إضافة رد
18 / 07 / 2019, 54 : 09 AM
رقم المشاركة :  1 
مسافر جديد



الملف الشخصي
تاريخ التسجيل : 26 / 06 / 2011
رقم العضوية : 28755
الإقامة : السعوديه
المشاركات : 95
الجنس : ذكر
الحالة : خلف الستار غير متواجد حالياً
ملخص تجربتي من وإلى أمستردام

السلام عليكم..

استكمالا لموضوعي حول التقديم على الشنغن من السفارة الهولندية


https://www.travelzad.com/vb/t158052.html

في البداية اوجه شكري وامتناني لهذا المنتدى والاعضاء القائمين علية..لرحابة صدرهم على استفساراتي على حساباتهم في تويتر..

فشكرا لهم جميعا دون استثناء...

اود اني اذكر في تقريري المختصر هذا عن رأيي الشخصي من خلال زيارتي لهولندا وبلجيكا بالاضافة الى ديزني لاند فرنسا..

( اعتذر عن عدم ارفقا صور لكونها كلها خاصة)...فاعذروني..

الرحلة كانت خاصة لي انا وزوجتى الله يحفظها.. للخروج قليلا من ضغوط والتزامات الحياة..

مدة الرحلة من تاريخ 30/06/2019 الى تاريخ 12/07/2019
الرحلة كانت برعاية خطوط الاماراتية.. والتي يشكرون على الاهتمام والخدمات التي قدموها لنا..

مسار الرحلة ..
الرياض/ دبي ( انتظار 3 ساعات) امستردام
امستردام/ دبي ( انتظار ساعة ونص) الرياض

عند وصولنا الى مطار امستردام صباحا.. تم التوجه الى الجوازات..
قدمت الجوازات للموظف مع نسخة من اثبات السكن وتذكرة الطيران..
سألني ( وش عندك جاي لديرتنا)؟
جاوبته ( اجازة وجاي اتمشى)

عطاني ذيك الابتسامه مع ختمك الجواز وقالّي ( استمتع باجازتك عندنا)..

رحت لسير العفش.. واستلمنا الشناط..

بالنسبة للشناط...

نصيحة لاتكثّر ملابس.. تذكر انك رايح تتمشى مو رايح عرض ازياء..
خذ معك الاشياء الضرورية للسفره..


المهم..

مرينا من عند البوابة الخضراء واللي معناها انه معندك شي تبي تصرح عنه في عفشك..

بعد البوابة رحت واخذت لي شريحة نت وهم يسمونها (DATA SIM).. من شركة ليبرا..
10 قيقا تقريبا باربعين يورو.. مع مكالمات مجانية.. وكانت ممتازة جدا..
لكن ما اشتغلت في بلجيكا و فرنسا بسبب قيود  فارضينها على استخدام شرائح النت كما ذكرلي موظف بلجيكي ( ولا اعلم عن صدق كلامه من عدمه)

بعدها توجهنا بالتاكسي الرسمي بمبلغ 52 يورو حسب العداد الى
فندق

Kimpton De Witt Amsterdam

الفندق نظيف ومستوى الامان عالي.. الموظفين جدا متعاونين..
موقعه قريب من ساحة الدام..وقريب من محطة القطار.. تقريبا خمس دقايق مشي.. وبعيد عن الازعاج..
قريب منه كل الخدمات من مطاعم او بقالات او كافيات..او مغسلة ملابس سواء ذاتية او عن طريق موظفين
الفطور متنوع بسيط.. مكان الفطور جدا مريح.. يوجد تكييف بارد..
يمكن يكون سعره عالي شوي لكن هذي قيمته الفنادق اللي قريب ساحة الدام.. كلها مرتفعه..
ما لاحظت اي سلبية قد تكون مؤثره... يمكن الغرف صغيره شوي لكن انا ماعندي اشكاليه معاها..


