السلام عليكم جميعا
هاذي اول مشاركه لي عندكم في هاذا المنتدى الطيب , و طبعا كنت بس متفرج و متصفح من بعيد فحبيت ابدا و افيد الناس نفس ما افادوني خلال السنوات الماضيه . . و ان شاء الله اذا في اي تعليقات او نصايح لتحسين كتابتي , لا تبخلو علي و افيدوني افادكم الله.
بكتب اليوم عن رحله قصيرة قمت فيها في نهايه ابريل لكندا و تحديدا تورنتو , الرحله كانت عبارة عن 5 ايام فقط و كان كل شي فالرحله من التنظيم و شراء التكتات و الحجوزات صار قبلها بيوم واحد . لان الهذف من الرحله كان تفعيل الاقامه الدائمه فقط وليس الاستجمام .
الاسعار
الحمدلله مع ان الحجوزات كانت حق اخر لحظات بس ماكانت مؤذيه للمحفظه لهاذيك الدرجه , اولا الطيرن كان مع الاتحاد و كلف حوالي 4200 درهم طبعا مباشر .
ثانيا السكن , طبعا انا دايما فسفراتي احب اسكن في هوستيل لانو اكيد ارخص و بعدين احب اتعرف و اسولف مع ناس غريبه و اطلع منها بقصص و مغامرات حلوه ,
hi toronto hostel و كلفني تقريبا 300 درهم ل 3 ليالي
the clearance park وكلف 280 ل2 ليله
طبعا ما حجزت المده كلها فنفس المكان لان اولا ما حصلت حجز و ثانيا حبيت انوع المكان , الهوستل الاول كان فنص الداونتاون و وايد حلو من خدمات و جو و وجود مصعد على عكس الهوستل الثاني .
التنقل
المدينه جميله جدا ومع الجو البارد ( كان تقريبا 9-10 درجه) المشي مافي احسن منه , ساعتين و تكون مشيت اغلب الداونتاون بس اذا كان عندي مشوار ابعد شوي منت اخذ اوبر (في خدمه اسمها اوبر مشاركه و تكون ارخص وهي عباره عن 3 اشخاص يتشاركون السياره معك),
طبعا المواصلات العامه على اعلى درجه بس ماجرتها للاسف , في الباصات , المترو , عربه الشارع و باخرة..... , فيه بطاقه تقدر تشتريها و تكون لعده ايام بس انا فضلت المشي احسن علشان نحرق الاكل و الحلويات اللي ما قصرنا فيها.
تفاصيل الرحله
اليوم 1
طبعا وصلت المطار الكندي و ختمت و عبيت اوراق الهجرة المطلوبه , الموضوع كله ماخذ 10 دقايق, اخذت اوبر على طول (انصكم تاخون مترو المطار لانو يكلف اقل بكثير و سريع و وايد نظيف بس انا كنت تعبان و مالي خلق) .
المهم وصلت الهوستل عالعصر تقريبا و ماكان في وقت اسوي اي شي و نفس ماقلت اول انو الرحله كانت في اخر لحظه و بدون تخطيط مسبق.
نزلت و حولت امشي شوي و اخذ نظره , جو روعه طبعا , رحت اخذت اغراض من السوبر ماركت .
حولت الفلوس فالمول , كنت ماخذ دولار امريكي و حولته لكندي هناك.
اليوم 2
اليوم اللي بعده قمت و مشيت فالداونتون , طبعا تقدر تلاحظ ان المدينه تشبه نيويورك بس اكثر نظافه و الناس مهذبين اكثر .
طبعا تم هورتن طعمه غير فتورنتو .
طبعا انا قاعد امشي و لا عندي اي مخطط , ماشي على بركه الله , و وصلت لعند البرج ( يعتبر معلم سياحي للمدينه و في مصعد يطلعك لفوق علشان تشوف منظر المدينه من فوق ) انا ما جربته الصراحه م احسيته شي جديد يعني .
الى جانب المدينه حصلت ملعب البسبول المشهور
rogers centre
و بالصدفه سالت واحد فالكاشير و قالي في مباراة اليوم بعد ساعتين , قلت خلني اجرب و اشوف ( طبع انا مالي فالبيسبول و لاعرف اي شي عن اللعبه بس استمعت وايييد و كان القيم حماس وتشجيع الناس يخليك تدخل فالاجواء بسرعه ) و دفعت تقريبا 130 درهم حق التكت.
رحت تغديت في محل بيتزا مشهور عندهم قريب من الملعب اسمه
Boston pizza
البيتزا و الاجواء الرياضيه فالمطعم كانت طيبه جدا.
بعدها رديت السكن و ريحت شوي ,,و انا اقول فنفسي خلني اشيك اذا عندهم فريق سله بعد ؟؟؟
و على حظي طلع فريقهم مشهور و بنافس النهائيات و كان اول مبارة فالنهائيات بتصير اليله
فقلت يلا خلنا نحجز , للاسف بما انا الوقت كان متاخر كان التكت غالي ( حوالي 500 درهم ) بس توكلت و حجزت لان كان نفسي دايما تحضر مبارة كره سله امريكيه
معلومه سريعه : نادي تورونتو للسله مشارك في رابطه السله الامريكيه
NBA
المهم و احرك وقت المباراه للملعب و اقولكم الزحمه المتواجدة برع الملعب !!! شي غير طبيعي... كبار صغار عجايز كافه الالوان و الاطياف , و الاحلى من هاذا الاجواء الحماسيه داخل الملعب و التشجيع شي خارج عن المالوف ..ياجماعه انا م اعرف القوانين و صرت اشجع و اصيح عالحكم .. اندمجت بشكل عفوي..
الصراحه انصح اي واحد يزور المدينه انو يحضر مباراة سله لانها تجربه ولا فالاحلام .
