| | -
الفجر -
الظهر -
العصر -
المغرب -
العشاء -
... ... ... -
... ... ... -
... ... ... -
... ... ... -
... ... ... | | |
22 / 04 / 2023, 45 : 08 AM
مسافر جديد الملف الشخصي تاريخ التسجيل : 22 / 04 / 2023 رقم العضوية : 165121 المشاركات : 5 الجنس : ذكر الحالة :  | | رحلتي إلى جنوب أفريقيا March-2023 | |
بسم الله الرحمن الرحيم
هذا التقرير راح يكون بصيغة مذكرات بحكم أن بعض الأشخاص يرتاح لسرد التفاصيل, ولكن راح ابدا بمواضيع عامة مهمة كثير ناس تكلمت عن موضوع الأمان في جنوب افريقيا وحاب اني افصّل شوي بالموضوع:
أولا كلامي له علاقة بالمناطق اللي زرتها اما المناطق الثانية ما عندي علم عن مستوى الأمان فيها.
الهوملس كثير في الدولة ( Homeless ) وهم الأشخاص شديدي الفقر لدرجة أن ما عندهم مسكن, وقد يكون مشاهدتهم بكثرة يبعث على عدم الإحساس بالأمان ولكن قاعدة دائمة بالسفر حاول انك تنخرط مع المجتمع ولا تتكلف في اللبس وتلفت انتباه الناس بالاساور والتقنيات التي ترسل لهم رسائل بأنك غني .. ليس عرض أزياء انما سياحة وفترة نقاهة!
تجنب الشوارع الصغيرة او الأزقة اللي يكون ما فيها احد.
سألت احد السكان في جنوب افريقيا عن مستوى الأمان بالليل, فقالت يختلف الأمان باختلاف المكان .. فبعض الشوارع تقفل المحلات من الساعة 5 العصر ويصير الشارع مظلم ثم سألتني ليه تبي تمشي في شارع مظلم ومحلاته مقفلة؟؟ للأمانة كلامها منطقي .. كذلك قالت أن بعض الشوارع تكون فاتحة الى الساعة 11 بالليل ويكون فيها حركة وناس فعادي أنك تمشي فيها.
- انقطاع الكهرباء الجدول ..؟
وحدة من الأشياء المحزنة عن جنوب أفريقيا ان فيها انقطاع كهرباء مجدول , بحيث ساعتين او اربع ساعات يوميا راح ينقطع عليك الكهرب ( الأربع ساعات مقسمة ساعتين – ساعتين ).
الجميل انهم متصالحين مع الوضع ومسوين تطبيق تدخل عليه وتشوف متى جدول الانقطاع في حيكم. والسبب طبعا ان مولدات الكهرباء ما عندها استطاعة تغطي الاحتياج كامل بحكم ان عمرها تجاوز الثلاثين سنة (معلومات من جلستي الصباحية مع العجوز.. تفاصيلها بالسرد لاحقا هههه ) كثير من المحلات تقفل الساعة 5 العصر عشان كذا اذا ناوي تتقضى او تشتري أغراض خلص امورك قبل خمسة, الجزء الثاني من المحلات يقفل 7 المغرب .. وعدد قليل يقفل الساعة 11 بالليل. حنا كنا ثلاث أشخاص تقريبا على كل وجبة ندفع 120-150 ريال (باستثناء الفطور أقل) مع العلم اننا نطلب اربع اطباق رئيسية ومشروبات واحيانا نتبعها بقهوة وحلى 😊. اخذنا شريحتين: الأولى من الشركة الحمراء Vodacom وكانت ممتازة تغطيتها في كيب تاون وفي القاردن روت وحنا مسافرين وكذلك يوم طلعنا للمزرعة وابتعدنا عن المدن ما زالت تغطيتها جيدة.
الشريحة الثانية أخذنا من الشركة الصفراء MTN كان عليها مدح ويقولون انها جيدة ولكن مع الأسف تجربتنا معها سيئة جدا, في القاردن روت بطيئة وفي المزرعة أصلا ما كانت تشتغل ☹. الدولة متطورة من ناحية الحجوزات والفعاليات .. تقريبا جميع الفعاليات لها مواقع الكترونية واضحة ومتعددة , والأفضل دائما دائما أنك تحجز التذاكراونلاين عشان تختصر وقت الانتظار في الطابور وتحصل على سعر جيد في بعض الأحيان.
