السلام عليكم ورحمة الله وبركاته





هذا التقرير اهداء الى اخي وحبيبي بو فيصل مقابل مساعدته لي في كل شي من حجز الفنادق والشقق الرائعه والاتصال فيني طول المده للاطمئنان علي الله يجزاه الخير ومهما سويت لا اوفيك حقك


كان سبب السفره الرئيسي فحص وعلاج لمشكله الاذن عندي اللي تعبت منها ومن المستشفيات في الكويت

وقررت اني ازور مستشفى بومرن قراد في بانكوك وهو المعروف بالمستشفى الامريكي

http://www.bumrungrad.com/

وهو مستشفى رائع وعن طريق النت عملت موعد مع عياده الاذن والانف والحنجره وعلى طول عطوني موعد في تاريخ 1 ابريل لكن قررت اغيره خصوصا اني راح اوصل بنفس الوقت وارسلت لهم رساله وغيرو الموعد الى اليوم الثاني بسرعه كبيره جدا موقف رائع لمستشفى رائع


كان موعد السفر يصادف عطله لعيالي وهي عطله الربيع او الايستر وحجزت على الطيران السيلاني لاني ما لقيت حجز على الكويتيه او التايلنديه اللتي قررت التوقف عن الطيران من مطار الكويت الدولي في تاريخ 28 من شهر مارس فقررت اني احجز على الطيران السيلاني كويت سيلان بانكوك مرورا في دبي لساعه

الطيران رائع وممتاز لكنه مزحوم للاخر وكان موعد السفر في تاريخ 31 مارس واوصل بانكوك في الاول من ابريل

قبل الحجز او اصدار التذكره اشتركت مع الطيران السيلاني من اجل الاستفاده من النقاط او الرفع الى درجه اعلى لكن ما حصل هالشي بس استفدت من النقاط

كانت الرحله من الكويت الى دبي فل وكلها كويتيين وفرحت لاني سمعت ان الطياره كلها سيلانيين والريحه تكون داخل الطياره شي ولا بالخيال

قبل السفره اصبت بالزكام وهذي اول مره اسافر وانا مزكوم لكنها كانت بالنسبه لي خيره ولله الحمد

في مطار دبي كل شي تغير نزلوا كل الركاب الكويتيين ماعدا انا :4:

وصار مكانهم سلانيين والحمدلله اني مزكوم ولا شميت الريحه طول الطريق

من فوايد الاشتراك في الطيران السيلاني اني حجزت لي مقعد ووجبه لرحله الذهاب فقط وهذا هو المهم

كانت الرحله من دبي الى كولومبو 4 ساعات رحله سريعه وخدمه رائعه

وصلنا الفجر مطار كولمبو وهو مطار صغير لكنه مرتب ونظيف وراقي

وعلى طول رحت لغرفه الصلاه ووجدت مسافرين افغان وصليت الفجر وياهم وطلعت على الفطور وبعد الفطور اخذت لي ساعتين فوت مساج كان وقت الترانزيت 3 ساعات ولا حسيت الا بالنداء الاخير وباسمي طلعت من المساج وهو تقريبا 1000 روبيه سيلانيه وهو ممتاز ورائع ومفيد للمسافر


وصلت بانكوك الساعه 12 الظهر في توقيتهم ومطار بانكوك رائع وكبير وتقريبا ساعتين فقط عند الجوازات من كثر هالبشر مع العلم اني ما احتاج الى فيزا على طول على الكونتر

اخذت الشنط وطلعت ولقيت الشركات اللي تعرض على التكسي والفنادق وسالت عن السعر وكان 1500 بات

طبعا نزلت تحت للتكاسي الملونه وكان سعرها 450 بات شامل كل شي

كان الحجز في فندق اومني تاور

http://www.omnibangkok.com/

شقق فندقيه رائعه بعيده عن الزحمه وفيها حراسه 24 ساعه والغرفه رائعه لابعد الحدود

حجزته عن طريق بو كينج وسعره تقريبا 1500 بات تدفعها كاش اول ما توصل

وطبعا طلبت من راعي التكسي يمر على الصرافين في منطقه نانا من اجل الصرف وصرفت ما يقارب 500 دولار وكان الصرف وقتها 3200 بات لكل 100 دولار وعطوني شريحه جوال مجانيه هديه لاني صرفت مبلغ كبير على قولتهم

عمليه دخول الفندق او الجك ان كعاده تايلند سهله جدا وسريعه

دفعت الفلوس ودفعت التامين من اجل السيفتي بو كس وطلعت على الغرفه وهي عباره عن غرفه وصاله ومطبخ وغرفه ملابس وفيها السيفتي بوكس

طبعا اول شي انفذ وصايا ام باسل رش الديتول في كل الغرفه

وبعدين سويت لي قهوه مهيله من اجل تضبيط المزاج

نشوف الصور

مدخل الغرفه ويبين الديتول وهو من اساسيات السفر في عايلتنا




الصوره مهتزه شوي لكن السموحه لاني مو متعود اصور في كاميرا صغيره














لاحد يعلق على الصوره لاني كنت مستعجل على الصوره ولا رتبت مع اني توني واصل



السموحه اذا حطيت صوره للحمام اعزكم الله لكن علشان ابين انه يوجد شطاف فيه



المطبخ وهذا من الاساسيات عندي من اجل شي واحد فقط







بتقولون شنو هالشي وهذا الجواب عليه




الصاله وهي رائعه وتطل على حمام السباحه لكن للاسف ما قدرت اصوره لانه دائما فيه ناس





يتبع باذن الله