لعل من اهم وسائل المواصلات واسرعها واقلها كلفة هو مايسمى بالاندرقراوند ربما يقع السائح العربي الى اوروبا في خطأ كبير وهو التنقل عبر سيارات الأجره وهنا سيتكبد تكاليف باهضة لغلاء اجرة التكاسي هناك ومن الافضل استغلال هذه الميزانية المهدرة في اشياء اهم واولى من ضياعها على اصحاب الذمم الواسعه إلا من رحم الله. حديثي هنا عن المدن الكبيرة كفيينا وميونخ وباريس وغيرها اما عن القرى والبلدات الصغيرة فالخيار الافضل كما يفضلة الكثيرون هو استئجار سيارة او الباصات كخيار ثانوي . سأورد هنا شرحا مبسطا عن الاندرقراوند ( فيينا ) وبعض الصور لصالات المترو انفاق ومن يستوعب الشرح فسوف يستطيع التعامل مع جميع محطات الاندرقراوند في العالم ( مع العلم انه سهل جدا ) دعونا نلقي نظرة على جميع محطات الانرقراوند في فيينا إضغظ هنا سنبدأ في شرح او كيفية قطع التذكرة الخاصة بالاندرقراوند ( فيينا ) في كل محطة هناك آلة خاصة بقطع التذاكر وهذه احدها ( من محطة شتاد بارك - فيينا ) المعذره على عدم وضوح الصورة .... هنا صور اوضح للعمده خر الفرسان...فليسمح لنا ابو مشاري الشرح والصور من تقريري النمساوي لذلك سأورده كما هو باللهجة العامّية في الصورة اللي فوق تختار المسار اللي تبي ويفضل المسار الكامل فل تيكت وتختار عدد الايام والاغلب طبعا 72ساعة بعدها تختار عدد التذاكر ..لنفرض انكم شخصين ..تختار اللي عند صبعي : انا بختار شخص واحد لمدة 72 ساعه فل تيكت طلعت علي بــ(13.60 ) يورو والاوراق النقدية المقبولة 20،10،5،2،1، نصف يورو،20سنت 10سنت بعد كذا فيه مكان بالآلة نحط فيه الفلوس وتبلعها الآلة وتعطينا التذاكر والفراطة : بعد ماتطلع التذاكر ناظر يسار بتشوف صندوقن ازرق هذا وظيفته يختم لك التذاكر وهذا الصندوق بشكل مقرب وهنا نفس البوكس الازرق ولكن في محطه اخرى ( في منتصف الصورة) ملاحظة مهمه الا وهي ان الشرح اعلاه لتذكرة الاندرقراوند فقط يعني تختلف عن تذكرة فيينا كارد واللي تلقونها في الاكشاك او الفندق نفسه الفرق بين هذي وذيك ان بطاقة فيينا كارد بـ 18 يورو لثلاث ايام مشمولة الاندر قراوند والباصات والترام ايضا تخفيض على تذاكر الدخول للمزارات السياحية وبعض المطاعم والكافيهات . وسيتم شرحها قريبا باذن الله اما تذكرة الاندرقراوند اللي انا قصيتها فهي للاندرقراوند فقط تابعوني في الرد القادم لتكملة الشرح التفصيلي ضمى الترحال

