هالمنتدى عزيز علي ومهم في حياتي ورحلاتي

بالبدايه انا حبيت اكتب هالموضوع لان لما نويت اروح اليكانتي ابدا مالقيت شي مفيد ويساعدني فرحت على عماي وتعبت وانا احاول افهم الديره اللي انا فيها خاصه ان معاي امي وجدتي كبار بالسن مايتحملون الحوسه وان بنقعد فيها مده لان رحلتنا علاج
 
تحملوني اول مره اكتب تقرير

المهم 

الطيران القطريه
الرحله كانت كويت - دوحه - برشلونه - اليكانتي ( مافي دايركت الى اليكانتي والقطريه كانت من افضل الخيارات المطروحه)
رحلتنا كانت بتاريخ 15\6\2019

اليكانتي منطقه ملمومه يعني مو كبيره والناس فيها جدا خدومين ويحبون يساعدونك مو مثل الاوربيين وامنه جدا وغير ان المنطقه تلقاهم عوايل يعني اكثر من جيل لازالو مع بعض الابو مع زوجته وعياله وامه وابوه ومرات جده بعد والشوارع تظل حيه والناس يسهرون للساعه 12 و وحده الفجر وعوايل مو ان شباب و صياعه لا
وجزارين حلال بكل مكان يشتغلون فيهم جزائريين 

الوقت اللي وصلنا فيها اليكانتي كان عندهم احتفالات و الختام احتفال النار عندهم ان النور انتصر على الظلام فطول الليل تلقاهم عالبحر مشغلين النيران على طول الشاطئ والمطاعم على الرصيف بكل مكان شوايات سواء شوي بحري او لحم او تكرمون خنازير 
الجو مقبول نص يونيو بس بداية يوليو حاره توصل 33 الي 37 درجة الحراره

لما تنوي تسكن انصح وبشده تكون بالسنتر عالبحر او قريب من محطة القطار لان المنطقه اللي فيها القطار منطقه حيه كلها اسواق ومحلات نفس السنتر 

المواصلات جدا جدا سهله اذا انتم شخصيين بس انصح باستخدام الباص جدا دقيق بوقته وكل مكان يوصلك وعند محطات الباص تلقى شاشه تعلمك متى راح يوصل الباص الباصات لها ارقام كل رقم له مسار 
انا كنت استخدم قوقل ماب احط وجهتي واختار علامة الباص فوق ف قوقل ماب يعطيني اي محطه لازم انطر واي رقم باص اركب طبعا تكلفة الباص يورو و 45 سنت وفي بطاقات خاصه للباص لمدة اسبوع لكن اذا انتم اكثر من شخص مثلا اربعه التاكسي افضل لان اطول مشوار في اليكانتي ياخذ 8 يورو يعني اذا مجموعه التكسي افضل التاكسي يشيل بس اربع اشخاص اللي اكثر لازم طلب واغلى بخمسه يورو بس
التكاسي عندهم نظام كلهم يتبعون شركه وحده اسمها سنتروا تاكسي في طريقتين لهم ياان تتصل على البداله وتطلب تكسي وتعطيه العنوان واسمك او توقف عند لوحه مكتوب عليها تكسي بكل مكان موجوده وهالوحه للتكاسي بس يشوفون احد واقف عندها يوقفون له 

المنطقه مافيها شي ابدا ابدا يوم تفرها كلها وتقدر تروح بندروم فيها ملاهي للامانه مارحت لها بس يقولون حليوه تبعد نص ساعه عن اليكانتي وفي اكثر من طريقه عن طريق الباص او القطار او بالتاكسي او تحجز سياره وبالنسبه لي اذا عددكم 4 او 5 تحجز سياره يوم واحد واذا عددكم اكثر تاخذون القطار جدا سهل وممتع 

مدريد تبعد بالقطار ساعتين ونص وتجربتي للقطار كانت ممتعه واريح من الطيران بوجهة نظري ولا حسينا بالوقت قطارهم حلو ومريح ونظيف عددنا 4 كبار و 2 اطفال طلعت تذاكرنا 260 دينار كويتي روحه ورده اليكانتي مدريد اليكانتي  والحلو بالموضوع ان تقدر تغير وقت الرده بس تجي قبل الرحله بنص ساعه وتغيرها احنا بالرده مفروض العوده 7 ونص المغرب بس غيرنا الوقت الى الساعه 4 العصر القطار سهالات والاسبان ناس سهلين بالمعشر مو عسرين نفس الاتراك والاوربيين 

