اصبحنا واصبح الملك لله سبحانه وتعالى....

تريقنا ونزلنا الشنط ....وسلمنا الشنط الكبيره للأمانات وخذينا وصل

وعملنا الشيك آوت...وبانتظار الباص....

وصل الباص متأخر 1215 والمكتوب يبين من عنوانه....!!!:105:

الباص قديم والتكييف تعبان واعتمدنا على الهوا الخارجي...

ومن هنا بدأت رحلة العذاب ...

الطريق ساعه الى المينا ومرينا خلالها على فندقين خذينا معانا أجانب...
( وسايق الباص كان ماد البوز طول الوقت ومعاملته!!! )


المهم وصلنا المينا( دايخين من السياره وبدون تكييف)

سلمت الفاوتشر وخذينا التذاكر ودفعت 600بات للوصول للمنتجع

وقالي تذاكر العوده اشتريهم من المنتجع وقت الرده...

وراح تكون 150 بات لكل شخص !!! طوفوا وخلونا نركب بهدوء...

وعطونا ستيكرز وعليه هوليدي ان...

وركبنا الفيري.... :105:

وكان قديم شويه وزحمه... تحط الشنط اول ماتركب وتدخل تدور لك مكان...

وعلى ماتدور مكان الا انت دايخ... :4:


وهو عباره عن ثلاث طوابق ... السطح واول وثاني تحت...

ومن سوء الحظ مالقينا الا تحت...








ولدي الكبير من اولها قال انا مااقدر اقعد راح ادوخ بركب السطح والصغير ألحقه بعدها...


وزعوا حبوب دوخه للي يبي(احنا اولردي ماخذين)

وبعدهاالاكياس(سبحان الله شي نفسي انا من شفتهم بدت رحمة الله)


من تحركت وانا كنت بدنيا ثانيه والبنات يمي ومو عادتهم يدوخون...

شوي ونزل لنا الصغير وقالي ماما تعالوا فوق برا خلي ينعشك الهوا

وصعدنا انا والبنات وطلعنا برا بس من الهوا والدوخه مو قادره حتى اصعد السطح...

وكانت شمس حنانيه اوف... قلت خلونا ندخل احسن...طبعا كلها دقايق...

وغصب قدرنا ندخل لان بدينا نفقد توازنا وقعدت بأقرب كرسي وماحسيت بنفسي...
(وكنت اول واحده بالفيري استخدم الاكياس)

وحتى البنات بدوا يدوخون بس بسم الله عليها الصغيره ظلت حبيبتي متماسكه...

مرت ساعتين و45 دقيقه... عذاب بالنسبه لي ... وموقادره اشيل نفسي...

البنات حوالي...بس الشباب موقادره اوصل لهم...وحاولت ادق على الكبير مارد علي...

تصوروا انا بحالة نفسي والا احاتي البنات والا الشباب الي فوق...

وقفنا عند المينا الرئيسي ونزل لنا الكبير يتطمن وقال اخوي تعبان...

وقريب نوصل المنتجع نزلوا حبايبي والا اشوفهم محتقنين من الشمس

والصغير مستوي حبيبي(وقعدت ابكي على حالته):4::4::4::4: بعد عمري


وطبعا عرفت بعدها القصه من اخوه الكبير ...
انه لقاه برا عند الدرج بين الشنط حبيبي وكان دايخ ونظارته طاحت بالبحر..
وربي احفظه ماطاح بالبحر لانه داخ وماحس بعمره...

وطبعا الاجانب الموجودين كل نفسي نفسي محد له شغل مت او حييت...:105:

وقالي ماما لقيته كأنه لاجيء بين هالشنط ودايخ وخذيته معاي فوق...

والصغير عندي بسمالله عليه بارد وهادي ما يتكلم...


وظليت ثلاث ايام كل مايقولون السالفه انا ابكي ... :4::4::4::4: لما خليتهم يسكرونها...

ومنها حلفت مانركب الفيري مره ثانيه بالعوده مهما كلفني المبلغ....


وخلونا نغير شويه بعد هالنكد وشوفوا معاي هالصور بالطريق

(من تصوير الشباب الله يحفظهم لأني ماشفت شي وقتها )













































وقبل لا ننزل شريت تذاكر العوده 150بات من هالريال الطيب الصراحه كسر خاطري...