	استخدام الاندرقراوند كنت اكثر شي شايل همه ..صدقوني ياامسافرين ويامسافرات ماشفت اسهل منه اهم شي تعرف محطتك اللي انت فيها والمحطة اللي بتنزل فيها على اي مسار( الاحمر,البنفسجي,البردقاني,الاخضر,البنّي) وبامكانك تاخذ الخريطة من رسبشن الفندق ..انا عن نفسي كل مامريت من عند الرسبشن اخذت منهم وحده : نجي للشرح......هاه جاهزين واي بزر حولك طلعه برى وصك الباب والجوال صامت لو سمحت شف يابعدي..لنفرض انك في محطة شتاد بارك وجا على بالك تروح ساحة ستيفنز وش تسويييييييي ..انا اقول لك وش تسوي اولا تناظر للخريطة اللي معك وتحدد المحطة اللي انت فيها والمحطة اللي ناوي تروح لها ..يعني رقم المسار ولون الخط ... نوضح اكثر...تشوف انت على اي خط u1 , u3 , u4 الخ وتشوف لون مسارك ..اخضر, احمر, بنفسقي تعالوا نشوف الخريطه هذه الصورة تم اعادة تحجيمها . الحجم الافتراضي لها هو 1143x815. الحين رقم (1) هذ مكاني( محطة حديقة شتاد بارك) ورقم (2) هذا المكان اللي أبغى أروح له(محطة شارع ستيفنز) ..مزبوط هيك..يالله نكمل طب ركزو على الصورة الجاية زين وطبقها مع الكلام اللي تقراه تحت وانت تفهم لو انك حائز على 100 ميدالية ذهبية في الدلاخة والتناحة والتناكة وان شاء الله مابيننا تنكه : هذه الصورة تم اعادة تحجيمها . الحجم الافتراضي لها هو 1143x815. الدعوه مايبيلها فهلوه انا الحين على المسار الاخضرU4 في محطة شتاد بارك وساحة ستيفنز على المسار الاحمرU1 طيب الحين انا قدامي خيارين.. يااني اروح فوق على المسار الذي ينتهي بمحطة Heiligenstadt وأنزل في محطة LandstraBe على المسار البردقاني ثمن أروح لمحطةStephansplatz( ساحة ستيفنز)او اني أروح تحت على المسار الاخضر اللي نهايته محطة Hutteldorf وأنزل في محطة karlsplatz اللي هي تقاطع الخط الاخضر مع الاحمر ثمن تصعد المترو u1 المتجه لــ Gopfeldsiedlung وبعدها ننزل في محطة Stephansplatz طيب خلونا نطبق عملي ولاتنسون الصورة اللي فوق كل واحد يتبّع معي وانا اشرح:105: انا في محطة شتاد بارك على المسار الاخضروبروح ساحة ستيفنز واخترت المترو اللي ينتهي بمحطة Hutteldorf ننزل من الدرج وننتظر المترو لين يجي شايفين الصورة اللي فوق ..هذي تعني ان المترو اتجاهه لهالمحطة ذي ..اوكي نجلس نسولف ونحش بأعضاء المنتدى لين يجي القطار:3: اخيرا شرف الأخ..لاحظوا اسم المحطة كمان مكتوب على جبهة المترو : المترو يوقف دقيقه او دقيقتين تقريبا ويمشي ..لازم تركب بسرعة والباب هنا فتحه يدوي بتحريك المقابض لليمين ولليسار (وبعض القطارات بيبانها تفتح تلقاءيا بمجرد الوقوف) اشوى ركبنا وهذا القطار من داخل الصورة اللي فوق يظهر الباب ولاحظ فوق الباب خريطة بامكانك تتبع مسارك بدون الرجوع الى الخارطه الموجوده معك ( بيريحونك ياأخي لاتصير متشنّج وماتصدق الا الخريطة اللي في يدك هههه ) طيب الحين ركبنا المترو اللي ينتهي بمحطة Hutteldorf مين يقول وين ننزل الحيييييين:114: ننزل في محطة Karlsplatz اللي هي تقاطع الاحمر والاخضر .. بعدها نروح ونركب المتروu1 اللي يطس فوق واللي نهايته Gopfeldsiedlung لانه راح يمر على محطة Stephansplatz اللي هي ساحة ستيفنز وننزل فيها.. وبس خلاص ..اللي مافهم يقول لي ومستعد اشرحها من هنا ليييييين بعد شوي : هنا قصاصة من الخريطة وموضح فيها مسارنا بالايميج ريدي ارجع واقول طبق الكلام اعلاه مع صورة الاندرقراوند اللي انا شارح عليها مع شوية خيال بتلاقي نفسك فاهم كل شي هم ارجع واقول مهما تصاعبت الشغلة ..لما تشوفها على الواقع تلاقيها سهلة جدددددا وجددددا بعد تعالوا ناخذ لمحه عن صالات الاندرقراوند صالات المتروانفاق تتشابه الى حد كبير في اوروبا والغرض هنا اخذ تصور مبدأي عنها في فيينا شايفين الخريطة على اليسار...منها تعرف اين انت والى اين سيكون مسار القطار هنا بشكل اوضح باختصار(الطريق اللي باللون الرمادي هذا في الخلف يعني مر عليه القطار وانتهى والخط الاخضر هذا اللي راح يمر عليه القطار والمحطات الموجوده عليه ونهاية المسار) يعني انا في ساحة ستيفنز وكنت برجع الى حديقة شتاد بارك) ........ تعجبني دقتهم والتزامهم بالوقت اغلب الصالات فيها ساعات لمعرفة ماتبقى من الدقائق لوصول القطار نلاحظ انه تبقى دقيقة على وصول القطار... ماشاء الله بالتايم ...اللي مايشوف الساعة يجي يشوفها تحت الصورة اللي فوق تصلح تصميم حزين :4: وهذي صورة لاحد صالات الاندرقراوند في ميونخ في النهاية اتمنى انني وفقت في ايصال المعلومه بالشكل المطلوب وان حصل هناك لبس او غموض في الموضوع انا حاضر للاجابة على جميع استفساراتكم باذن الله اخوكم ضمى الترحال [/align]

