في صباح اليوم الرابع كنا على موعد مع رياضة غريبة علينا ..ألا وهي الرافتنج أو القوارب المطاطية أو التجديف ..مادري ايش ممكن نترجمها حتى جوجل ما أسعفني بترجمة مرضية ..
بدأ التخطيط لهذا اليوم قبل السفر بمدة ..حيث أنني خفت أن يمل الشباب في المنتجع ..وإن كان لايمل ..فأردت أن أنوع في الأنشطة ..فبحثت في الإنترنت عن الأنشطة الخارجية الموجودة حول ألانيا "وهذا بالخطأ لأنني في البداية ظننت أن المنتجع في ألانيا وطلع المنتجع في الإتجاه المعاكس وبعيد عن ألانيا قرابة 200 كيلو ..ماعلينا .. أنا كنت أدور ووجدت أن هذا النشاط "الرافتينج" يقام هناك في أنطاليا فبحثت وراسلت الشركات التي تقدم هذه الخدمة ولها مواقع على الإنترنت ..وللأسف كانت النتائج مخيبة للآمال .. لم يرد أحد ! ..لكني في المحصلة أخذت معلومات مفيدة وهي على النحو التالي :
النشاط يحتاج يوم كامل .. تكلفة الرحلة 20 يورو شامل النقل من وإلى الفندق وشامل وجبة الغداء ..وفي الغالب شامل المشروبات واللباس الخاص بالرياضة ..وهذا تقريباً ما أجمعت عليه المواقع ..ويبدو أن بالإمكان الحصول على هذا كله بأسعار أقل ..لكن ماوجدت سعر أقل على الإنترنت .
بعد يومين من المراسلات رد علي أحدهم ..وقال لي موجود وب20 يورو للشخص .. قلت له تمام التمام ..قال وين فندقكم ..أعطيته عنوان الفندق فجائت الفاجعة ..قال لي فندقكم بعيد جداً وخارج تغطية رحلاتنا ولازم تيجي لحالك ..قلت له مافي سيارة قال تبي نجي ناخذك ..ادفع 100 يورو زيادة ! ..المبلغ كان صدمة بصراحة لكن الي يشوف المقاطع على الإنترنت يقول رايح رايح والبتلة حقتكم بقطعها ..فقلت له ماشي ياحلو موافق .. وفي هذا الوقت ردت علي شركة أخرى وشرحتله الوضع فقال لي أن تكلفة النقل 200 يورو زيادة ! فاعتذرت منه .
الشركة الأولى أرسلو لي رابط للدفع بالبي بال 35 يورو دفعة مقدمة ..ودفعت لهم ..وإذا به يرسل لي بعد كم يوم ..قال أن مديرنا يقول مانقدر نجيبكم ..ومافي إلا تدبر نفسك وتجي لحالك ..وعرض علي طريقتين للقدوم إلى أقرب محطة يمر منها باصهم في مدينة كيمر المجاورة لكوملوجا ..40 كيلو تقريباً .. فاقترح علي المواصلات ..حيث هناك تكاسي أمام المنتجع توصلك لمحطة باصات كوملوجا ومن المحطة تاخذ باص كيمر أو تتأجر سيارة وتجي بسيارتك ..
أنا بالنسبة لي السيارة أريح ..لأني جربت الباص الي جابنا من المطار ..فقع كبودنا من البطء في الخط ..والوقت أصلاً مبكر ..لازم نكون في كيمر الساعة 8 إلى 8ونص..والإفطار في الفندق أصلاً الساعة 7 ..يعني بيروح علينا الفطور ! لا لا لا شوف حل ثاني ..
قلنا السيارة ..لكن السيارة ماتشيل 6 أشخاص ! وبعدين ماشاء الله 3 من الي معنا أحجام XXL وواحد كرش ماشاء الله وأنا وسط وواحد نحيف يعني صعب جداً سيارة ..لكن قلنا نتوكل على الله ونتحمل بعض في السيارة .. ورحت للمكتب الي في المنتجع وحصلت بفضل الله سيارة تشيل 7 ركاب ! فحمدت الله وأثنيت عليه .. لكن قالي السيارة يوم السبت محجوزة وتجي الأحد ..وأنا كنت منسق مع الشركة نطلع يوم السبت .. فراسلتهم وقالي مافي مشكلة تعال الأحد .. فاستلمنا السيارة يوم السبت الساعة 10 بالليل تقريباً ويوم الأحد أفطرنا وطلعنا من المنتجع الساعة 7و25 دقيقة .. وكان أحد المواقع كتب أنك تحتاج غيار ومنشفة وحذاء رياضي وكل هذا طلع غير مناسب .. وسأوضحه لاحقاً ..
وصلنا لمحطة BP وقد كنا اتفقنا أن ننتظر الباص فيها الساعة 8وربع تقريباً ..واتصلت بالأخ الي في الشركة وقالي شوي ويجيك الباص ..وفعلاً دقائق ووصل الباص ..وكان فيه شخصين فقط ..وبدأت الرحلة ..وقد امتلأ الباص تماماً واشترى وهو ماشي كرسي بلاستيك جلس عليه شاب تركي صغير كان جاي من أضنة
في الباص في طريقنا إلى النهر ..الرحلة في الباص استمرت 3-4 ساعات ذهاب ومثلها عودة..شاملة طبعا التوقف لتحميل أو تنزيل الركاب