بالنسبه للسكن غلطتنا هي مو غلطه بس لان مانعرف الديره ماحجزنا الا اسبوع سكن على اساس نوصل ونشوف سكن يناسب او نغيره وصار ان اغلب السكن محجوز ومانلقا الا اسبوع اكثر شي السبب ان المنطقه تعتبر وجهه رئيسيه للسياحه عند الاجانب وهذا وقت زيارتهم فصرنا كل اسبوع نغير السكن وهالشي اتعبنا خاصه ان احنا 6 اشخاص كل شخص جنطه غير جنطة العزبه والطبخ و احنا بس 2 اللي نقدر نشيل ونحط الباقين صغار وكبار بالسن مايتحملون الشيل فتعبنا حيل حيل مع الشنط

اخر الموضوع بإذن الله راح احط الشقق الزينه اللي سكناها وقريبه من كل شي ومريحه 

سبب رحلتنا كان مستشفى العيون vissum من احسن المراكز والدكتور اليو شخص فوق العلم محترم وخلوق فوق الوصف مااقدر اوفيه حقه من المدح

جدتي تحتاج زراعة قرنيه فأخذنا موعد من الكويت عن طريق مستشفى شركة النفط تواصلوا مع الدكتور وعطانا موعد 18 يونيو 

طبعا جدا خدوميين بالمستشفى بس عيبهم مايتكلمون انجليزي المنطقه بكبرها مايعرفون انجليزي الا القليل واللي يعرف انجليز تكون انجليزيته مكسره لكن بالمستشفى قسم الترجمه في عرب يترجمون لك
راجعنا عند الدكتور وعطانا موعد للتحاليل و موعد مع دكتور البنج لان جدتي فيها قلب وتاكل علاجات فلازم يشوف العلاجات ويحدد متى توقف علاج السيوله للعمليه 
تحدد موعد العمليه بتاريخ 5 يوليو10 صباحا 
4 يوليو تواصلو معانا ان راح تجي سياره تاخذ المريضه مع مرافقين 8 الصبح يوصلونها للمستشفى للعمليه (ملاحظه العمليه في مستشفى ثاني يملكه ايضا الدكتور اليو يبعد عن اليكانتي ساعه ونص تقريبا) وبالفعل الصبح وصلت السياره وراح خالي معاها 
وقت العمليه يحطون المرافق بغرفه فيها شاشه يشوف العمليه من بدايتها الى نهايتها بث مباشر 
بعد ماخلصت العمليه قعدت ساعه بالملاحظه و رجعتهم نفس السياره للبيت والحمدالله ماكان في اي الم يذكر ولا حست فيها الحمدالله والبنج كان موضعي و دوا بالوريد يهدي الاعصاب ويرخي المريض 
بعد العمليه بيوم واحد مراجعه يشيل الشاش بالمركز اللي في اليكانتي 

الوالده تعبت معانا وقت تواجدنا باليكانتي و الدكتور اليو فعلا ماقصر لما كلمته ان ابي دكتور زين للوالده تعبانه ومو عارفين وين نروح ماشاءالله عليه قام من نفسه وحجز لنا بمستشفى قدام مركزه ثاني يوم ولما رحنا قالت لنا ان انا مواعيدي فل لشهر اغسطس بس خدمه للدكتور اليو وفعلا الدكتوره ممتازه وخدومه ماقصرت معانا الحمدالله  اكتشفت المشكله ثاني مراجعه عندها بعد التحاليل والرنين اللي كلمتهم وطلعت نتيجته بنفس الوقت وقعدت معانا بعد نهاية دوامها ولما جينا ندفع فلوس المراجعه الثانيه قالت لا ماتدفعون شي انتم دفعم بما فيه الكفايه تقصد فلوس التحاليل والرنين وحولتنا على اخصائي لحالتها والحمدالله تحسنت حالتها وارتحنا 