ماشاء الله تبارك الرحمن
عيني عليك باردة اخي الغالي وخبيرنا الرائع ومبدعنا المتميز ابو عبدالملك

هنيئاً لزوار النمسا بهذا الجهد الرائع الذي استغرق وقتكم وجهدكم الثمين

بارك الله فيك وجزاك الله خير على هباتك ودررك البديعة وماتقدمونه دوماً لأخوانكم

دمتم بكل الود

ما شاء الله تبارك الرحمن عزيزي ضمى الترحال

ودي اسافر الحين فيينا علشان اختبر نفسي ... وخاصة ان الدرس اخذته من احد كبار اروبا والنمسا ...

شرح سهل بسيط من غير تعقيد ولا صعوبات ...

شرح بالصورة والخريطة ... اسهل من من كدة ما في ...

ضمى الترحال ودي احط شرحك في كل مكان .. ما يصير احطه في محطان الاندر قراوند في فيينا ..

وصيف اعضاءنا هذا الصيف سيكون اسهل وامتع مع موضوع ضمى الترحال

تقبل خالص تحياتي

أخي ضمى الترحال... أبو عبدالملك...شلونك...

عساك على القوه يارب...وماقصرت ...ياربي يجعله في ميزان حسناتكم...

شرح مفصل ودقيق وينفع الجميع...والباقي بس تحجز لنا التذكره...

يعطيك العافيه...

تحياتي...

ياعسـانا ماننـحرم مـنك ومن ابـداعك

وتسـلم ايـاديك يابـوعبدالملك

كـفيـت ووفيــت والصـراحه شـلت الحيـن اي خـوف او رهبه من نـاحية الاندرقـراوند

بس كـان بودي لو حـطيت لنا صـوره حق جـهاز التذاكر في ميـونخ

وبإنتـظار شـرحك للفيـينا كـارد ... فـلا تبـطي عليـنا

تـحيـاتي لك

الله يوفقك دنيا وأخرة

تصدق أنه أكبر هم شايله هو استخدام الاندرقراوند

وشرحك يسر علي كثير الله ييسر عليك في الدنيا والأخرة عندي استفسار

س - عند الذهاب من محطة شتاد بارك إلى ساحة ستيفنز عندما أنزل في المحطة التي يلتقي فيها الخط الأخضر مع الخط الأحمر أين أجد القطار الأحمر هل هو في نفس المحطة أو أتجه إلى مكان أخر . أرجو منك الشرح مفصل

س- كم الوقت الذي يتستغرق وصول القطار عن النزول في المحطة ؟

وشكراً

كفيت ووفيت
مشكور خيو

ماشاء الله عليك يابو عبدالملك

حركات وابداع صراحة شرح وافي وكافي الله يوفقك لكل خير ويحفظك من كل شر