الكرام
السلام عليكم ورحمة الله وبركاته
محطتنا النهاردة لباموك كالا
باموك يعني قطن
كالا يعني السع لسانك من الشاي وبعدين قول قلعة هتعرف معناها ساعتها..

من سنين وانا مبهورة بباموك كالا واتذكر ان اول مرة شوفتها كان تقرير بالصور جالي على الايميل بدون كلام صور فقط مش عارفة عرفوا منين ان الواحد لا بيقرا ولا يكتب..
ولقيت الناس واقفين بشورتات ومايوهات في باموك كالا وانا الجهل على رجلين بقى متخيلة ان ده تلج واقول ايه البروووود ده الناس دي مبتحسش!!
تلاقيهم رووس والفودكا مبهدلاهم ومش حاسين بالبرد ربنا يجحمهم..
لحد ما اكتشفت بالبحث عنها ان باموك كالا مش تلج!!
ولا لها اي علاقة بالفودكا!!
فابقوا معنا

بقيت هموت عشان اروح باموك كالا.. ولنا هنا وقفة..
اذا كانت التقارير العربية لمنطقة تريد زيارتها ضعيفة يمكنك ان تتصفح المواقع الاجنبية ستجد معلومات مهوولة عن تلك المناطق واذا كان هناك حاجز لغة فبامكانك تدخل على عم جوجل ايرث وتختار المكان من الخريطة وتختار انه يعرضلك صور المكان.. ساعتها هتلاقي نفسك اودام الاف الصور اللي هتعرفك بالمنطقة بشكل رائع جدا..
المهم يعني اخرة اللت والعجن ده ان تيسر لنا الحمدلله زيارة باموك كالا..
وهي تقع في محافظة دينزلي في جنوب غرب تركيا
ذهبنا لها بالسيارة من آلانيا.. كانت مدة سفر طويلة جدا فوق السبع ساعات

مميزات باموك كالا:
1- تم تصنيفها من قبل اليونسكو من ضمن مواقع الارث العالمي ومعناه ان هذا المكان يتفرد بصفات لا يتواجد مثلها في مكان اخر على وجه الارض وهو ملك للبشرية جميعا..

2- هي عبارة عن جبل كبير او عدة جبال كلسية.. تحتوي على عيون مياه معدنية الخواص.. لسبب ما انا معرفوش اكيد العلماء عارفينه بس مبلغونيش المياه دي لما بتيجي على الصخور بتخليها تكون بشكل وخواص الموجودة في باموك كالا.. تتحول للون الابيض وبعض من الصخور يكون مثل الاسفنج تماما اذا ضغطت عليه هيعترف..اقصد هيتضغط مع قبضة ايدك.. مش عايزة بقى الاقي كل الناس رايحة تلعب ملاكمة مع باموك كالا وتقول استانبول قالتلنا متبوظوش الحاجات بنقول ارث عالمي..:105:

3- مسموح بالسباحة والجلوس في احواض المياه الكلسية لكن حذاري حذاري.. اذا معاك بنوتات لازم تلبسهم بونيه بلاستيك للشعر لان بعد ما هتمشوا من هناك هتلاقي ان باموك كالا هتترك لك تذكار مقشة في راس بنتك مكان شعرها..طبيعة المياه بتبهدل الشعر وتخليه جاف جدا ..

4- احترس من الشمس لازم يكون معاك صن بلوك للشمس هي خفيفة وليست حارقة ولكن مع طبيعة المياه هناك تصيب الجلد بحروق..

5- باموك كالا مكان كبير جدا تستطيع ان تقضي اليوم فيه كاملا..فبالاضافة للكلسيات واحواض المياه
هناك اثار المدينة القديمة في نفس الجبل وتراها وانت جالس في احواض المياه..
وهناك مغارات مفتوحة الشقف تحت باموك كالا رااااائعة جدا والمياه لونها عجيب فيها لازوردية اللون..
واذا وجدت ازدحام في مكان متاخدش بعضك وتمشي.. ابحث قليلا ستجد اماكن اخرى وكانها خاصة واقض يومك فيها

6- توجد فيها احجار غاية في الروعة .. ده في المدينة نفسها.. وانا كان نفسي اشتري منهم وايضا مشغولات فنية بالاحجار من اكسسورات نسائية واشياء راااائعة جدا ولكننا وصلنا الساعة 3 الفجر وكنا غاية في الارهاق فطلعنا الشيء اللي كان مبيتنا فيه وتاني يوم نزلنا بدري وكانت المحلات قافلة ولحد دلوقتي هموت بحسرتي اني مشتريتش من الاحجار..


عيوب باموك كالا:
1- احنا كنا العرب الوحيدين هناك والباقي اجانب فقراااااااااااا جداااااااااا.. (اللي مش لاقيين هدوم يلبسوها دول)نظرا لطبيعة المكان ان فيه سباحة بس مثل ما قلتلكم في اماكن كثيرة فاضية وتستمتع فيها

2- المبيت.. كان حاجة مرعبة مريعة فظيعة !!
اعتمدنا على من يصطحبنا انه يعرف اماكن للمبيت فاخذنا لمكان كده دورين به غرف الغرفة لشخصين بخمسة وعشرين ليرة.. نظيف ولكن رائحة المكان غريبة جدا والنومة غير مريحة وحر خانق .. طلبت من صاحب المكان مروحة.. لقيته فتحلي باب تاني للغرفة مطل على منوًر البيت فاسرعت باغلاقه فورا خفت الا يدخل لنا منه حاجة وقلت لزوجي انا مرهقة جدا ازاي بقى هفضل صاحية لتاني يوم انا استحالة ابات هنا.. ولاول مرة فحياني انام وانا بتكلم!!!!
قال لي زوجي ان اثناء كلامي هذا رحت في سبات عميييييييق.. التعب له مفعول السحر..
طبعا توجد فنادق فخمة ومتوسطة لكن قدرنا كان هذه التجربة العجيبة!!

اترككم مع صور باموك كالا الراااااااائعة

اول ظهور لمكان باموك كالا عند السفح تحت يعني لسة في الطريق مطلعناش الجبل فوق

[IMG][/IMG]
داخل باموك كالا ويظهر الممشى الخشبي في طرف الصورة]
الاماكن اللي بتصب منها المياه للاحواض والجبل
[IMG][/IMG]
بعض الاحواض باشكال مميزة طبيعية سبحان الله
[IMG][/IMG]
منظر اخر
[IMG][/IMG]
المدينة اسفل الجبل.. والبحيرة تحت فيها انشطة خفيفة ركوب بعض القوارب وبها بط وأوز
[IMG][/IMG]
تكوينات غريبة سبحان الله كل حتة غير التانية
[IMG][/IMG]
بالزووم عالبحيرة
[IMG][/IMG]
[جزاء الطرية اللي ممكن تتضغط مع قبضة اليد
[IMG][/IMG]