بعد زيارة استكشافية لشارع الدام مع الساحة  رحت لمكتب سياحي
اسمة tours-tickets

وهذا موقعهم
https://www.tours-tickets.com


 ورتبت معاهم لرحلة لقرى الطواحين في الغد..
قرية زانسي شانس
قرية ماركن
قرية فولندام
عطونا كتيب للعروض المتوفره عندهم ومكان الباص..
كان الموعد الساعه 12 الظهر... في مواقف الباصات السياحية في محطة القطار..
رحنا قبل الموعد بربع ساعه لمكتبهم في محطة القطار ومن هناك اخذتنا المرشدة السياحية للباص.. ومشينا على الوقت..

تمشينا في القرية الاولى والثانية  وشفنا كيف تشتغل الطاحونه وانواعها وبعدين مصنع القبقاب وشرح عنه..
بعد كذا ركبنا القارب وودانا لقرية الصيادين الثالثة وشفنا مصنع الاجبان ومصنع الوافل..
وكان فيه استراحة للاكل.. وتوجهنا بعدها الى متحف عن القرية وتاريخها..
بعد كذا مشينا الى مواقف الباص .. ورجعنا الى محطة القطار حوالى الساعه 6 او 7 ..

الخلاصة.. الجولة حلوة وتستاهل..
يبيلها لياقة زينه لان كلها مشي.. لكن متعه.. وساعدنا ان الاجواء كانت تمااااااااام..


اليوم اللي بعده.. مريت نفس المكتب ( لكن موقع ثاني).. واخذنا تذكرة لكل من

متحف الشمع.. صدق او لا تصدق.. زنزانة امستردام (رعب)..

وكلها حول بعض.. عند ساحة الدام..

متحف الشمع.. جميل جدا.. فيه اماكن للفنانين واماكن لرؤساء دول وملوك.. واماكن لعلماء..
يعني متنوع..
وطلعنا بعده لصدق او لا تصدق..
مكان ظريف فيه اشياء غريبه ..ممتع..

بعدها رحنا لزنزانة امستردام..رعب .. وما عجبنا الوضع ..( يمكن غيرنا تعجبه).. مجرد ذوق لا اكثر..

اليوم اللي بعده اخذنا جوله في القارب على قنوات امستردام المائية..

تقدر تاخذ تذكرة من مكتب سياحي او تروح مباشرة لموقف القوارب وتاخذ تذكرة..

القوارب انواع متعددة .. اللي زجاجي من فوق واللي مع وجبة اكل واللي بدون..
في مكان مقابل محطة القطار.. وفيه مكان ثاني من ساحة الدام مشي ربع ساعه تقريبا..

خلاصة:

امستردام..
مدينة تشوف في جوانبها انواع مختلفة للحياة..
مدينة تحس بنبض الحياة فيها...
تستمتع وانت تمشي في شوارعها.. كل شي تحتاجة قريب منك..
تنوع في كل شي.. الناس.. الاكل.. الخدمات..المواصلات.. ( ماتحتاج سيارة ابدا فيها)
اللي اعجبني فيها انه رغم انتشار محلات بيع الحشيش (كل شي فيه حشيش تلاقي شعارة شجرة المروانا..)
الا انه فيه امن.. وكل شي مراقب بالكاميرات.. واذا انت بعيد عن اماكن الفساد.. فامورك تمام..

من وجهة نظري.. خيار غير مناسب لمن معه اطفال..


كنت حاجز سيارة من شركة سكست.. استلمها من محطة القطار في يوم مغادرتي لامستردام ..متوجه الى

قرية جيثورن..


حجزت شالية

Chalet park Kroondomein Giethoorn

الشالية موقعه ممتاز جدا.. بعد ماتوقف سيارتك في المواقف.. ثالث جسر تروح يسار ويجيك مكتبهم وبعد الشاليهات..
طلب 100 يورو كاش تامين مسترد..
الشالية نظيف والمكان روعه للي يبي الاستجمام.. فيه مكان جلسة على الممشى او تقدر تنقل الجلسة على طرف النهر..
اذا الجو مو بارد.. ما انصح فيه.. لانه مافيه تكييف... مجرد مروحه ارضيه..