ظل اكثر من ربع ساعه وهو يهف علي اول مادخت وهو يقولي سلييب سلييب...
وظل يهف على انا والبنات لما ردت فيني الروح شويه وغفيت...

وحاولت اعوضه وعطيته المقسوم وموحسافه فيه عليه بالعافيه...


والحمدلله انتهت رحلة العذاب....ربي لا يعيدها...





ملاحظات سريعه:

* بالنسبه للباص المفروض اني من اولها لما شفته قديم اعترض
بس كنت أحاتي الوقت(وقدر الله وماشاء فعل)

* الفيري طريقه طويل وكنت احسب انه منتجعنا بعيد...
عرفت بعدين ان مر بجانب منتجعنا وكمل للمينا الرئيسي
وبعدها رجع لمنتجعنا...

* طبعآ مو الكل داخ بس الاغلبيه...

* أحوال البحر عندهم غير مستقره يعني الي
بيدخل البحر يتحمل كل شي...



يتبع....

خلوني أقول لكم سالفه ضحكتني بعد مانزلنا وارتحنا...

ولو اسولفها حق احد يعرفني شخصيا مايصدقها...:3:

على آخر الوقت واحنا بالفيري...

فجأه بنتي الصغيره فزت من مكانها يمي مرعوبه...

وقعدت وراي!!!

سألتها شصار أشرت على الكرسي الي جدامنا... !!!!!!!!

المتوحش يحوس بين اللايف جاكيت والكرسي


طبعا هالمرعب الكائن الوحيد الي أموت من الخوف منه...

ومن تعبي ماتحركت من مكاني وهو رايح راد...

وتجرأت وضربت الجاكيت بايدي علشان يموت... وما مات!!!

وظليت باقي الوقت أراقبه مرعوبه وهو يتجول :3:


وهذي اول مره تسجل لي بالتاريخ أحاول أذبحه بهالطريقه


وماأظن أعيدها...

وتلوموني ليش ما أحب الفيري...

المهم وصلنا...


وقالوا يالله هوليدي ان ينزلون الحين وكان اللونق بوت من المنتجع ينتظرنا...


ونزلنا بعد ما اشرت لهم على اغراضنا وقالوا نزلوا واحنا نتكفل بأغراضكم...

ركبنا اللونق بوت...







ومنه الي عربانه صغيره يسحبها تراكتور صغير مثل الى يستخدمونه المزارعين...

ومنه الى درج صغير...






الى الكافيه... كانوا مجهزين طاوله لخمس افراد مع العصير والفوط...




الصراحه مرتبين وايد واستقبالهم هون علينا شويه...

مجرد توقيع ورحنا غرفنا...

ونقلوا اغراضنا من الفيري الى الكوخ...





وكان طلبنا 2 بنجلو مطل على البحر(مالقينا على البحر مباشره للاسف)

عطونا اثنين لازقين(بنجلو عائلي) بينهم كونيكت

واحد يطل على البحر طبعا يالله تشوف البحر...

والثاني يطل على الحديقه...

اول شي اعترضت لاني طالبه الاثنين على البحر

بعدها قلت لأ يكفي قربنا لبعض وقلت حق الشباب

اخذوا الي على البحر ماتفرق معانا...

الغرف كانت حلوه وسيعه ومرتبه وهونت علينا الرحله...



وهذا البنجلو بالصور...(ثاني يوم من وصولنا)




























وهذا كوكيز هوم ميد ضيافه( وكان لذيذ صج هوم ميد)





وهذا الفيو على البحر...يدوب تشوف البحر...









وهذا فيو الحديقه...هم حلو...









وبعدها رتبنا اغراضنا على السريع...


وفجأه صرخت واحده من البنات...!!!!


بس شافت هالورقه عند راسها... :3:





وهذا الضيف اللطيف... (الحمدلله اني ما أخاف الا من الوحش الي ما ينذكر) :3:

وصار الضحك...:3::3::3:


وظلمت الدنيا وكان الجو روعه الفيو أروع مع القمره...

جو شاعري رومانسي ساحر...











المهم انا الشاطره مايبت معاي بوصله للصلاة

(وادري يمكن الي اسويه مايعجب البعض)

بس اذا كنت مضطره احط الخريطه...

واحاول اضبط مكان الجبله بروحي واصلي على النيه...


صلينا وطلبنا عشا خفيف ونمنا بدري...