المهم الفريق فاز وهم الحين فالمباراة النهائيه ..بركاتي
)))
اليوم 3
في هاذا اليوم قررت الصبح اني احجز رحله الي شللات نياجرا الغنيه عن التعريف...كان في رحله من الهوستل تطلع شامله المواصلات ب تقريبا 200 درهم.
\
مكان التلاقي كان 5 دقايق من السكن و جاء الباص و اخذنا ( طبعا كان خلاص السايق محرك و انا جاي ركظ لانو تاخرت و كنت مغلط فالعنوان اوف)
المهم الطريق حلوه(حوال ساعتين من تورنتو قريبه من حدود نيويورك) و المناظر الطبيعيه كانت خلابه و طبعا السايق كان جدا ظريف و ينكت و كانت معلوماته قيمه جدا, تكلم عن تاريخ كندا وال شلالات و دخل فالسياسه والريضه والاقتصاد ما شاءالله نشره اخبار.
وصلنا الشلالات قعدنا 20 دقيقه , شربنا كوفي بعدين السايق اقترحلي جوله بالهلوكبتر فوق الشلالات و انا كان نفسي دايما اجرب الهيلوكبتر و كان سعرها طيب ( حوالي 300 درهم )
مكان الهيلوكبتر كان حوالي 10 دقايق من الشلالات .
خلصنا الجوله وعالطريق كان في مشوار ثاني ضمن الحمله وهو زياره مدينه نياجرا الصغيرة .. مافي شي فقط مطاعم و محلات هدايا
النقطه الاخيرة ضمن الجوله كان زياره مزرعه النبيذ اللي كندا مشهورة فيه و في تصديره , طبعا انا سحبت عليهم و استنيت فالباص.خلصنا و رجعنا للمدينه ( فالطريق خرب الباص فطولنا زياده )
وكملت بقيه الليله اتمشى فالمدينه و اشوف محلاتها , جربت مطعم جميل ياباني اسمه
Taiyaki NYC
يبيع ايس كريم و كيك باشكال مميزه و مبدعه
اليوم 4
اليوم هاذا قررت اني ازور جزيره تورونتو اللي هي تبعد 10 دقايق بالعبارة
اول لازم تروح ال
Queen Quay terminal
و تقص تذكرة عبور ,, الصراحه نسيت التكلفه بس كانت شي زهيد يعني لا يذكر
الجزيره طبعا صغيرة جدا و ما فيها شي .. بس هي حلوه حق التمشى وومارسه الرياضه و ركوب الدراجه.. لفيت فيها ساعتين تقربيبا و تغديت هناك ( فيها مطعمين فقط).ر
رجعن بعدها اللي السكن و انا هناك ماكان عندي اي هدف او مكان اروحله .. فسمعت بنات يتكلمون عن مطاعم و كافيات حلوة و قررت اني اجرب ... اخذت اوبر لهناك ( 20درهم تقريبا ) و زرت الكافيه هاذا اسمه
poop cafe
بييع حلويات و قهوه بس ب قالب غريب شوي... طبعا الاكل مب لهناك الصراحه..الناس تزوره بس علشان الطابع الغريب .
اليوم 5
اليوم قبل الاخير , طبعا على نفس منوال الرحله كلها , كان بدون هدف و بس من كلا الناس اللي شفتهم فالسكن..نصحوني اني ازور احياء تورنتو المتعدده الثقافات ( فيها هنود و صينين باعداد كبيرة جدا)
زرت الحي الصيني و حي جرافيتي الشوارع , الي هو عبارة عن زقازيق مليانه رسومات و جرافيتي ,, عجبتني وايد
زرت مطعم سمعت عنه انصح الجميع يجربه اسمه
Crepe T.O.
مشهور ببيع الكريب بنكهات كثيره و لذيذه ,,اما تحليه او حتى وجبه عاديه .. جربت الكريب بالبيض و التركي مع الجبنه,,روعه
بعدين منها زرت جامعه تورنتو العريقه ( الاولى فكندا وال 21 عالعالم ) و المتحف الوطني جنبها
national history musuem
يضم تاريخ البشريه و الحضارات العريقه وكل الامور اللي تتعلق بالطبيعه و مخلوقاتها و نشاه الكون
الدخول تقريبا 100 درهم
و بعدها فالليل طبعا بعد صدمه و حماس اجواء مبارة السله قررت احضرمباراه مرة ثانيه !! بس خسرو للاسف هاذي المرة ( مش كل يوم عيد)
اليوم 6
اليوم الاخير كان كله للتبضع و تضييع وقت فالتمشي حوالين الداونتاون , في عندهم ساحه مشهورة نفس التايم سكوير اسمها
yonge-Dundas square
فيها مول و محلات و سينما ( دخلت شفت افينجرز اليديد)
و بعدها اخذتلي كوفي ( صوره الكوفي).. و تحركت للمطار ولكن هاذي المرة اخذت القطار السريع
UP express
نص ساعه تقريبا وانت فالمطار
اول تروح للمحطه الرئيسيه
‘union station
واما تقص التذكرة من الكشك او اونلاين او التطبيق (حوالي 35 درهم اتجاه واحد فقط)
الى هنا نصل لنهايه هاذي الرحله القصيرة العشوائيه و اتمنى انها عجبتكم و افادتكم , اذا عنكم اي اقتراحات او تحسينات اقدر اضيفها فالرحلات القادمه , ياليت تكتبوها تحت و شكرا على مروركم
و انشاءالله اذا اتشجعت و ماكسلت بكمل و ابنزل رحله النرويج اللي كانت قبل شهرين ( ان شاءالله ما تخيبني الذاكرة في تذكر التفاصيل )