فيه بط وعصافير وطيور منتشره... احتسب الاجر وعطهم خبز.. تراهم بسرعه يطيحون الميانه..

انا قعد ارمي لبطّه حتى شبعت.. والصباح ليتها تصايح عند الدريشه..خلاص صارت تمون

بالنسبه لجيثورن..
قرية صغيره جدا.. تعطيك انطباع غريب..
فيها سبحان الله راحة نفسية كبيره وهدوء وسكينة.. تحس بالمرح وانت تمشي بين انهارها.. وعلى جسورها...فرصة كبيره انك تنسى حياة المدن وضغوطها وازعاجها..

القرية بسيطه جدا.. فيها مطاعم وكافيهات واماكن بيع التذكارات..
السوبرماركت هو اللي مشكله.. لانه يبيله مايقل عن 20 دقيقه مشي.. برى القرية شوي..
بس تقدر تأجر سيكل وتروح له..

بالنسبة لتاجير القوارب.. منتشره هناك..تقدر مع مجموعة او بلحالك..

لكن حاول انك تخزّن مكان تأجير القارب بقوقل ماب او اي برنامج انت تستخدمه..
لأنه راح تضيع بين الانهار والجسور.. مثل ماصار لي..ومارجعني لمكان التأجير الا هالبرنامج.. ول كان الين الحين وانا ادور في القرية..

الخلاصة..

جيثورن.. من الفرص الجميلة في الحياة اللي تقدر انك تصفّي ذهنك فيها..
انصح فيها وبقوّه.. وقت الجو يكون براد..

واللي بيروح لاينسى يروح لمطعم اسمه كانال قراند (Canal Grand)
على الطريق المؤدي للسوبرماركت...

يالله.. ياعليهم شوربة.. ودّك تسبح فيها من كثر ماهي لذيذه.. والسباكتّي عندهم روعه... المهم اكله لذيييييذ

طلعنا من جيثورن.. وكانت الوجهه الى مدينة بروج البلجيكية..

في الطريق مرينا ملاهي.. إفتيلينج Efteling  
وقفنا بالمواقف.. ورحنا لشراء تذكرة الدخول..( اذا جاي بسيارتك لازم تشتري تذكرة موقف السياره)
الملاهي كبيره جدا...ومتنوعه.. يبيلها يوم كامل.. فكرتها جديده.. ممتعه للاطفال...
فيه القطار اللي يلف المكان.. تدخل مع الغابة وتتبع الخريطه حتى توصل لمحطة القطار..


بروج...

الله عليها من مدينة.... صراحة عشقتها...

سكنت في فندق
Hotel Navarra Brugge
الفندق نظيف جدا.. ومرتب وهادي.. ديكور الغرفه والسرير مرّة مريح..الفطور عندهم منوّع..
فيه مواقف سيارات بمبلغ يدفع عند الخروج..
وفيه جلسة خلفيه للكوفي شوب تبعهم..
موقع الفندق جدا ممتاز..قريب شوارع المحلات التجاريه ( اقل من دقيقتين مشي) قريب من الساحة الرئيسية لمدينة بروج ( خمس دقايق مشي)..
تقدر تركب الباص السياحي.. وياخذ فيه لفّه على المدينة الاثرية..
تقدر تركب عربة الخيل.. وياخذ فيك
لفة ..
تقدر تركب قارب وياخذ فيك لفّة..
ويعيب القارب انه لازم يمتلي ركاب..الكتف بالكتف.. فما اعجبني الازدحام..

الشوارع المتفرعه مليانه محلات.. مطاعم وكافيها وبيه الكاكاو البلجيكي.. التذكارات.. كل شي..المدينة طابعها اثري.. فيها مباني من القرن الثالث عشر وعلى كلام المرشد السياحي انه اخر بيت بني فيها كان في القرن السادس عشر..
التجوّل  فيها لحد ذاته متعه..قريبه من جنت تقريبا نص ساعه.. اروح لقلعة غرافنستين.. قلعة اثرية وفيها معرض للاثار.. جيده كتجربه جديده..الخلاصة...المدينة تستحق الزيارة...