مناظر جميلة في الطريق




واحد من الشباب لما شاف هذا النهر ..قال بس ..هذا النهر الي بنجدف فيه


التيوس موجودة بكثرة في مختلف المدن الي مرينا فيها


مناظر رايقة

الشباب بعد 3 ساعات قفلو على السواق وقالوله نبي ندخن ..ف نزلهم هنا ..هذا كوخ فيه رسوم ولوحات فنية ..وفي الخارج في أغصان أشجار مكتوب تحتها أشياء ..مادري ايش قصته

ووصلنا للمكان وكانت المفاجأة

لبسنا عدتنا واتجهنا للنهر



استقبلنا المدربين ..وأعطونا بعض النصائح ..وأهم شي كان أنك إذا سقطت لاقدر الله أن تسترخي تماماً فانت تلبس اللايف جاكت ولاداعي للقلق و لأن قاع النهر صخري في بعض الأماكن وقد تؤذي نفسك ..وهذا ماحصل معي فعلا
كذلك وضح لنا المدرب أن القارب يشيل 9 أشخاص والمدرب العاشر ، ووضح لنا أن الحذاء الرياضي سيبتل ويصبح ثقيل ..وينصح باستإجار حذاء بلاستيكي خاص "وهذا مالم نتفق عليه !" وبعدين قال لنا أنصحكم أنكم تلبسون شورتات فقط وشورتات سباحة ..وهذي كانت موجودة الحمد لله ، بعدين قال في عندنا بدل خاصة تقدر تستأجرها أيضاً ! وهذا مالم يبلغني فيه الأخ مسبقاً .. طبعاً الإيجار بسيط ..4 يورو أظن للبدلة والحذاء لكن ماتفقنا كذا ..على كل حال ماستأجرناها ولبسنا في رجولنا شباشب بحر أكرمكم الله ، بالنسبة للتصوير قالولنا تحب تاخذ الكاميرا خذها لكن ماحنا مسؤولين عنها ! لأنها ممكن تطيح أو تتبلل ..وفعلاً الوضع كان صعب جداً والحمد لله أننا ما أخذنا الكاميرا معنا ، والأخ الي حجزت معه قالي أنهم بيصورونك ويعطونك ديفيدي ب5 إلى 10 يورو .. قلنا مش مشكلة .
المهم أنا رايح وأنا متوقع مافي إلا احنا ..ويوم شفت الباص امتلا قلت مافي إلا الي في الباص ..ويوم وصلنا هناك وجدنا ناس كثيرين جداً ..ومن شركات مختلفة .. وكان فيه روس كثيريييين ..يعني المدربين لما جهزنا كل شي قالولنا الي يتكلمو روسي يجو هنا فراح 90% من الموجودين والي يتكلمو انجليزي يجو هنا ..وكنا احنا واثنين بريطانيين و5 ايرانيين وقال الي يتكلمو تركي يجو هنا وراح مجموعة أتراك ...الروس الله يهديهم كانو مبتذلين جداً جداً في لباسهم ..الله يهديهم إلى الحق ويستر عليهم ، المهم احنا كنا 6 وكان في أسرة ايرانية ..رجل وامرأتين جو معنا والمدرب صرنا 10 ..لبسنا اللايف جاكت والطاقية ونزلنا باتجاه النهر ..أخذ كل واحد مجدافه وحملنا القارب على روسنا ونزلنا للماء وأخذنا مواقعنا ..أنا كنت في الزاوية اليسار وانطلقنا على بركة الله
وهذي الصورتين الوحيدتين من خلال الجولة


