي بارده جدا لدرجة انهم يأجرون بطانيات احجامم صغيره تلفها على جسمك عن البرد .
5-حديقة لكسمبورج : هذي احسن مكان بفينا تستاهل يوم كامل حديقه كبيره جدا تحس بجو الادغال والاشجار الكبيره
وبوسطها بحيره مليانه بط وبجع وانواع الطيور وتقدر تستاجر قارب مشحون على الكهرب او قارب يدوي وتتمشى بالبحيره وتطعم الطيور.
6- شارع الكارتنر : شارع تسوق طويل ومهوب صاحي واغلب المحلات مسويه تخفيضات وبضاعته افضل شي

وفيه ناس تسوي استعراضات يعني شحاذه بادب
7- شارع ماريا هلفر قريب من الكارتنر

8- مدينة التسوق الشوبنق سيتي :مبنى من دورين كبير جدا والله يسر لي طريقه اروح له وارجع بسعر خيالي بس 15 ريال لان التاكسي لو يوديك بيطق 400 ريال بالراحه لانه برا فينا الطريقه كالتالي تسأل عن الاوبرا وهي في بداية شارع الكارتنر مقابلها مكتب الخطوط المصريه والسوريه اقطع الشارع واجلس عند مكتب الخطوط كل ساعه يجي باص من مدينة التسوق خاص بشركة ايكيا ومكتوب عليه ايكيا دعايه لون ازرق اركب معه يوديك مجانا وللعوده اول ما توصل اطلع للدور الاول واسأل اي موظف ايكيا عن تذكرة العوده ياشر لك على الكونتر اللي يبيعها قيمة التذكره يورو وربع والاطفال مجانا .

بالنسبه للمواصلات المترو
والمترو بفينا سهل جدا انا ما اعندي لغه والحمد لله مشيت اموري

.اشتريت تذكرة لمدة اربع وعشرين ساعه قيمتها خمسه يورو
بس ترا الشرطه عندهم يسوون تفتيش عند المترو احيانا يسألون عن التذكره

اول ما توصل الفندق اطلب الخريطه وبتلاقي فيها خريطة المترو وخطوط المترو اربعة الوان ازرق واحمر وبر تقالي واسود وكل خط له اسم يعني الاحمر اسمه U1وهكذا .
عند الفندق يجون المصريين ويعطونك كروتهم يودونك رحلات وتمشي لكن لاتروح معهم داخل البلد مثل البرج والملاهي والشمبرون ونهر الدانوب ورح معهم للاماكن اللي برا فينا مثلا السي قروتي يقولك ب80 يورو يوديك واذا شديت معه نزل للسبعين والسعر المعقول 60 يورو مثلا انا اخذت تاكسي مصري والله انه حبوب وداني للسفاره اسجل الجواز والسي قروتي وحديقة لكسمبورج وجالس ينتظرني لاطعه عند الحديقه بس بـ98 يورو لان ستين سي قروتي و12 للسفاره لان مبناهم الجديد بعيد نوعا ما عن وسط البلد و25 للحديقه وهذا هو المشوار الوحيد اللي ركبت فيه تاكسي غير المطار
بالنسبه للبرامج السياحيه القروبات غاليه نوعا ما .
وامر مهم جدا اذا وصلت للفندق حط بطاقتك الصراف بالسيفتي بوكس وخل معاك الفيزا عشان لو ضاعت محفظتك لا قدر الله يصير عندك سبير مجرد وجهة نظر شي ثاني خذ معك كاش لان بعض المحلات ما يحاسبون بالفيزا .
المساجد بفينا كثيره والنهار طويل جدا يمديك تروح لاي مشوار ببالك .

