أنطلقت لأستلام السيارة من محطة القطارات الرئيسية .
ومعي ورقة حجز السيارة حجزت من موقع شركة سكست عن طريق النت كما في الصورة
وراح أوضحلكم كيف تاصلون المكان وتستلمون السيارة بالصور .
الدخول من اللوحة المكتوب عليها hauptbahnhof في هذة الصورة
راح تجد محلات ومطاعم على يدك اليسار وتجد القطارات واقفة على يدك اليمين ثم تمشي وتلاقي سلالم أثنين متحركات على يدك اليسار تصعد في أحداهما وعند وصولك للدور الثاني لف يسار تجد مكاتب تأجير السيارات على يدك اليمين .
أو أذا دخلت من الجهة المقابلة راح تكون القطارات على يدك اليسار والمحلات والمطاعم على يدك اليمين شاهدوا معي هذة الصور .
ثم صعدت الدور الثاني عن طريق السلالم الكهربائية ولفيت يسار ثم لقيت مكاتب على يدي اليمين ثم توجهت الى مكتب شركة سكست
وأعطيتها ورقة الحجز ثم طلبت مني الرخصة الدولية والمحلية وبطاقة الأتمان وأخذت تسجل المعلومات بالكمبيوتر وفجأة سألتني عن صندوق البريد والرمز البريدي قلت لها أنا أعرف رقم صندوق البريد فقط أم الرمز البريدي لايحضرني قالت لايمكن أن أكمل الحجز لك الا بالرمز البريدي قلت والله وتوهقنا وش أسوي
هالحين وجتني فكرة أني أتصل بأحد الأصدقاء في بلدي ليعطيني أي رمز بريدي وفعلا أعطاني رمز بريدي وأعطيتها الرقم ومشي الحال وسحبت من البطاقة 2314 يورو ووصلتني هذة الرسالة على الجوال ونا واقف عندها وكان مبلغ تأجير السيارة لمدة 12 يوم هو 1157 يورو وأخذوا نفس المبلغ تأمين ليصبح المبلغ الي سحبوة مني 2314 يورو
وبعدين جاء العك وين السيارة هالحين وأخذت الموظفة ورقة توصف لي المكان في هذة الصورة
وأعطتني المفتاح وقالتلي في أمان الله توكل على الله لاعاد أشوف وجهك الا بعد 12 يوم طبعا بعد ماسئلتها عن التأمين أذا كان شامل وسألتها عن الكيلوات قالتلي التأمين شامل والكيلوات مفتوحة قلت لها طيب وين كرسي الأطفال قالت لي لايكثر هرجك رح تلقاة في السيارة قلتلها لاتعصبين يالله سلام .
ونزلت من السلم الكهربائي ورحت يمين ثم خرجت من البوابة وأذا بفندق eden hotel أمامي كما في هذة الصورة
طبعا تدرعم 
بين هالعمارتين الموجودة في الصورة وعند وصولك لنهاية الشارع الموجود بين العمارتين تلف يسار ثم يمين تجد عمارة مواقف السيارات على يدك اليسار لونها أبيض أذا صبغوها بعدين أنا مالي دخل وهذة صورة العمارة .
وهذة صور من القوقل أيرث من مجهودات العضو ربيع الصحراء الله يجزاة بالخير أدعولة معي تبين أحداثيات المبنى وموقعة .
وبعد ماوصلت للعمارة صعدت الدور الخامس عن طريق المصعد والمصعد موضح فيه مواقف تأجير السيارات وبعد مادخلت في مواقف السيارات لقيت سيارات كثيرة مصفوفة قلت يولد وين سيارتي وشغلت مخي
وعن طريق الرموت ضغطت علية ولاقي سيارة أمامي تشر وتقول تعال هذا أنا قلت ياسلام الحين صرت ذكي وركبت السيارة ثم تفقدتها من الأنوار الى كفر السيارة ومالقيت كرسي الأطفال بالسيارة قلت هذة والله البلشة:4: وشغلت السيارة أبمشي وماهي راضية تمشي قلت يمكن الجلنط مسحوب وصرت أبحث عن الجلنط مالقيتة تحت التركسون قلت يمكن عند القير ولاقي ماصورة مستطيلة عند القير وضغط فيها أبنزلها ماقدرت جلست يمكن ربع ساعة وأنا أحاول ماقدرت وفجأة لقيت الماني يمشي ونادية قلتلة الفزعة يالنشمي قال أبشر وفجأة لقيت ماعندة سالفة وأخذ يحاول حتى لقى الحل ونزل الجلنط وتوكلت على الله ونزلت للدور الأرضي ووقفت عند الأستقبال وطلبت منهم كرسي الأطفال وركبت القارمن وتوكلت على الله 
