الاثنين 17/10/2011
اخر يوم لنا ف زيلامسي
صحينا من وقت .. ونزلنا لصالة الفطور
فطورنا
الحمام عزكم الله .. 
بعدها اتوجهنا للريسبشن وطلبنا جدول بمواعيد الباص اللي بياخذنا لشلالات كريمــل ..
ووقت وصول الباص الساعة 9:15 .. وكان عدنا وقت كافي تقريبا نص ساعة .. ومقابل محطة الباص محل شبيه بمتجر يبيع بضايع متنوعة ..وذات جوده عاليه ..يعني مثل مستلزمات الاطفال ومستلزمات التجميل والزينة وصيدلية .. وغيره
اشتريت من عندهم كذا شغلة حبيتها
وصل الباص
الرؤية حسيتها معدومة والسبب ان درجة البروده بالليل 1 درجه مئوية .. فالعشب يتجمد وتشوفه ابيض الصبح .. وبعدها يبتدي يتبخر عالبطيئ .. فتلقى الضباب فالقاع .. وكأنه غيم بس فالاسفل
فما كنا انشوف اي منظر ..
لحد ما اقتربنا من الشلالات ..بدت الشمس اتبين .. نزلنا .. واتوجهنا لمدخل بيع التذاكر
صورة التذكرة
هالمكان في نفس مكان الدخول
مشينا مسافة لجدام .. 
وصلنا لبداية الطريج لصعود الجبل __ الصور كله تدريجيا __
الصعود فالبدايه حماس وممتع ..وفيه اكثر من مكان للاستراحة .. ولكن بعد ماتوصل لمراحل اعلى بتحس بتعب
وكل مانصعد لاعلى نقترب من الشلال اكثر
تعبنا من كثر المشي .. وخصوصا الصعود ياخذ جهد اكبر ..
واخيرا وصلنا لمحطة توقف وفيها كانتين صغير يبيع المشروبات والوجبات الخفيفه
ف خذنا ايسكريم
الايسكريم لذيذ وماعدنا مثله ف الامارات
___
عاكانتين من برع حاطين قطع من الاشجار الموجوده عنده وعليها اساميهم
كملنا المشوار
لحد ما وصلنا لهالارتفاع ...
طبعا توقفنا اجباري .. لأنه مش مسموح تعدي هالارتفاع بسب اعمال الصيانه
++++++++
ونزلنا مره ثانيه لكن النزول كان امره هين ..
وتوقفنا فهالمكان الرائع
واغلبية الناس تيلس فهالمكان ..
حبيت هالورده .. ذكرتني ب ورده جبن بوك :3:
بعدها كملنا مشوارنا للاسفل لحد ما وصلنا لبداية المدخل .. واسترحنا شويه وشربنا كابتشينو لحد ماوصل الباص
طبعا الساعه كانت 3:40 الظهر
ومشوار طويل لحد ماوصلنا الفندق .. صلينا وبعدها نزلنا نتغدا وكان غدانا عالساعة 5 وشي العصر
اخترنا مطعم قيصر وهو ملاصق للفندق ولكن فالدور الارضي
الأكــل لذيذ .. وصاحبه تركي ..
بعد الغداء اتوجهنا للبحيرة
اتركم مع الصور اللي التقطتها
لاحظت انه بمجرد ما الواحد يلقي نظرة عالبحيره الا البط كلهم يتمعون حواليه
رجعنا بعدها للفندق .. لأن اليوم كان متعب بسبب صعودنا للجبل ..
وبدينا بترتيب اغراضنا استعدادا للمغادرة في اليوم الثاني لميونيخ
نصايح مهمه اقدمها لكم ومعلومات ممكن اتفيدكم
- بداية لازم تكتب كل الاحتياجات اللي تحتاجها بالسفر وجهزوها قبل مده من السفر تفاديا للنسيان
- الجو عموما متقلب سواء فالصيف او الشتا.
يعني فاي لحظه ممكن يطيح مطر الافضل أتكون معاكم مظلة صغيره الحجم اللي ممكن انها تنحط فالشنطة الصغيره للرحله
- الافضل أخذ بعض المنتجات مثل الشاي والسكر. .
- قم باختيار التوقيت المناسب للسفر. اي يجب ان يكون وصولك يوم الاثنين او الأحد حتى يتسنى لك مشاهدة المكان ومعرفة طرقاته
- لاتتردد في السؤال اذا لم تكن متأكد من الطريق او تائه. فالشعب النمساوي شعب راقي جداً فالتعامل
ويرحب بالسياح ولديهم رحابه صدر ولم الحظ اي تمييز منهم
-انصح بعدم ارتياد الفنادق الفخمه فهي فالواقع ليست فخمه كما هي في بلادنا.
والاهم التركيز على موقع الفندق وخدماته والسبب الاخر هو عدم تواجدك فالفندق الا في ساعات النوم فقط فكل يومك خارج الفندق
-لا انصح بشراء الحاجيات من النمسا ،، لارتفاع الأسعار فاذا كانت رحلتك مدمجه مع المانيا او اي بلد اخر فأفضل الشراء من البلد الاخر لفارق السعر وهو ما لاحظته عند إقامتي في ميونيخ الأسعار جيده واسترداد مبلغ محترم من الضرائب
- الاستعانة اولا بمركز المعلومات في كل منطقه تتواجد بها ومن ثم بالأوراق الخاصه بك والتي مدون فيها ملاحظاتك
- المكتب السياحي حتى ولو كنت تحمل معك الخرائط فالأفضل دخول المكتب والاستفسار عن جميع الرحلات التي تود الذهاب اليها فهم مزود رائع لكم هائل من المعلومات عن الاماكن السياحية
- استعن أيضاً بخرائط الإوبان في فيينا فهي سهله جداً وأسهل ان استعنت بالخريطة المعروضة فالمنتدى مع الاماكن السياحيه
- بالنسبة للفيشه الافضل انك تاخذ فيشه قبل لا تسافر تجدها فالمطار او على متن طائرة الامارات ان كنت مسافر عليها ولا تعتمد على الفندق في توفيرها لك.
- انصح باخذ كيمرتين ان كنت تستخدم احترافيه فالأفضل أخذ كيمره اخرى معها.
-لا انصح بشراء المياه من المطاعم او محلات التبغ الافضل شرائها من السوبرماركت لفارق السعر
- انصح باستخدام التاكسي فقط عند الوصول وعند المغادرة
- تأكد من السؤال قبل تناول اي وجبه حتى ولو كان المطعم حلال
- لا تستخدم المترو ليلا ولا انصح المكوث خارج الفندق او المشي ليلا. لوجود العديد من الاشخاص في حاله سكر
++++++++
انتهى الجزء الخاص بالنمسا والحمدلله .. عقب معاناه ف رفع الصور وكتابه التقرير
واعداده وترتيبه .. قد لايكون بالمستوى المطلوب ولكن اتمنى ان تصل المعلومه الكامله التي يحتاجها كل متزود من زاد المسافر ..
وانا ف اتم الاستعداد لتقديم المساعده والرد على جميع الاستفسارات المتعلقه بهذه البلد فهذا ما عهدناه دائما من مشرفي الزاد والاعضاء المجتهدين
واتمنى ان اكون وفقت في ايصال المعلومه بطريقه سلسه وعذرا ً لوجود اختلاف في حجم الصور وهذه المشكله واجهتني عند رفع الصور ..
والسلام عليكم ورحمه الله وبركاته