هذا عن فيننا باختصار :
الحجز بالقطار الى سالزبرج سهل لان كل نصف ساعه رحله والطريق روعه صوره خياليه سبحان الله العظيم
سكنت بفدق ريسانس موقعه حلو لانه خطوات عن محطة القطار وجمبه مسجد جامع ومقهى انترنت بس الفندق للاسف خايس غرفه ولا بريال لكن المثل يقول كل دقه بتعلمومه ......
سالزبورج مدينه صغيره هاديه وحلوه ولاحظت ان شبابها مثل شبابنا بالسيارات يطيحون ويغيرون ملامح السيارات والنقاب فيها عادي جدا بس بعض القروبات اللي تجي لسالزبرج تحس بنظراتهم بس عادي ما عليك منهم المشي حلو حلو وممتع بسالزبرج صحيح الجو مشمس اغلب الاوقات لكن الاشجار كبيره امش بظلالها البلد القديم فيه شارع تسوق حلو والجلوس على النهر ممتع جدا وفي سالزبرج تاجير سياكل تلقى بمحطة القطار وعند البلده القديمه والايجار يبدا من ساعه الى شهرواسعارهم معقوله

القلعه اللي اعلى سالزبرج توصل لها من السوق والتاكسي لن تحتاجه في سالزبرج ابدا
يوجد حيقه فيها انواع الورود وتنسيقها حلو عند فندق كراون بلازا وتقدر تروح لميونخ من سالزبرج وترجع بنفس اليوم بس لاتنسى جوازك خله معك لانه قبل توصل ميونخ يفتشون الشرطه عن الجوازات .

هذا باختصار جدا .

بالنسبه للمواد الغذائيه انصح ان الواحد ياخذ معه اكله من هنا اوفر له واذا بغيت تشتري كوكا وماء انتبه تشتري من الاكشاك لانها غاليه جدا اسأل عن سوبر ماركت كبير تلقا كل شي سعره معقول ولاتنسى تطلب ريسيت من كل محل تشتري منه وتسوي استرداد للضرائب .

اشهر محلات التسوق بالنمسا وميونخ C&Aومحلات H M اسعارهم حلوه وبضاعتهم ممتازه

واذا تبي اجر الدنيا والاخره خذ معك مصاحف او كتيبات دينيه وحطها بالمساجد اللي تصلي بها خصوصا المسجد اللي بسالزبرج صليت فيه الجمعه عدد المصاحف فيه قليل جدا .
وانصح بعد ان تاخذ معك شنطه كبيره فاضيه عشان تحط فيها مشترواتك وما تتوهق.

اتمنى اكون افدتكم بهذا الموجز والسلام

ما أجمل ذكرياتك الحلوه
عيشتنا بجو النمساء الساحره
شكرا لقلمك ولجودك

ذكريات جميلة من خبير في ميدان السفر والسياحة
سلمت يمينك يأبو عبد العزيز

عيشتمونا معكم هذه اللحظات الجميلة في اكثر من نادي
واهنيكم على معرفة المدينة بحذافيرها منذ زيارتكم لها لأول مرة
في حين ان رحلتي الاولى للنمسا ( 2002) اقتصرت على الساحة وشارع ماريا هفر والنهر

وأنا اتصفح موضوعكم ارجعت لي شعور الرحلة الاولى في حياتي والتي لها ذكرى وطعم خاص
ادركت حينها كم فاتني الكثير !
تحياتي لكم

ذكريات حلوة وبالعيد احلى
شكرا لك اخي

Ao لك اسلوب جميل في السرد ياليت تاخذ لك لفه على باقي اورباء وتعطينا من قصصك الممتعه .......ننتظر منك المزيد وياليت اذا عندك معلومات عن دول اوربيه اخرى ماتبخل علينا

الله يحلي ايامك ويبارك فيك


الله يسلمك يابو عبدالله وشهادة اعتز بها منك لاعدمناك


[/size]الغالي والحبيب عمدتنا في اوروبا ابو مشاري

الله لايحرمنا منكم ومن تشجيعكم لنا فانتم من انرتم لنا الطريق الى اوروبا

وتمر الايام وتبقى الذكريات الحلوة



العفو اخي الزلزال شاكر تشريفك



اخي القادم شاكر لك تشريفك وتشجيعك

وابشر باللي عندي كله ان شاء الله

بيض الله وجهك على هالإيجاز لكن الواحد يطمع بالمعلومات و الصور اذا عندك

يخليك ربي

ووجهك ابيض يابو خالد

ولو فيه صور ما تأخرت فيها طال عمرك