كذلك طرق الدفع كلها كانت باستخدام الفيزا ما احتجنا الكاش ابدا حتى بطريق السفر والاستراحات اللي بالخط , ولكن الاحتياط واجب اترك معاك كاش لمجرد الاحتياط.
معلومة مهمة جانبية ولكن أساسية بنفس الوقت ..
وجب التنويه ان ما عندهم شطافات في دورات المياه .. عاد انت شف كيف بترتب أمورك
- ملف فعاليات في المرفقات ..
يوجد ملف فعاليات ارسله لي واحد من اخوياي يحتوي على فعاليات متعددة بحاول أني احطه لكم في المرفقات, يحتوي تفاصيل جميلة. | | |
22 / 04 / 2023, 45 : 09 AM
مسافر جديد الملف الشخصي تاريخ التسجيل : 22 / 04 / 2023 رقم العضوية : 165121 المشاركات : 5 الجنس : ذكر الحالة : |
.
.
تبدأ رحلتنا من استراحتنا في الرياض بعد منتصف الليل حينما قررنا اقناع صاحبنا بشراء سيارة فانتهى النقاش بنا إلى سفرة خارج المملكة ��. (طبعا ابشركم الرجال اشترى سيارة الله يبارك له) , هذا الكلام كان قبل موعد السفرة بشهر ونص.
حددنا جنوب أفريقيا بحكم انها لا تتطلب إجراءات فيزا ف أمورها أسهل من غيرها، بالإضافة الى اننا نعرف أكثر من شخص راح لها ويمدحها كثير إلى جانب انها تحتوي على تنوع كبير في الفعاليات واللي عزز الرأي أكثر هو أننا بحثنا عن أفضل شهور السنة لزيارة جنوب أفريقيا وصادف انه يوافق موعد سفرتنا.
بدأت التجهيزات ورحنا نركض نطلع جوازات سفر بحكم انها أول سفرة لنا كلنا خارج السعودية.
حجزنا رحلتنا قبل شهر من الرحلة على الخطوط القطرية بقيمة 3500 ريال , طبعا كان فيها ترانزيت 7 ساعات في الدوحة.
من أكثر الأشياء اللي افادتني كثير بالسفرة هو البحث والقراءة عن الدولة والأماكن اللي الناس تروح لها. استفدت من هذا الموقع كثير وكذلك من مواقع أجنبية مثل Trip Advisor, ساعدني البحث بتكوين نظرة عامة وتصور عن الدولة والمدن اللي فيها مما جعل تبادل اطراف الحديث مع الناس في الدولة أسهل واكثر فايدة.
في البداية حددنا الوجهات الأساسية اللي بنروح لها وكانت القاردن روت وكيب تاون. بدأت بالبحث وتجميع الأماكن السياحية الموجودة في هذين الموقعين وسويت فيها ملف أكسل عشان يسهل الرجوع لها اذا وصلنا هناك.(مرفق لكم بالمشاركة السابقة).
انطلقت رحلتنا التي مدتها 14 يوم , في صباح الجمعة الى كيب تاون مرورا بترانزيت 7 ساعات في الدوحة وكانت أول زيارة للدوحة بعد كأس العالم وتغيرت كثير بحكم ان اخر زيارة لي كانت 2012.
وصلنا إلى جنوب افريقيا صباح السبت أو بمعنى أصح فجر السبت وكان المطار شبه فاضي والمحلات مقفلة !! يعني تقدر تقول ان مطارهم مقفل هههههه. يفتح الساعة 7 الصباح تقريبا.
أفطرنا في المطار في Mugg&bean وهو أحد أماكن الفطور المعروفة, كان الاكل جيد ولكن أقل من التوقعات لان سمعت عليه مدح كثير ولكن يستحق التجربة بحكم أنه مشهور هناك والاكل ما كان سيء.
أخذنا أوبر من المطار إلى مسكننا الأول في وسط مدينة كيب تاون وهذا الشيء الممتاز في كيب تاون ان أوبر متوفر وسعره رخيص.
جميع خيارات السكن حجزناها عن طريق Airbnb واشوفه خيار ممتاز لتجربة مختلفة في رحلة جنوب افريقيا.