ديزني لاند- باريس
توجهنا الى فرنسا بغرض استرجاع القليل من ذكريات الطفوله...سكنت في فندق
Vienna House Dream Castle Marne La Vallee
الفندق كبير..مواقف السيارات كبيره ومجانية..الاثاث مره نظيف  والتنظيف على طول شغالين..واللوبي فيه العاب للاطفال..
يبيعون تذاكر ديزني لاند..يوفرون باص الى ديزني لاند كل ربع ساعه تقريبا.. من الساعه عشر صباحا الى الساعه وحده بالليل..
ما اعجبني في الفندق حاجه بس..الفطور مستواه متدني سواء بالطعم او التنوع..قريب من الفندق ( عشر دقايق في السياره) فيه مجمع تجاري كبير ومتنوع.. انصح بزيارته

ديزني لاند... وما ادراك ما ديزني لاند..
اخذنا تذكرة شاملة الاستديو والملاهي..نزلنا من الباص ومرينا على بوابة تفتيش.. بعدين بوابة التذاكر.. واخذنا خريط للمكان.. وهذا شي مهم.. عشان تعرف مسارك وتحدد وجهتك.. فتختصر جهد ووقت..
اخترنا دخول الاستوديو اولدخلنا على المبنى الاول .. عبارة عن مطاعم ومحلات بيع تذكارات وهدايا من منتجات ديزني لاند..
بعد تمشينا في الاستديو ورحنا لجهة القطار تبع الاستديو..تركب وياخذك على موقع شبيه بمواقع التصوير..
وتعيش تجربة انفجار خزان وقود وزلزال ارضي وانهيار سد الماء.. ويمر فيك على بعض السيارات والاجهزة المستخدمه في تصوير برامج ديزني..
بعدها طلعنا ورحنا للملاهي..اول ماتدخل في عرض موسيقي راقص لاغلب شخصيات ديزني... شي يجلب السعاده...
الملاهي كبيره جدا جدا جدا...
فيبيلك لياقه عالية مع صبر وقوة تحمّل..
وقبل ماتقفل الملاهي فيه العرض النهائي عند قصر ديزني..

الخلاصه..لاتروح لديزني لاند الا بوقت البراد.. لأن شمسهم ماترحم أبد..

بروكسل..سكنت في فندق
The Hotel Brussels

الفندق اكثر من روعه...سكنت في الدور 24.. نظافه وهدوء وامان عالي.. واطلالة عليها الكلام
موجود مواقف سيارت بمبلغ..قريب من الفندق محلات تجارية ومجمع تجاري.
.
ربع ساعه مشي الى ساحة قراند...زرنا مجسم الاتوميوم مع حديقة اوروبا المصغره..الخلاصة...بروكسل جميلة لكن يعيبها الاكتضاض السكاني والازدحام..

توجهنا من بروكسل الى امستردام استعداد للعودة الى ارض الوطن...

وصلت الى مواقف شركة سكست القريبه من محطة القطار .. وتم تسليم السيارة وطلبت ارسال المخالصة لي بالايميل.. وفعلا وانا واقف الموظف ارسلها لي بالايميل..بالرغم من اني ماخذ تأمين شامل..

طلعنا مشي الى فندق
art'otel amsterdam, part of Radisson Hotel Group

الفندق مقابل محطة القطار.. وعلى بداية شارع الدام المؤدي لساحة الدام..
تعامل احترافي..امان عالي.. اول فندق في اوروبا اسكنة غرفته حجمها كبير..الفطور عندهم اكثر من روعه..لذيذ..مكان الفطور جميل جدا..انصح فيه وبقوه...
قريب منّه مغسلتين ملابس.. وحده فيها موظف ومكلفهوالثانية خدمه ذاتيه.. يعني انت تجيب ملابسك وتدفع في المكينة الخاصة بالغسالة ةتشغلها.. وبعدين تدفع في مكينة التنشيف وتشيل ملابسك بعد ماتخلص..

