الوصول إلى ميلانو و الإنتقال من المطار إلى فينيسيا و قضاء يوم فيها ثم الإنتقال إلى زيلامسي و قضاء ثلاثة أيام فيها ثم الإنتقال لميونيخ و قضاء يومين فيها ثم الانتقال إلى انترلاكن وقضاء خمسة أيام فيها ثم العودة إلى ميلانو و قضاء يوم ثم العودة إلى أرض الوطن
و إليكم خريطة توضح خط السير بين المدن و الدول
تاريخ الرحلة
تاريخ الوصول 14 مايو و العودة 26 مايو يعني 12 يوم من أروع ما يكون الحمدلله
الطيران الناقل
سعر التذاكر 1550 ريال للشخص طبعا السعر جدا جميل و هذا يعود إلى ثلاثة أسباب : 1- الشراء المبكر للتذاكر أنا اشتريتها من فبراير يعني قبل موعد الرحلة بثلاثة شهور . 2- موعد الرحلة في مايو و هو يعتبر أوف سيزون يعني موسم ووقت إختبارات . 3- التذاكر غير مسترجعة القيمة .
و طريقة الموقع هيا يعطيك عروض من كل الشركات و عند إختيارك للسيارة ودفع العربون يرسلك كوبون بإسم الشركة المؤجرة و وقع من نصيبي شركة LOCAUTO و هذا شعارهم
التأشبرة (الشنقن)
قررت أني آخذها عن طريق السفارة الإيطالية لأنو إيطاليا نقطة الوصول والرجوع المهم استفسرت عن طلباتهم وكانت :
1 - صورتين شخصية 2 - صورة للهوية 3 - صورة لجواز السفر مع الجواز الأصل 4 - الحجوزات للفنادق 5 - صورة تذاكرالطيران 6 - الحضور لأخذ البصمة و إحضار 400 ريال قيمة التأشيرة
و الحمدلله طلعتها في اسبوعين
بعد كذا جهزت الاشياء الضرورية والمهمة مثل القارمن وتجميع إحداثيات الأماكن السياحية وغيرها من الأمور التي قد تحتاجها في السفر .
وبعدها انتظرنا وقت الرحلة الحلم إلى أن جاءت اللحظة وأقلعنا من مطار الملك عبدالعزير إلى مطار مالبينسا بميلانو
الحلقة الثانية : الوصول إلى ميلانو والذهاب إلى فينيسيا الحالمة
أقلعت الطائرة من مطار جده الساعة 3 ونص و يعيب الرحلة وقتها يعني حتى الوصول ما حتلاقي فندق يستقبلك عشان كذا قررت أني أول ما أوصل اتجه إلى فينسيا ..
بعد رحلة ممتعه لمدة خمس ساعات ونصف >>> نوم يا حبيبي
وصلنا ولله الحمد إلى مطار ميلانو الساعة الثامنة صباحا بتوقيت ايطاليا وهاذي صور قبل الهبوط
كانت درجة الحرارة عند الوصول 8 مئوية >>> يا عيني على البرد
الطائرة كانت تنزل ركاب وحتقلع على طول على مدريد فنزل معانا عدد بسيط من الركاب والباقي جلسو ينتظرو في الطائرة عشان يروحو على مدريد ..
أول مانزلنا قابلنا شباك الجوازات سئلني عن الجوازات اعطيتو هيا وهنا صارت اللخبطة ضابط الجوازات بيأشر على زوجتي فقلتلو إنها ما تتكلم انجليزي اسئلني أنا وأنا اترجم لها >> طبعاً بكلمو بالانجليزي >>> يعني أني
قلي : نو ؟؟
قلتلو : نو >>> على بالي ( لا زوجتي ماتتكلم انجليزي )
قلي : اوكي قو هوم فيما معناه خلاص أرجع بلدك ... هياااا اشبو الحبييب فسئلتو خير اش في ؟؟
قلي ثاني : إذا لا ارجع بلدك .. يا عمي فهمني اش تبغا في النهاية طلع يبغا المدام تكشف وجهها عشان يطابق مع الجواز !!!!! طيب قول من الاول وقعت قلبي الله يمتحن شيطانك .
المهم أنهينا الاجراءات وخرجنا من قسم الجوازات وبصراحة استغربت أنو موظف جوازات لغته الانجليزية ضعيفة جداً زي كذ ا
بعدها رحنا عشان نستلم الشنط .وطبعا لازم عشان تاخذ عربية حمل الحقائب يكون معاك 2 يورو حديد
فسئلت دلوني على جهاز يصرفلك العملة الورقية إلى عملة حديدية و أخذت العربية والشنط وعلى مكتب التأجير بالدور السفلي
أنهيت إجراءات إستلام السيارة و أخذتها و هاذي هيا رفيقة الرحلة
أنا حجزت Audi A3 ولمن وصلت أعطوني الباسات فولكس واجن و أحلى شي إنها ديزل لأن الديزل ما يخلص فحيوفر عليا
وسئلوني في مشكلة قلتلهم طالما اوتماتيك وواسعة مافي مشكلة المهم حطينا الشنط في السيارة
و ركبت القارمن
حطيت الوجهة إلى مواقف فينيسيا وانطلقنا و هذا مسار الطريق
وهاذي صور من الطريق
الطريق جداً ممتع خضار وجبال ما تتعب من السواقة
وهذا أحلى مكان يبيع كابتشينو في الطرقات لا يفوتكم اسمو AUTOGRILL
وبعد رحلة استغرقت ساعتين تقريباً وصلنا مواقف فينيسيا ..وقفت السيارة و أخذت معايا شنطة وحده بس كنت مجهزها لفينيسياعشان لا أتعب و أشيل شنط كثير و تركت الشنط الباقية في السيارة ,, واتجهنا إلى موقف الباص البحري قطعت تذكرتين ب 14 يورو
واعطيت الموظفة الي تبيع التذاكر حجز الفندق فقالتلي انزل في محطة السان ماركو قلت تمام وطبعا القارمن معايا ما ستغنيت عنو حتى لومشي ركبنا الباص البحري و توكلنا على الله
و هذا البوت الكبير هوا الباص البحري
نزلنا في محطة السان ماركو و اتبعت القارمن حتى وصلنا الفندق الحمدلله
اسم الفندق : HOTEL LISBONA صفحة الفندق في موقع بوكنق اضغط هنا
فندق جميل ونظيف وسعره معقول 180 يورو في الليلة وميزته أنو جداً قريب من ساحة السان ماركو
وهذي صورة لمنطقة الاستقبال للفندق
وهذا مكان الإفطار
إطلالة الشرفة من الغرفة
الإطلالة في الليل
ريحنا شويه بعد مجهود السفر الطويل من جده الى ميلانو ومن ميلانو الى فينيسيا وبعدها نزلنا إلى ساحة السان ماركو الرائعة
و بعد الإستمتاع في الساحة جلسنا في مطعم و تغدينا أهم شي هناك البيتزا الايطالية
و بعد الوجبة الطيبة جا وقت استكشاف المدينة الساحرة فينسيا
الأقنعة المشتهرة بيها فينيسيا
بعد الإستمتاع بالمدينة الحالمة فينسيا رجعنا للفندق وبكذا يكون انتهى اول يوم في الرحلة والي كان مخصص لفينيسيا الجميلة بصراحة مدينة تاريخية جميلة جداً إن شاء الله ربي يكتبلي و أروحها ثاني .
انتظروني في الحلقة القادمة مع أجمل ما رأت عيني زيلامسي
آخر تعديل ABO AHMED B : 11 / 01 / 2014 25 : 02 AM.
سبب التعديل : س