طبعا لأننا من عشاق القهوة أخذنا أول مسكن لنا بقرب الكوفي الحاصل على جوائز عالمية Truth Café, ولكن مشكلة المنطقة هذي أن فيها مأوى يوزع أكل للهوملس (homeless) اللي مع الأسف متواجدين بكثرة في كيب تاون فبتشوفهم كثير في المنطقة.
طبعا Truth Café جميييل جدا ودايم زحمة, تقهوينا وأفطرنا فيه اكثر من مرة وكل مرة يبهرنا بأشياء حلوة, ضروري اذا بتروح تجرب عندهم فرنش توست.
بعدها طلعنا على Water Front وهي الواجهة البحرية في كيب تاون , عبارة عن محلات تجارية وأسواق ومطاعم وكوفيهات ويعتبر مقصد سياحي والجميل فيها انها مستمرة الى تقريبا الساعة 11 بالليل بعدها المحلات تبدأ تقفل.
وبكذا انتهى اليوم الأول ..
صحينا ليومنا الثاني نشيطين متقهوين ومفطرين قرانولا �� وناوينها هايكنق (Hiking).
يوجد خيارات كثيرة للهايكنق في كيب تاون, اخترنا من بينها Signal Hill بحكم انها أسهل شوي. وكان جنبها Lions' head اذا فيك شدة تطلع اثنينهم لانهم جنب بعض تقريبا, بمجرد وصولك للقمة بيكون منظر على البحر والمدينة
هنا طبعا اكتشفت ان الهايكنق صعب جدا, لان وقتها كنت قاعد اسوي هايكنق وانا اهرول وانقطعت انفاسي وانا بنص الجبل وبغيت اموت لان أتوقع معدل الاكسجين ينقص اذا ارتفعت في الجو â?¹. اهم شي لحد يسوي نفسه رياضي وأموركم تمام.
أول ما خلصنا هايكنق وبطريق النزول للمدينة طلبنا من أوبر يوقف وينزلنا في Kloof street اللي هو الطريق الرئيسي اللي بيقابلك أول ما تنزل من الجبل, كانت رحلة بحث عن أكل ووقع الاختيار على The wolf House للامانة لذيذ ويستحق التجربة خاصة بعد الهايكنق والتعب. بعدها رجعنا لبيتنا.
اليوم الثالث كان هو يوم خروجنا من شقتنا الحالية فحبينا نترك المدينة ونروح إلى الساحل فوقع الاختيار على Kalk bay بحكم ان هناك في ناس كثير تمدح مطعم The harbor house مطعم بحري على البحر حرفيا والموج يصطدم على شبابيك المطعم, ولكن للأسف تجربتنا كانت غير موفقة, الاكل ما كان لذيذ كان عادي جدا مقابل السعر كان غالي مقارنة بمطعام جنوب افريقيا ولكن تجربة الاكل في المطعم كانت مميزة والاطلالة جميلة. كان مجموع حسابنا في المطعم للغداء والحلى والقهوة تقريبا 450 ريال.
الطرق جميلة في كالك باي والمحلات يجيها كثير من السياح وبعض منها يفتح بالليل, واتذكر طلعنا اكثر من مرة بالليل في هذي المنطقة ولا واجهتنا مشاكل أعتقد لقربها من saint james وهو حي يبدو لي أنه حي أغنياء فالأمان فيه جيد.
وهذي اطلالة البيت:
وهذي صور من داخل مطعم The harbor House
 | | |
22 / 04 / 2023, 27 : 10 AM
مسافر جديد الملف الشخصي تاريخ التسجيل : 22 / 04 / 2023 رقم العضوية : 165121 المشاركات : 5 الجنس : ذكر الحالة : |
| | |
22 / 04 / 2023, 30 : 06 PM
مسافر جديد الملف الشخصي تاريخ التسجيل : 22 / 04 / 2023 رقم العضوية : 165121 المشاركات : 5 الجنس : ذكر الحالة : |
.
.
صحينا في صباح اليوم السابع جازمين السفر الى قارن روت !! وأول محطة وقوف للاستراحة هي مدينة الحيتان Hermanus .