خلاصة الكلام...

الحجز من بدري له فوائد كثيره.. من اهمها الحصول على اسعار مناسبة.. وعمل جدول سياحي مناسب..
استخدمت تطبيق وزارة الخارجية لتسجيل جوازات السفر ومسار الرحلة.. تطبيق سهل يشكرون عليه..

السفر..متعه واستجمام.. لاترهق نفسك بمحاولة زيارة كل الاماكن اللي ذكرها الاخوان في مواقع التواصل.. اختر مايناسبك..
السهر عدو المتعه.. النوم بدري وتصحى بدري لها لذة كبيره ومتعه من متع السفر
لا ترهق نفسك بكثرة الشناط...او ازدحام الملابس..
لا تفوت فرصة الاستمتاع بالمناظر او الطبيعه بسبب تصوير ( سناب شات) او غيره.. اهم ماعليك تخليد ذكرى لك انت للزيارة..
حسن الخلق واحترام القوانين مطلوب..فاتبعهم دائما..
تذكر انك رايح تستمتع في سفرك..ابعد نفسك عن مواطن الشبهه..
ماعليك من لبس او فعل غيرك..

المطار.. لازم تروح قبل اقلاع الرحلة بثلاث ساعات..لازدحام المطار..وطوابير المسافرين..

تعمدت عدم ذكر اي اسعار.. لان الصرفية تعتمد على كل شخص.. لكن في المجمل.. هولند اغلى بقليل من المانيا والنمسا..


اول مرة في حياتك اكتب تقرير.. فالمعذرة على الاخطاء..
20 / 07 / 2019, 15 : 07 PM
رقم المشاركة :  2 
{ مــؤســس }



الملف الشخصي
تاريخ التسجيل : 23 / 06 / 2007
رقم العضوية : 13
الإقامة : زاد المسافر
المشاركات : 9,463
التقارير : 8
الجنس : ذكر
الحالة : KABAYAN غير متواجد حالياً

استمتعت معك بما خطه قلمك و كنت اتمنى لو حطيت صور تعطي اكتمالا للموضوع
21 / 07 / 2019, 51 : 02 PM
رقم المشاركة :  3 
مسافر جديد



الملف الشخصي
تاريخ التسجيل : 26 / 06 / 2011
رقم العضوية : 28755
الإقامة : السعوديه
المشاركات : 95
الجنس : ذكر
الحالة : خلف الستار غير متواجد حالياً

اقتباس: المشاركة الأصلية كتبت بواسطة KABAYAN
استمتعت معك بما خطه قلمك و كنت اتمنى لو حطيت صور تعطي اكتمالا للموضوع
لي الشرف على هالاشادة منك..

السبب في عدم ارفاق صور.. هي زي ماذكرت انها خاصة..

كان التركيز على الاستمتاع قدر الامكان.. بعيد عن الانشغال بالتوثيق..
إضافة رد

المواضيع المتشابهه
الموضوع كاتب الموضوع المنتدى الردود آخر مشاركة
شباب كم سعر التوصيل من وإلى المطار في التكسي ! N3ESAWY بوابة الأسـتـفسارات عن تـركـيـا 5 25 / 08 / 2016 50 : 08 PM
ملخص تجربتي بالسفارة الألمانية بتاريخ 5-2-2015 bnd بوابة تأشيرات دول الشنغن 26 03 / 05 / 2015 38 : 04 PM
[ استفسار ] عن حجز القطار من وإلى لندن ام و اب بوابة الأسـتـفسارات عن المملكة المتحدة 3 31 / 05 / 2012 13 : 11 PM
برنامجي إلى الخبراء وإلى الجميع foriyu بوابة الأسـتـفسارات عن تـركـيـا 6 25 / 08 / 2011 29 : 11 AM


المواضيع ، تعبر عن رأي كاتبها ويتحمل مسؤوليتها فقط ، ولا تعبر بالضرورة عن رأي شبكة ومنتديات زاد المسافر .