ورجعنا الكويت بتاريخ 21 يوليو ماطولنا الحمدالله على كل حال
 
الشقق اللي سكنتها وكانت زينه وموقعها زين

وطبعا الشقق كلها تتكون من 3 غرف و حمامين ومطبخ وصاله اذا ماتبي 3 غرف تقدر تسخدم الشقه وتبحث بالشقق اللي حولها 

هالشقه حلوه اعطيها جيد جدا اصحابها ناس طيبيين ونفسهم حلوه 
قدامها في مطعم لبناني حلو حلال وتحتها مطعم بيتزا لذيذ وكذلك مطعم شورما حلال حلو قريب ويمين العماره مشي خمس دقايق محل ايسكريم لذيذ وقريب منها الماركت نفس  سوق اللحم والسمك بالمباركيه بالكويت طبعا اللحم مو حلال لكن عندهم بحري ومحلات زيت الزيتون والزعفران والشاي وبهاراتهم  وكذلك عندها جمعيه قريبه الشقه تبعد عن السنتر اقل من 10 دقايق مشي 

http://www.booking.com/Share-iwt2IG


السكن الثاني بالسنتر واغلى من الاول 
هالشقه احلى من الاولى وانصح فيها مكانها عند السنتر بس مو بالصفه الاولى لا بالصفه الثانيه بس بوابتها بوجه السنتر وتحته مطعم هندي حلو ومطعم برجركينج تحته بالضبط وماكدونالدز قريب عندها حيل ومطاعم حلال حواليها كثير ومطاعم اسبانيه وايد وطبخهم يعتبر حلال لان اغلب اكلهم بحري عندها جمعيه قريبه 
واللي استقبلنا انسان محترم وخلوق ماشاءالله عليه ساعدنا بالجناط شالهم ووصلهم الشقه شقته متكامله فيها كل شي ونظيفه تتكون من 3 غرف و حمامين وصاله ومطبخ وغسالة ملابس ممتازه بس غاليه شوي واللي يبي رقمه يحجز عن طريقه يراسلني عالخاص او عالانستغرام دايركت noufaaaz لان عنده شقه ثانيه من غرفتين اطلالتها احلى من اللي خذيناها 

http://www.booking.com/Share-jBtsY2

بالنسبه للتسوق المنطقه مافيها الا مولين
بلازا مار حلو ماشي حاله قريب من السنتر
و قران فيا فيه بريمارك وجم محل حلوين وعندهم مطعم تركي مغربي فوق يقدم شوربه حريره المغربيه لذيذه شوي بعيد عن السنتر 
وفي مول اسمه آل كورت انجلو ماعتبر مول نظام نفس هارودز طوابق كل طابق متخصص بشي وفيه الماركات العالميه والاسبانيه لكن مو كل الماركات العالميه ارقى ماركه عندهم كارولينا هيريرا المول هذا ينقسم الى بنايتين الاولى عطور وملابس وشوزات تكرمون وشنط نسائيه او سفر واخر طابق مطعم نظام بوفيه تاخذ اللي تبي وتحاسب اخر شي المبنى الثاني ساعات نظارات مفروشات الكترونيات واثاث وبالارضي في جمعيه حلوه على طول الشارع في محلات وايد وفي ستاربكس 
وعندهم الاوت لت اسم بس ولا هو نفس بلازا مار نفس المحلات والاسعار وبعيد شوي عن السنتر مايستاهل العنوه له 

بالنسبه للرز كان ازمه لما خلص رزنا اغلب الانواع عندهم حق طبختهم البايلي ماينفع لطبخاتنا لكن عندهم نوع لازم تبحث عنه عدل مكتوب عليه باسمتي Bsmati اعتقد جذي بالانجليزي احسن نوع جربناه يمشي الحال
والزبادي حجمه صغير وفي انواع تنخلط بسكر ركزوا بالشكل اذا فيها صورة خيشة سكر ماتنفع 

قوقل ماب نفعنا بالبحث عن الباصات والجزارين والجمعيات والمطاعم 


وان شاءالله اكون عطيت معلومات وافيه عن اليكانتي