وأنا أجلب في بوابة السكن في الامارات طاحت عيني ع تقرير بوعمر عن فندق ميرامار العقه
ع هذا الرابط
أعجبت بالفندق وأقترحت ع بوعيسى نقضي فيه عطلة نهاية الاسبوع بعد امتحانات العيال
وحجزت عن طريق موقع بوكينج ، والاسعار تختلف حسب المواسم
نحن حجزنا غرفتين وحده غرفه عاديه والثانيه يسمونها تنفيذيه وتكون أرقى وأكبر
سلبيات الفندق
بكتفي بكتابة السلبيات وانتوا قدروا اذا تحبون تزورونه ولا لأ
* الخدمه سيئه جدا
وصلنا في هذا اليوم متأخرين يمكن ع الساعه 3 وللأسف يلسونا فتره لين سلمونا غرفه وحده
والثانيه سلمونا ياها عقب الساعه 6 
ماعوضونا عن هذا التأخير بأي شي :105:
وللأسف بوعيسى تعامل معاهم ببرود ، وأنا اغلي بس شو أسوي اذا البوس مالي سكت :4:
* النت مب مجاني ولاخدمة الواي فاي
وأعتقد الحين أصبحت خدمة الواي فاي يقدومنها مجانا في أغلب الفنادق العالميه
وخصوصا للغرف الأعلى مستوى
حتى كتعويض عن التأخير مارضوا يعطونا ياها * النظافه سيئه
لما استلمنا الغرفه للأسف شفت عزكم الله المرحاض وصخ :105:
ناديتهم ونظفوا ، وهذا دليل ع الاهمال والتقصير في خدماتهم
* لما طلبنا سرير اضافي للولد دفعونا 100 درهم
وهذا ممشكله بس أقل شي يعتبرونه مجانا تعويض ع التأخير الغير مبرر الا انه تقصير منهم
* لما سألنا عن بوفيه العشاء كان وايد غالي ، الشخص بـ 175 درهم
طلعنا من عندهم وتعشينا في فندق الميرديان الرائع البوفيه بـ 145 درهم للشخص
* نظام الغرف والمباني ياي ع شكل نص دائره يتوسطه حمام السباحه
يعني في دخلتنا وطلعتنا لازم نمر ع حمام السباحه ، وهاي نقطه وايد سلبيه :105:
لأنه أكثر الزوار أجانب ، وكلهم مفصخين من رياييل وحريم ، اللي بوقطعه واللي بوقطعتين
وايد ضايقني هالمنظر خصوصا جدام عيالي ، وطبعا ريلي ففي نظري مايصلح للعوايل ابدا * رقص وغنى
بالليل يابوا رقاصه أجنبيه متعريه ترقص رقص شرقي الحمدالله انه عيالي كنت مخلتنهم في الغرفه ، وبوعيسى كان يالس في الكوفي
وانا سرت الرسبشن بسألهم عن شي وأشوف الناس متجمعه وأصوات موسيقى
وايجت يعني طليت 
عليهم واشوف هاذيج الرقاصه اللي ع وحده ونص
طبعا اتفرجت بروحي لين خلصت وعقب رديت عند بوعيسى خبرته بعد انتهاء الحدث
رأيي الشخص
مايصلح للعوائل ولا أفكر أزوره مره ثانيه
الحين أترككم مع الصور وتعليقاتي عليها في الطريق لفندق ميرامار العقه
بياعين لمنتجات المزارع ومنتشرين في الشوارع وأسعارهم أرخص من السوق
فندق الميرديان
فندق راديسون بلو سابقا اسمه فندق جال
تابعوني....
تجربتي في منتجع mairamar شاطئ العقة بالفجيرة 