الطريق تقريبا ساعتين من Muizenberg إلى هرمانس, طريق الذهاب جميل بدايته شاطئ رملي ونهايته صعود طريق جبلي ثم النزول منه وصولا الى هرمانس.
أخذنا فيها بيت ليوم واحد عن طريق Airbnb وكان بيت لعجوز كبيرة بالسن وروحها جميلة جدا, نمنا عندها يوم واحد وكانت حريصة انها تعطينا نصائح لاماكن ووجهات, ووحدة من الأماكن اللي نصحتها فيها طلعنا تغدينا فيه صررراااحة المكان استثنائي لم يسبق اني شفت زيه. بس مشكلة الاكل حقهم ما كان حلو وأعتقد اختيارنا كان سيء أشوف الناس تطلب باستا فيبدو الباستا حقتهم جيدة.
اسم المطعم Ficks Pool هذي بعض الصور للمكان:
للأسف ان الوقت اللي جينا فيه ما كان وقت حيتان لان اكثر شي معروفة فيه هذي المدينة أنها تزدحم بالحيتان في موسم تزاوج الحيتان, موسم تزاوجها تقريبا في أكتوبر و نوفمبر.
ولكن بشكل عام الديرة هادية وما فيها كثافة سكانية كبيرة تنفع انك تريح فيها شوي.
وفي صباح اليوم الثامن لقيت شخص يقابلني ويفطر معي الصبح وهي صاحبتنا العجوز .. ونيسه كانت وتحب تنصح.
شلنا اغراضنا من بيت العجوز بهمّة وعزم الى القاردن روت وتحديدا Plettenberg bay لان أغلب فعاليات القوارب والتزحلق على الحبل (kayaking and zipline ) موجودة في هذي المنطقة بسعر أفضل ومناظر أفضل بكثير من كيب تاون.
طبعا القاردن روت هو عبارة عن طريق سريع ( highway ) وفيه مدن كثير وفعاليات متعددة على طول هذا الطريق, حرفيا قاردن روت على اسمه تحس انهم شقوا غابة وحطوا وسطها طريق من كثر المناظر الخضراء وكثافة الشجر.
وقفنا نتغدى في george او جورج لأني سمعت انه فيه ألذ محل ستيك ممكن تأكله اسمه Texas Grill ولكن مع الأسف طلع حلو ولكنه ما كان ألذ ستيك انا اكلته, ولكن الجدير بالذكر ان المطعم معروف جدا وزحمة وسعره معقول جدا .. أتذكر الستيك كان 30 ريال او 40  .
بعدها كملنا طريقنا الى Plettenberg bay وكنا مستأجرين في كمباوند مع اطلالة على الوادي وهذي الشرفة حقتنا:
طحنا نمنا بعد تعب السفر واستعدادا لفعاليتنا الكبيرة غدا وهي ركوب القوارب.
صباح اليوم التاسع وكالعادة صحيت بدري على منظر خاطف للابصار من الشرفة:
قررت أكل خفيف عشان نقدر نجدف كويس .
فعاليتنا كانت في Tsitsikamma National Park اللي تبعد عنا قرابة ساعة.
وصلنا إلى Tsitsikamma National Park وكانوا يطلبون تذاكر لدخول الحديقة مختلفة عن تذاكر الفعالية حقتنا, التذكرة على الشخص تقريبا 58 ريال.
المكان بالداخل رهيب رهيب رهيب بكل ما تعنيه الكلمة, وصادف مع الأسف اول ما دخلنا هطول امطار فسبب هيجان للبحر والنهر فقرروا يكنسلون فعاليتنا حقت القوارب نظرا لسوء الأحوال الجوية.
قالوا لنا ناصحين: بما انكم داخل الحديقة لا يفوتك الهايكنق على الجبل الموجود والجسور اللي فيه ..قلنا: ليه لا هايكنق هايكنق. وهذي بعض المناظر خلال رحلة الهايكنق:
رجعنا بعدها الى الكومباوند حقنا ميتين جوع بعد تسلق الجبل وطلبنا Uber Eats ألذ بيتزا سبق اني جربتها .. اسم المطعم Debonairs Pizza عندهم بيتزا طبقات حنا جربنا طبقتين بس , الثلاث طبقات حسيتها بتكون تو متش!
| | |
22 / 04 / 2023, 43 : 06 PM
مسافر جديد الملف الشخصي تاريخ التسجيل : 22 / 04 / 2023 رقم العضوية : 165121 المشاركات : 5 الجنس : ذكر الحالة : |
.
