الحمد لله انتهى التقرير وكيرلا ولاية جميلة لمن يهوى الطبيعه والهدوء والشلالات والغابات
لو قدر لي زياره ثانيه لكيرلا في فترة الصيف ماراح اتعاقد مع اي مكتب سياحي لان الفنادق والمنتجعات كانت مشغوله بنسبه 30 % فقط او اقل اغلبهم من الخليج ,لانه موسم المونسون (موسم المطر) وهو ماهو موسم سياحي
وحاول انك ماتتكلف في السكن وخاصه اذا كنتو شباب..لأن بعض الايام نكون خارج السكن طول اليوم مانرجع الا المساء فحرام تستأجر في منتجع بمبلغ وقدره وانت ماراح ترجع الا المساء وقت النوم
لكن في موسم السياحه.. اتوقع انه لازم تنسق مع مكتب قبل السفر
المهم استأجار سواق وتكون عارف المناطق الي بتزورها : يومية السائق تختلف
عموما انا بأعطيكم سواقين يتكلمون عربي
واحد اسمه سراج الدين وهو سواق متمرس وله خبره 20 سنه تقريبا في السواقه ويعرف الاماكن وسيارة تويوتا اينوفا 2008 (ماني متأكد من الموديل) قابلته صدفه في احد الأماكن وكان جدا محترم ورجل بمعنى الكلمه يوميته 2000 روبيه
الثاني هو السائق الي اخذنا من الشركه.. اسمه شمسير ,سائق صغير في السن عمره 24 وجديد على الشغله لكن ماعنده مانع يشتغل لحسابه طبعا يوميته 1400 روبيه وسياته جيب تااتا وهذا كرته
طبعا ماكان يعرف المناطق لكن مع اللوحات وكان يسأل السواقين الي نقابلهم في المنتجع ويعرف الاماكن
طبعا انا مالي علاقه بهم ابدا ولا اتحمل اي مسؤوليه..انا مجرد انقل معلومه لاني قبل لا ساافر ماحصلت للأسف ارقام سائقين فحبيت اخدم الغير.. وممكن تحصل بأسعار اقل منهم
**ايضا الهند تحتاج الى فيزا تاخذه من سفارة بلدك.. وانا طلعتها بنفسي من الرياض بس يطلبون حجز الفنادق والطيران ودفع مبلغ 250 تقريبا وتاخذها بعد 3 ايام.. مكاتب السفر يطلع لك حجز سكن وطيران وهمي ب50 ريال ويمشي في القنصليه..
** ابضا البوفيهات في جميع المنتجعات الي سكنها فيها معقول..احسن شي البرياني يضبطونه ..لكني حسيت بغلطتي لاني ما اخذت عزبة الطبخ !! وندمت في وقت لاينفع فيه الندم.. وايضا لاحظت توفر اسرة اضافيه..فاذا كنتم 3 مثلا تقدر تطلب غرفه مع سرير اضافي اوفر لك
** السكن في بيت الشجره جميل..لكن عيبه صغر المساحه وهي كانت تجربه لن اكررها
** لاتوجد اماكن ترفيه او اسواق الا في كوتشين سمعت فيه حديقه مائيه ومول رائع لكني مافكرت ازورها
**وكيرلا مناسبه للعزاب اكثر من العوائل.. رغم اني شفت عوائل كثيرة جدا.. او بالاحرى العوائل اكثر من العزاب
** الفلوس خذ معك سعودي وحول هناك لروبيه افضل في الصرف
** خذ من هناك شريحة فودافون اكرر فودافون لأنها افضل تغطيه من جميع الشركات من تجربه وسعر الاتصال رخيص للسعوديه.. طبعا الافضل تطلعها من المطار لكن لازم يكون معك صورة شخصيه ..انا خليت السواق يطلعها باسمه قبل السفر ولما وصلت حصلتها جاهزه
** لاتفوت فرصه شراء الفواكه المحليه واخص الموز صغير الحجم قد الاصبع لأن طعمه في المخ ..!!!
** دوراة المياه ( اكرمكم الله ) بفلوس..مبلغ رمزي لكن نضافتها مقبوله..وضروري جدا جدا تاخذ معك معقم يدوي صغير
** لاتنسى ان تتفكر في خلق الله تبارك وتعالى.. وان هذه الدنيا فكيف بجنة الآخره..!!
** المساجد متوفره ولله الحمد.. فلا تنسى الصلاة فيها طاعة لله ثم السلام على اخوانك ودعمهم سواء دعم مادي او بكتب او مصاحف.. تبقى صدقه جاريه لك ان شاء الله
** الطرق ضيقه وطويله وفيها تعرجات تسبب الغثيان.. فضروري استخدم حبوب الدوار
_-_ كــــــــيــــــــــرلا _-_ عروس الهــــــــند 2010 