(طبعا ماكان في تلفزيون بالغرف)

وانا مثل العاده اكتب ملاحظاتي للزاد قبل لا انام...

وبعد عمري بنتي الكبيره ما نامت ليلتها ...

خلينا الليت مفتوح وكل شويه تقوم

تعمل زوووم على الطوفه والغرفه وترجع تنام....

وتسألني بعد عمري ماما شفتيه؟؟

وانا أقولها لا ماما ردي نامي...

وانا شايفته على الطوفه رايح راد...:109:

بعد عمري ظلوا ثلاث ليالي مرعوبين منه...





والحين أخليكم الى بكره

ويوم جديد في بي بي آيلاند و تلة الغروب وسحرها...

صحينا بدري على الساعه 530 الفجر...

شوفوا المنظر...تبارك الرحمن...










وخذيت لي لفه حول الكوخ...




وهذا لغسيل الأرجل أعزكم الله...ينزل الماء على شكل نقط بطيئه...
(عجبتني الحركه)









الجو منعش ومليان اوكسجين...

والكل كان جوعان للأكل ولاستكشاف المكان....

طلعنا على الساعه 630 نفتتح بوفيه الريوق ...


وماشاءالله واحنا عند باب الكوخ استقبلتنا غيمه بمطر قوي منعش...






وخذينا الشماسي الكبيره من غرفنا وكانوا موفرينها بكل مكان...




وطلعنا نتمشى تحت المطر واااو كان منعش مع نسمات الهوا...

الى ان وصلنا المطعم المخصص للريوق...

وكان الريوق يعني مو بمستوى أماري بس الحمدلله نعمه
صمون وجبنه وزبده ومربى يغنون ويشبعون...

طلعنا من الريوق وخذيناها تمشي على البحر ...الى ان وصلنا الكوخ...






























واتفقنا نرتاح شويه وننزل للبحر...

وطلعنا وكان الجو عجيب وماي البحر بارد ونسمات الهوا أبرد...

ووقتها كان ينزل المطر يرش علينا من خيره من وقت لوقت وكأنه يسقينا...










تبارك الرحمن...من أجمل السواحل الي زرتها....






وبدأت تتساقط الأمطار....








وخفت على الكاميرا ...






وبدا يبرد الجو ولفوا نفسهم بالفوط...




ولاحظوا جمال الغيوم...سبحان الله...









ولازم نتذكر ونضع له بصمه صغيره....











سبحنا واستمتعنا وماحسينا بالوقت الى الساعه 1130الضحى...

وبعد الدوش... جرس الجوع بدأ يدق بقوه...


يتبع...

وطلعنا نتمشى الى ان وصلنا لمطعم تابع للمنتجع...

والكراسي والطاولات على البحر مباشره...







وكان طلبنا المعهود والآمن دائمآ.... بيتزا...

باستا بالكريمه والجبن...وسلطه...


بس جد خلوا الأكل واستمتعوا بالجو...







لأول مره من خلال زياراتي لتايلند...
يكون الجو بهذي الروعه والانتعاش...


رجعنا للبنجلو...

وهذي الصور بالعوده...

المشروم العملاق...













وماشاءالله مازال فينا طاقه...
(أظن استمديناها من الجو والمطر المنعش)


الاولاد طلعوا يستكشفون المكان...

وهم برا فاجأهم المطر وخلاهم يرجعون للشمسيه...


والصراحه الجو اغراني اني اطلع معاهم ونستكشف كلنا المكان...


وظلينا نتمشى وكانوا موفرين صالة جيم وصاله للبلياردو والبيبي فوت...وصالة عرض افلام...


وكانوا حاطين جدول لكل الفعاليات الموجوده عندهم بالمنتجع...


ومن ضمنها دروس للطبخ التايلندي...


وبعدها وصلنا الى بقعه كبيره فيها شجيرات متناثره هنا وهناك وعليها لوحات...

ويسمونها شجرة الازواج او المحبين...
للي يتزوجون عندهم بالمنتجع...















وكملنا وهذي صور اعجبتني...


















واصلنا المشي الى ان وصلنا للاكواخ المطله على الجبل...

وكان مكانها مرتفع شويه... ويحتاج لياقه...

ولقينا لوحه تشير الى تلة الغروب...













يتبع......

وبدينا نصعد السلالم ...(متعبه شويه)






ووصلنا الى القمه... ولقينا على اليمين ملعب التنس هذا...







