.. السلام عليكم ورحمة الله وبركاته ..
صبآحكم و مسآكم كيف مآتتمنوه 
أحبتي أعضاء منتدى زاد المسافر يشرفني أن أضع تقريري الأول بإسمي في المنتدى
وأشكر الأخ سليمان الذويخ الذي قام بنقل عدة رحلات لي من قبل في زاد المسافر
وباذن الله يكون في تقاريري ماهو مفيد لمحبي السفر الى تركيا - اسطنبول
في اجازة منتصف الفصل لقينا عرض حلو مايتفوت الى تركيا - اسطنبول ( تقريبا في شهر ابريل أو مايو 2010 ) اللي يحب يزور تركيا لايفوت زيارتها بهالموسم رائعة جدا 
ولاني سبق ونزلت تقارير لاسطنبول ماحرصت على عمل تقرير كامل
وحبيت تكون تقارير منفصلة لبعض الاماكن اللي اعجبتني في الرحلة
وحنا هناك اقترحت علينا بنت خالي ربي يسعدها ويعطيها العافيه اننا نزور حديقة البلدية في فلوريا وكانت اول زيارة لنا لهالحديقة عجبتني كثير فصورتها واشوفها مكان حلو للتمشية في اسطنبول اتمنى تفيد محبي السفر الى تركيا - اسطنبول 
.............................................. الدخول طبعا مجاني واسعار المطعم و الكوفي شوب رمزية لانها تابعه للبلدية
الحديقة فيها : العاب اطفال , مضمار سباق , ممشى , كوفي شوب , مطعم , مشتل , مدينة مرورية
هذا مدخل الحديقة نسيت اخذ له صورة من البداية
توصلك سيارة الاجرة او الباص الى هذه المنطقة فيها مطعم وكوفي شوب
ومكتب خدمات وأمن
واذا احتجتوا كراسي متحركة بتلقونها مجانية بس تتركوا اثبات عند المركز وتاخذونها 
والحلو في اسطنبول هذه المرة انهم بكل مكان زارعين توليب بشكل حلو ومنسق والوان مختلفة شكله ع الطبيعة رائع جدا وفي الحديقة الوانه كثيرة وتنسيقه حلو 
هذا الطريق ياخذك الى الكوفي شوب
كان الجو اول ماوصلنا غائم مع هتان والجو حلو للتمشية قمنا نتمشى في الحديقة وهذي بعض الصور صورتها خلال الـ 3 ساعات اللي جلسناها فيها 
هذي بحيرة صناعية صغيرة بس شكلها حلو ع الطبيعة 
على انها حديقة عامة بس ماشاءالله مهتمين بنظاقتها وتنسيقها لو عندنا كان شيء ثاني 
مضمار سباق
اعجبتني انواع الاشجار بالوانها و اشكالها المختلفة 
هذا كوخ فيه دجاج وديك ماحب هالاشياء ولا كان دخلته 
طولت كثير بالتصوير واتصلوا علي أهلي قالوا تعالي تغدي 
رجعت لهم وفي الطريق شفت هذي مثل حديقة مرورية مسوينها مافيها سيارات بس الاطفال اللي معاهم سياكل يلعبوا فيها مع اهلهم دخلت المطعم وعلى انه حكومي و اسعاره عادية الا انه نظيف وحلو من الداخل الحديقة صورتها من داخل المطعم
ماصورت الا كم طبق لاني وصلت متأخرة 
الكاورما
كفته
الذ حلو في تركيا بس بهالمطعم ماعجبني اكل المطعم نظيف ومرتب اعطيه 3\5 كتقييم للأكل و 5\5 للنظافة والخدمة
بعد الغداء حبينا نهضم شوي وهذا اول ماطلعت من المطعم يقابلك
الكوفي شوب والمشتل ولقينا سعر وردة التوليب الوحدة بـ 2 ليرة يعين 5 ريال
مدري بكم زارعين اسطنبول اذا هذا سعرها مطلع ثاني للكوفي شوب غير اللي في اول التقرير
ولانه قريب من المطار كل شوي تشوي طيارة مارة من فوق الحديقة
هذا الممشى
شكل الغيوم من بعيد كان حلو
جلست شوي وانتظرت الشمس لين بدأت تظهر من بين الغيوم
حاولت اطلع بصورة حلوة لكن للاسف هذولي اللي طلعوا معي
حبيت هالصورة لانها اول محاولة لي بتجربة اعدادات يديوية للكاميرا حتى لو كلها عيوب 
وهذي بعض صور الورود اللي حاولت اصورها واخيرا هذي صورة صورها ولد اختي بس اعجبتني كثير
في النهاية
اتمنى يكون التقرير اعجبكم ولكم جميعا اتمنى قضاء اجمل الأوقات اينما كنتم
.. تقبلوا مني اعطر واعذب تحية ..
.. حديقة بلدية فلوريا .. 
187.gif)