.
في صباح اليوم العاشر سويت قهوتي استعدادا لتجربة جديدة !! ناوين نخيم بعيد عن الناس لحالنا ...
وقع الاختيار على مزرعة في منتصف طريق العودة الى كيب تاون بقرب مدينة Riviersonderend .
مساحة المزرعة كان 1000 هكتار .. ضخمة ضخمة جداا لدرجة ان فيها جبل وشلال وبحيرة!!
طبعا اشترينا مقاضي حقت يومين عشان نحس بالعزلة فعلا طيلة فترة الإقامة.
كان فيه فعاليات كثير خلال اليومين في المزرعة ولكن ما راح اذكرها بحكم انها معتمدة على المزرعة بذاتها وهي ملك لاشخاص .. ولكن شوفوا اذا بتحصلونها في Airbnb بجنب مدينة Riviersonderend المكان جميلة للاسترخاء. وهنا بعض الصور للمزرعة :
في اليوم الثاني عشر صحينا مودعين فترة النقاهة والعزلة متجهين الى كيب تاون.
أخذنا شقتنا الأخيرة في منطقة أعتقد اسمها Marina da Gama الأكيد انها جنب Muizenberg bay وتشاء الصدف ان صاحبة البيت عندها قارب وبيتها على النهر وتقولنا اذا تبون القارب خوذوه انبسطوا شوي (قلنا تكفين لا تقلبين المواجع تو حجزنا حق القوارب تكنسل عشان المطر) طبعا كذلك ما قدرنا نركب القارب حقها بسبب الامطار :( .
وفي آخر أيامنا وهو اليوم الثالث عشر خارت قوى الجميع وصرنا بس نبي نمشي اليوم وشايلين هم السفر الطويل , ومع الأسف كان يوم ماطر فأغلب الأشياء كانت مغلقة.
كنت ناوي على اخر يوم اتزلج في قاعة تزلج جليد كبيرة سبق اني قريت عنها وفعلا رحنا لها وكنت احسب انها داخل مول.. طلعت داخل كازينو  .
دخلنا الكازينو الظهر وما كان فيه الا شيبان يلعبون بوكر ومدري وش الألعاب الثانية .. وحتى صالة التزلج كان فيها مباراة هوكي ولكننا تغدينا بمطعم إيطالي داخل الكازينو عنده ألذ باستا أكلتها اسمه Casa Bella GrandWest .
ثم توجهنا بعدها للمطار ومن ثم الى دولتنا العزيزة ..
| | |
31 / 07 / 2023, 14 : 12 PM
مسافر جديد الملف الشخصي تاريخ التسجيل : 31 / 07 / 2023 رقم العضوية : 166295 المشاركات : 1 الجنس : أنثى الحالة : | | رد: رحلتي إلى جنوب أفريقيا March-2023 | |
جزاك الله خير
| | |
31 / 07 / 2023, 56 : 12 PM
مسافر جديد الملف الشخصي تاريخ التسجيل : 02 / 05 / 2014 رقم العضوية : 73769 الإقامة : الرياض المشاركات : 5 الجنس : ذكر الحالة : |
شكرا على المجهود الطيب
| | |
26 / 06 / 2024, 27 : 12 PM
خبيرة الزاد للبلاد التركية الملف الشخصي تاريخ التسجيل : 27 / 05 / 2009 رقم العضوية : 7972 الإقامة : .. الإمــارات .. المشاركات : 492 التقارير : 1 الجنس : أنثى الحالة : |
جزاك الله خير | "الــبــوابــة الــتــركــيــة" تركيا ... التي رأيت ... 7/2009 ..&.. الدليل الميسر للمسافر إلى اسطنبول وما حولها ..&.. @.. خريطة أم منصور .. لمواصلات اسطنبول ..@ .. رابط آخر لتحميل الخريطة .. محبتكم أم مــنــصــور |
| | المواضيع ، تعبر عن رأي كاتبها ويتحمل مسؤوليتها فقط ، ولا تعبر بالضرورة عن رأي شبكة ومنتديات زاد المسافر .  | | |
