بإنتظار التكمله والصور

وجزاك الله خير على انك وديت الوالده معاك .... كسبت فيها اجر

ماشاء الله الربع صافين دور هههههههههههههههههه

خلوني انزل التقرير اول يا حبكم للاماكن الاولى


على العموم ابشروا باللي يسركم:poster_av1:

السلام عليكم جميعا

اليوم راح اكمل من المطار والحمدلله دخلنا المطار والعيال تريقوا وكانت الفرحه مو شايلتهم


صوره من المطار او من البوابه وتبين طيارتنا اللي راح نركبها وهي من نوع بوينغ 777 المخصصه للمسافات الطويله











ركبنا الطياره وكنا على صف واحد اربع مقاعد لان الطياره فيها ثلاث صفوف كل صف ثلاث مقاعد وكانت جارتي عجوز هنديه قبل لاتطير الطياره نايمه الله يعينا لكن الحمدلله الصف اللي خلف الاهل كان فاضي وعلى طول حجزته اول ما صكوا الباب وقزرتها عليهم بالنوم لاني من المدخنين الله يبعدكم عن التدخين وطول الرحله الواحد مصدع بسبب الزقاره الله ياخذها


اخوكم بالطياره انواع التعب والارهاق شوفوا الهنديه من الحين نايمه










ما اطول عليكم الرحله كانت متعبه لاخر درجه خصوصا للمدخنين اياهم وطبعا الطاقم كان متعاون جدا والخدمه ممتازه لانها رحله طويله الافلام كانت تقريبا 8 افلام جديده العيال من الوناسه ماذاقوا النوم طول الرحله

انا قلت لهم لحد يحاول يقعدني خلوني انام ليمن نوصل طبعا مستحيل انام ساعتين على بعض مع ان المكان مريح جدا والمظيف كل ساعه يمر علي ويخزني تقول ذابح اهله وكل ساعه يقولي ها نمت عدل


عاد انا بروحي صابر ومصدع كلمته قلت له اشفيك عسى ماشر قاللي يبا اشخيرك واصل لاخر الطياره :ranting:

واله مو مني لكني سهران وانا مو متعود على السهر ولا احبه

مالكم بالطويله وصلنا مطار جي اف كنيدي والحمدلله وانا عارف السالفه قلت للاهل بسرعه نطلع قبل الزحمه لان الممر طويل جدا وفعلا نزلنا بسرعه ليمن الجوازات والحمدلله كانت الامور سهله جدا وكالعاده بصمنا ووصورونا وخلصنا من اجراءات التفتيش لاني كنت مسجل عندي اكل وطبعا لازم يشوفونه

وهني احب انصح الكل لازم تقول شنو وياك ولا تحاول تتهرب لانهم لو يصيدونك يمكن يغرمونك غرامه كبيره

والمساله عاديه جدا اي شي تجيبه معاك لازم يكون مغلف وعليه ستكرز لمده الانتهاء فقط لاغير


طلعنا وكنت حاجز لنا ليموزين من النت سعره 150 دولار الى الفندق وكانت هذي هديه لضاري لانه كان من المتفوقين والحمدلله وكان وده يركب ليموزين بالكويت فخشيتها له في المطار وكانت له المفاجاه الثانيه
الليموزين واقفه عند الفندق

اكمل معاكم الرحله

وصلنا الفندق وهو امباسي سويت تابع لشركه هلتون العالميه يمتاز هذا الفندق بغرف السويت فقط وبما اني من منتسبين هلتون اكيد راح يعطوني غرفه كبيره او يسوون لي اب قريد وفعلا مثل ما توقعت عطوني سويت كبير عباره عن غرفتين ومطله على البحر الجميل ويمتاز الفندق بالفطور المجاني اللذيذ طبعا امريكا اللي راح لها يعرف شنو الفطور عندهم هذي بعض الصور للفندق لكن للاسف ما صورت السويت من الداخل




في الطريق الى السويت








لقطه مع العيال











لقطه من الفندق

طبعا نيويورك اللي يبي يروح لها اول شي ياخذ الباص السياحي وهو موجود في التايم سكوير وسعر التذكره تقريبا 25 دولار وهو من طابقين مثل باصات لندن وفيه مرشد سياحي يقرق فوق راسكم ساعتين وتكلم عن كل شي في نيويورك وهذا الشارع اللي مثل فيه سبايدر مان وهذا المطعم اللي اشتغل فيه سبايدر مان وهذا مال باتمان انواع القرقه وكل ساعه يقول انا والسايق لاتنسونا من التب او البخشيش

الحلو اللي في الباص انك اذا تبي تنزل اي محطه تنزل عادي وتقدر تاخذ الباص اللي وراه وتحتفظ طبعا بالتذكره لانها ليوم كامل وفي رحلات بعد حق شلالات نياغرا بس المده ثلاث ايام ما حبيت اروح لها



ضاري ولدي مع الباص السياحي










هذا الشخص لابس مثل تمثال الحريه والصوره معاه ب 10 دولار







هذا الحنطور عند السنترال بارك اكبر حديقه في امريكا وهي حديقه مشهوره جدا وفيها العاب ومطاعم










اخر صوره في نيويورك حق مطعم ومتجر بلانت هولييوود الشهير








اتمنى انكم استمتعتوا بالرحله وياي وان شاء الله اكون وفقت في سرد اول رحله لي الى نيويورك


اذا في اي اضافات او تساؤل ياليت تسالون ومايردكم الا لسانكم


الرحله القادمه الى لوس انجلس الجميله

انتظروني

اخوكم ناصر كويتي

ما شاء الله عليك يا بو باسل
سرد ممتع .. وصور جميلة .. ويستاهل ولدنا ضاري تشتري له لموزين بعد ..