السلام عليكم

كيف حالكم يا اعضاء الزاد ان شاء الله تكونون باحسن حال

حبيت افتح موضوع خاص عن الطيران السيئ وتجاربكم معه

وارجو ان تنقلون لنا تجاربكم بصورة غير مبالغ بها حتى نستفيد منها ولا نقع بنفس مشاكلكم مع هذا الطيران ونتحاشاه بالمستقبل ..

في البداية احب اكتب تجربتين لي مع احدى شركات الطيران السيئة نبدأ بالاولى :

الخطوط الجوية الاردنية ... كان خط سير الرحلة كالتالي كويت اردن - اردن ميونخ ,,, طبعا كان معي طفل اقل من سنتان ولا يعطونه كرسي لذلك اكدة للكاونتر على الجلوس في مقدمة الطائرة واشار لي بانه اوكي تم ذلك بحكم اني معي طفل اقل من سنتان ,, عندما ركبت الطيارة تفاجأة اني بالخلف انا وعائلتي :4:
وعصبت وكلمت المضيف على هذا وقال لي حنا آسفين وطاحلي اعتذارات لاتسمن ولاتغني من جوع ,, قلت للمضيف انا راح اخذ كرسي واحط ولدي فيه والحمدلله الطيارة كانت يوجد بها بعض الكراس الفاضية ونسقت مع بعض الركاب والطلب منهم وعدة على خير ,,

الشغله الثانية لابد من المبيت بالاردن ويعطونك ليلة في فندق المطار ومن باكر تسافر الي ميونخ ,, خلونا نتحدث عن مطار الاردن مطار الاردن يا اخوان للاسف سيئ جدا من جميع النواحي لايوجد فيه مطاعم معروفة او بالاصح عالمية وعزكم الله حتى الحمامات لايوجد بها شطافات للمسلمين كي يتجدد للصلاة او .....الخ
فندق المطار اوووو يافندق المطار كان يرمم وكذلك كان جدا سيئ وبالصفة لقيت واحد معي سولفت وياه وقلت فندقهم مو شي وقالي تصدق انا السنة الماضية كنت بالفندق هذا وكان يرمم وتوقعت انه خلص الترميم ... قلت شكلهم مطولين يمكن اكثر من 5 سنوات على مايخلصون ,,
وكانت الطائرة التي اقلتنا الى الاردن صغيرة كانت توزيعتها 3 كلاسي يمين و3 يسار توقعت انه المسافة بين الكويت والاردن قصيرة لذلك اعطونا هذة الطائرة وقلت يمكن لما نروح الى ميونخ يطلعونه بطائرة كبير مثلا تربل 7 او 747 او ماشابه ,, ولكن للاسف ذهبنا الى ميونخ وكانت الطائرة فل بنفس حجم التى اقلتنا من الكويت الى الاردن

والحين راح اتكلم عن مشكلتي او مشاكلي معهم في العودة من ميونخ الى الاردن ..

ذهبت مبكراا الى مطار ميونخ والحمد لله كنت اول واحد يقف على الكونتر وكان مقلق يحتاج نصف ساعه للفتح ولما فتح كنت اول واحد ينجز حجزه وطبعا كانت لي معهم سوابق بالطفل كلمته وقلت له معي انفنت رضيع والله ياجماعه اني شلت ولدي وخليته يشوفه علشان يحن علينا والله ياجماعه لما ركبت الطيارة مطشرنا تطشر 3 بصوب و2 بصوب و2 بصوب اخر والخدامه بصوب

وقلت لا قد بلغ السيل الزبا

ورحت حق المضيف وقلتله وين مسئولك قالي فلان واشار عليه ورحتله وكلمته وقالي الحين اضبطك بس خل الطيارة تطير وقام يعطيني من ابر التخدير ,, المراد لما طارت الطيارة لاعادت من خطوط رحت اتلفت يمين وشمال ورحت اكلم فلان وفلان واترجاهم علشان الم شملنا من جديد :3:

ولا ابشركم بشغله ثانية قسما بالله الحمامات اللي بالاخر واحد مخلينه مخزن والثاني لعموم المسافرين ومايحتاج اقولكم عن الطابور اللي صار بعد الوجبة اطفال يبون الحمام بجي بالممر مو قادرين يدشون الحمام بسبة الزحمه اللي صارت وكلمت المضيف وقلته ماتستحون ماتسمع الاطفال يبكون افتح الحمام الثاني قالي مفتوح بس فيه واحد ,, قسما بالله انه مغلق للتخزين وانا شخصيا رحت اودي بنتي للحمام وشفته ماعليه حركة كلش ...

ما قول الا حسبي الله عليهم ونعم الوكيل ,,

هذي تجربتي مع الطيران الاردني ..

اما تجربتي الثانية راح اسردها لكم بعد ما شوف تجاوبكم مع الموضوع ...

الله يعافيك ,,, برافووو عليك والله انا قلطتي اني كنت بروح على اللفتانزا وكان الفرق بسيط بالسعر بس الله يهداه واحد من الربع مدحلي الطيران وندمت ,, بس الحين انا وياك اضم صوتي لصوتك ..

مشكوررر يالغالي ..

الله يعينكم ..

انا كنت متخوف من هالخطوط لكن الحمد لله ان اموري كلها تمام ماعدى كم رحلة في افريقيا

طبعا الخطوط السعودية حدث ولا حرج وفي اخر زيارة للمغرب استغربت من الخدمة شي فوق الخيال سواء بالذهاب على السياحية او العودة على الاولى ما توقعتها منهم

بالنسبة للخطوط المغربية ممكن عيبها بما ان الرحلة طويلة ان ما عندهم برامج بالرحلة والا الطيارة ماعليها تعتبر زينه

وانصح اختيار خطوط صاحية وترتاحون ولكن عندي ملاحظة لخطوط طيران الامارات او الاتحاد او القطرية الطيارات اللي تجي تاخذنا لك عليها لكن اذا غيرت الوجهة لقيت طياراتهم فخمة و حلوة ،،،

حياج الله اخت دموع الوجد

واشكرج على تجربتج مع الخطوط التركية كي نستفيد منها ,,

انا سافرت على الخطوط التركية وكنت مسافر الى برشلونة وكانت ملاخظتي كالتالي

يرسلون طيران جدااا سيئ او قديم الى الشرق الاوسط ,, اما الى باقي المعمورة وخصوصا اوروبا يرسلون الطيران الجديد .. وهذي من خلال تجربتي ..

والغريب اللي لاحظته عندهم انه الماء الذي تشتريه من سوق الحرة غير مسموح دخوله الطائرة عكس باقي المطارات !!

هذي كانت تجربتي معاهم بسيطه نوعا ما يمكن علشان كنت مسافر على درجة رجال الاعمال وكان الوقت بشهر اكتوبر يعني بدون ذروه ..

وشكرااا لج ..

ياهلا باخوي kabayan

والله يعين الجميع ,,

ومشكووور على مداخلتك كي نستفيد منها ولحمدلله انه امروك زينه مع الخطوط السعودية ,, طبعا اللي عرفته منك انك مستغرب انها تكون زينه بالمره الاخيره :3:

انا سافرة عليها مره من مطار الملك خالد الى مطار الملك محمد الخامس والحمدلله كانت الطائرة جديدة وفاضية وصراحه كانت السفرة ممتعه ..

شكرااا لك ...

الحمد لله رحلاتي الى اوروبا موفقة بفضل الله ثم اختيار الخطوط الجيدة

انزين شو رايكم بالطيران النمساوي ؟ حد جربه ؟

ياهلا ابو عبدالعزيز حياك الله ,,
الحمدلله انه رحلاتك موفقه وان شاء الله تكون دايما موفقه دون مشاكل انت والساده الاعضاء باذن الله ,,


ياهلا اخوي ,, ان شاء الله الاعضاء كرام يفيدونك عنه انا ماجربته ..