في منتصف الطريق قالنا المدرب هنا منطقة سباحة اذا تحبو تنزلو تسبحو ..ماحد تحمس من الشباب ..وأنا والله كان ودي بس مانزلت ..وكان المدربين في القوارب الثانية يدفو بعض اللاعبين ويطيحوهم في الموية ..بس مدربنا كان خايف شكله من أحجام الشباب .. وكان محتفل فينا اننا كلنا مسلمين ويقول للمدربين الثانيين احنا بنوصل قبلكم للجنة كلنا مسلمين ..وكان يصرخ تكبير ..والكل يكبرون أحس الروس وقتها ميتين من الخوف خخخخخخ .
وبعد استراحة الغدا مرينا في منطقة قال لنا هذي منطقة القفز ..في شجرة عليها سلم تطلع وتنقز في الموية ..الشباب معي خافو ..وأنا نقزت ولما طلعت فوق الموية شفت نفسي بعيد شوي عن ضفة النهر وجتني الخوفة وبديت عاد أخابط بيدي ورجولي وأصبت من هذه الحركة الغبية بقدمي وركبتي ويدي ..وإذا بأحد المدربين يصرخ يافاش يافاش يعني اهدأ ف يافشت وإذا أنا على ضفة النهر والحمد لله
طبعاً احنا ركبنا في الباص تقريباً الساعة 8 ونص ووصلنا تقريبا الساعة 12 الظهر وبدينا الرحلة تقريبا 12 ونص وبعد ساعة ونص وقفنا تغدينا ..الغدا كان صيخ شيش طاووق وشي زي الرز بس مش رز ومكرونة وسلطة وبرتقال وخبز ..يعني غدا متواضع لكن جيد الحمد لله سند ظهورنا .. وبعد الغدا رجعنا للقوارب وكملنا المشوار تقريبا ساعة ووقفنا حول ال3ونص وجلسنا نص ساعة تفرجو فيها على الصور والفيديو ..وباعو الصورة ب5 دولار والديفيدي ب25 دولار ..الصورتين أعلاه هي الي طلعتلنا ..أما الديفيدي فكان لكامل القوارب ..تقريباً كنا 7أو8 قوارب في نفس الوقت ..لو اشتريت الديفيدي كان عيوني الحين مفقعة ويدي مكسورة ف أكيد مارح أشتريه ففيه فيديو لنا ولبقية الفرق الي ماتصلح أبداً ..
جلسنا على جنب إلى ماتفرجت الفرق على الفيديو وشربنا شاي بليرة ونص الكاسة ..والساعة 4 كنا في الباصات في طريقنا للعودة ..وهذي القوارب بيرجعوها للمحطة الأولى استعداداً لجولة أخرى
الله يعطيها العافية القوارب ..أبلت بلاء حسناً

وهذي العدة


وقفة وداع للنهر


طبعا أحتاج أوضحلكم بخصوص سوء الفهم في العدة الخاصة بالرافتنج وايجار الملابس والمشروبات الي دفعنا قيمتها 5 ليرات لعلبة الكولا والصور والفيديو ..الي فهمته في الأخير أن الي كان يتواصل معي على الإيميل سمسار ..وينسق بيني وبين الشركات هذي وهو ماله علاقة فيهم ولهذا حصل اللبس ..وأنا من جهتي كان يكفيني أنه رد علي

خلال مشوارنا هذا شفنا لوحات كثيرة في الطريق لونها بني ..فأحببنا زيارتها ..فقررنا تمديد ايجار السيارة يوم آخر .. وكان ذلك ..
في الحلقة القادمة 4 أنشطة جميلة قمنا بها في يومنا الأخير قبل السفر ..فانتظرونا ..