حياك الله أخي سهل وبنتشرف بوجودك، أسعدني مرورك

اليوم الأول
15/5/2013


جهزنا شنطنا وكان فيها غير الملابس بعض الهدايا للأخوة الأتراك و فيش الكهرباء الثنائي المدور وطبعا قهوتنا ومين يعرف ايش كمان؟؟؟ أخدت معي ميرمية للشاي (اللي ما بيعرف الميرمية هي أعشاب يستخدمها أهل فلسطين والأردن فى الشاي ويستخدمها الاوربيون والأمريكان فى الطبخ وهي ذات رائحة زكية جدا وتعطي مذاق للشاي رائع، بالاضافة الى فوائدها الصحية الرائعة للمغص والأمعاء).

قررنا أخد تاكسي لمطار دبي حتى ما نعطل الأولاد عن أشغالهم فجأة اجتني رسالة من صديقتي الغالية ام نور تقولي السواق بانتظاركم تحت البيت. نزلنا ولقينا سيارة كاديلاك فور ويل جديدة لسه بورقتها زي ما بنحكي والسواق بانتظارنا وأخدنا على المطار . لما وصلنا ولا الأخ ماشي باتجاه مسافري الدرجة الأولى لالالا يما احنا economy

خلصنا الاجراءات بسرعة ماشاء الله، مستوى الخدمات فى دبي عموما والمطار خصوصا درجة أولى. طلعنا طيارتنا وكانت رحلة مريحة بس كنا جوعانين وكان فى نقص بطاقم المضيفين فتأخروا علينا كتير بالأكل، يدوب أكلنا ونزلنا على طول من الطيارة.

وصلنا مطار أتاتورك ولأنه احنا اردنيين فما نحتاج لفيزا ، رحنا على كاونتر الجوازات على طول وكان زحمة بس خلصنا بسرعة. اشترينا خط تركي ب 60 ليرة منهم 20 ليرة رصيد من شركة Turkcell.

أخدنا تاكسي وطلع معنا كمان وحده ست لأنه ما كان فى تكسيات بالمطار وأخد منا 40 ليره للوصول الى منطقة بايزيت Beyazit .

استقبلتنا اسطنبول بجوها الجميل وزهورها البهية، وصلنا فندق فيكتوري Victory Hotel and Spa والحمد لله فندق جميل وجديد. غرفتنا كانت جيدة جدا فيها سريرين منفصلين بس مو مشكلة زبطناهم والغرفة فيها بلكون صغير (بلكونة جولييت) مطلة على جامعة بايزيت ومسجد بايزيت من اليمين وعلى البحر من جهة اليسار. والحلو انه لقينا ملصق على السقف يوضح اتجاه القبلة ولقينا سجادة صلاة فى درج الدرسوار وفى سخان كهربائي وقنينة ماء وشاي وسكر ونسكافيه ضيافه (اكرام) من الفندق.


استقبال الفندق





باب الغرفة





غرفتنا الجميلة








مطل الغرفة على البحر




أخدونا جولة فى الفندق وفعلا ماشاء الله ممتاز فيه حمام تركي وصالة ألعاب رياضية وبركة سباحة داخلية. وأحسن شىء فيه موقعه، تمشي خطوات للشارع الرئيسي وتمشي 3 دقائق لمحطة الترام وجراند بازار و5 دقائق لمسجد السليمانية.


النادي الصحي





الحمام التركي





ريحنا شوي ونزلنا بعدها تفتلنا حولين الفندق واشترينا كرت اسطنبول وحطينا فيه رصيد 60 ليره. مشينا للسلطان أحمد للصلاة فى المسجد وكان لسه عم بيأذن للمغرب وبفضل الله صلينا المغرب جماعة زي ما عملنا السنة الماضية.








تمشينا شوي بالسلطان أحمد وبعدها تعشينا بمطعم كوفتجي سلطان أحمد التاريخي والذي فتح أبوابه أول مره عام 1920 Tarihi Sultanahmet Koftecisi وهو متخصص فقط بالكباب والكفته. أخدنا صحن كباب وصحن كفته وشوربة وسلطة وعيران وطلع حسابنا 42 ليره.

رجعنا على مسجد السلطان أحمد لصلاة العشاء والتصوير فيه والتقينا هناك بعروسين من فلسطين وساكنين فى الامارات واتفقنا نلتقي بكره الصبح عشان نطلع على جزيرة الأميرات لأنهم لسه واصلين ومش عارفين كيفية الوصول واحنا أصلا ناويين عليها.

ودعناهم ورحنا جلسنا حول نافورة السلطان أحمد الملونة الجميلة.





طبعا أنا وأبو معن طفينا خلص مو قادرين فطلعنا بالترام لمحطة بايزيت. دخلنا غرفتنا ونمنا على طول.


ألقاكم على خير فى اليوم الثاني

حلقة جميلة وتفاصيل مفيده
الف شكر

بداية تقرير جيد ... اشوف السياره غاليه وهى مهى موسم.... شكرا......

بداية مشوقه تنبئ بيوميات رائعة بارك الله فيك

وهذا تقرير ليوم رائع رغم تعب الرحله ننتظر باقي المغامرات

الشكر الجزيل الك اخي الفاضل على المرور الجميل

معك حق السعر غالي شوي بس ماشاء الله الشمال التركي كان مليان بالسواح وسألنا كتير ناس وطلعوا ماخدين نفس سعرنا أقل أو أكثر ب 5 دراهم، والحقيقة انه السيارة تستاهل مريحة ونظيفة وجديدة.

السلام عليكم ورحمة الله وبركاته

ماشاء الله تبارك الرحمن تقرير مفصل ورائع وشرح وافي وكافي

منو ما يعرفق المراميه اكاد اجزم ان في كل بيت فلسطيني فيه النبته الطيبه هذي
شنو يعني كاديلاك فور ويل ممكن تشرحين خالتو
متابع وبقوه

ملاحظه تم تغيير عنوان التقرير الى تقرير مصور

الله يرضى عليك أخي سعد وشكرا جزيلا على المرور وفعلا مغامرات ولا أحلى بفضل الله

وعليكم السلام ورحمة الله وبركاته
حيا الله الكويت وأهلها وريحة الهيل والزعفران
حيا الله بريحة السالمية وشرق والمباركية
يما شكله ربعك فلسطينية وعشان هيك بتعرف الميرامية الرائعة
الحين تعرف الميرامية ومو عارف الكاديلاك
جزاك الله خير على تغيير العنوان

الله يرضى عليك ويعطيك حتى يرضيك