وعلى اليسار كان سكن العاملين بالفندق...


واصلنا ...

وهذي اللوحه المنتشره بكل مكان بالمنتجع تدلك لآمن مكان تتوجه له...


اذا لا سمح الله حصل اعصار او زلزال (تسونامي)









وهذي هي القمه...











وهي بالجهه الاخرى لجزيرة بي بي آيلاند...

ولارتفاع المكان ولخطورته...وضعوا حواجز ولوحات تحذيريه...








وخريطه توضح الجزر المحيطه...





وهذا المكان للي يحب الغروب...ممكن يشوف الشمس وهي تودع الجزيره من اهني...

جلسنا على احدى الطاولات وطلبت بنتي الصغيره عصير من كشك العصير...

ومن شدة الرياح ماقدرنا نظل للغروب التام وفضلنا ننزل...





































































كشك العصير والمثلجات...

يتبع...

أصبحنا واصبح الملك لله سبحانه وتعالى...ربي لك الحمد والشكر..

انعمت علينا برحمتك وحفظت لي اولادي...


اليوم صحينا متأخر نسبة لأول أيام وصولنا...على الساعه 730ص...


طلعنا كلنا للريوق... وبعدها قلنا نشيك ونشوف أي جزيره نروح!!



وكان هدف الاولاد من الكويت شاطيء مايا باي...بس للأسف الجو


ماكان يسمح واصحاب المراكب قالوا مانقدر نوصل...


شاطيء مايا باي من اجمل الشواطيء واهدأها وانظفها...


ويبعد 45 دقيقه من منتجعنا باللونغ بوت الخشبي...




(من النت)







وغيرنا وجهتنا لاقرب جزيره

وتقدر تشوفها بالعين المجرده من منتجعنا...









وهي جزيرة البامبو...ويرتادها الغواصون لصفاء المياه حولها...


وقررنا نروح خاصة انها تبعد باللونغ بوت 20 دقيقه...


واتفقت مع احد المراكب على مبلغ 1300بات لمدة اربع ساعات

(ماخذيت الي تبع المنتجع لان اسعارهم أغلى)



وجهزنا اغراضنا (وشرينا من الكانتين التابع للمنتجع ماي وغيره)


وتوجهنا على الساعه 1045...

(وأصريت على اللايف جاكيت بس الكبير ماقبل)

بس الحمدلله كلهم يعرفون يسبحون...

ولاحظوا هدوء البحر ماكان يوحي بالموج والهوا أبدآ












وتحرك القارب...













وكان الموج عالي نوعأ ما خاصة ان اللونغ بوت حدوده نازله...

والصراحه سبب لي رعب وماخليت آيه قرآنيه ودعاء ماقريته بقلبي...























واشغلت نفسي بالتصوير الي ان وصلنا..

وطول ما آنا اصور عامود الهاند باق مخرب الصور
(وخايفه أمد ايدي وأنزله):105:





















كله خايفه يختل توازن المركب وأخيرآ تجرأت لما قربنا





















وأخليكم مع الصور...












































ومن شدة الرياح ماقدر ينزلنا قريب وغير وجهته ونزلنا ابعد شويه...

















وصلنا ومثل العاده آنا أتنح بالنزله وخليته يقرب المركب اكثر واكثر...




يتبع...

وبعد مانزلت....

























ودفعنا 200بات عن كل فرد مقابل استخدام الشاطيء...



ومشينا مسافه صغيره الي ان وصلنا...












نظره سريعه...لفة صغيره حوالي...


















كان لون البحر عجيب ... كل شوي يعطي لون...سبحان الله...


وشفاف مثل حمام السباحه...

بالرغم من ارتفاع الموج... وذكرني بشاطيء ميامي بيتش...






















و زووووم من وقت لوقت ...
جزيره ثانيه مو بعيده...


















أول ما وصلنا ماكنا ناوين نقعد أكثر من ساعه...لكن بعدها بدا الموج يهدأ...

وبدا المكان يفضي والكل غادر...وصار المكان لنا...

وأخليكم مع الصور تستمتعون معانا...








مشروع مطعم على قدهم ويطبخون عند الطلب...







خيام منصوبه اذا حب أحد ياخذ غفوه والا يبات عندهم...(ماسألت عن أسعارهم)






سبحان الله حوض سباحه عملاق...

























يتبع....