اليوم الثاني
16/5/2013
يا جماعة نسيت أقلكم اني صورت بكاميرا موبايلي جالاكاسي اس 3 Galaxy S3 وكمان بكاميرا كانون Canon IXUS130 فحتلاقوا صور الموبايل بدون تاريخ وصور الكاميرا مع تاريخ.
صحينا الساعة 7 الصبح وفتحت باب البلكون الصغيرة وماشاء الله الجو رائع والترام شغال من بكير
نزلنا فطرنا وفوجئنا ما شاء الله بترتيب المطعم وتنوع البوفيه الرائع كان فعلا ممتاز وأحسن بوفيه فندق مر علينا فى تركيا على مستوى فنادق 4 نجوم.
ياعيني على الجرنك (الكرز الأخضر) والاسكدنيا (الأكدنيا) الرائعة واحنا ما قصرنا بعد الفطور حطينا شوية جرنك وشوية ملح وهاتك يا أكل
وقفنا شوي على بلكونة المطعم الخارجية وكان منظر جميل جدا والبحر أجمل والبواخر رايحه وجاي.
خلصنا فطورنا وكان موعدنا مع العرسان الساعة 10 صباحا فقلنا ننزل على مسجد السليمانية قبل موعدنا. وفعلا يدوب مشينا 10 دقائق ووصلنا على مسجد السليمانية بس للأسف كان مسكر فصورنا شوية صور خارجية.
حديقة المسجد
الغريب واحنا ماشيين كان فيه كمية قطط وكلاب غير عادية وشوي سمعنا كلبين عم يتخانقوا وشوي كمان ونلاقي كلاب تركض من كل صوب لدعم الكلبين وفجأة اجى واحد شكله الزعيم وحكى معهم والله وهدى الوضع وسكتوا ورجع كل كلب لمقره الرئيسي.
رجعنا من شارع تاني موازي للجراند بازار ولقينا سوق كبير وماشاء الله عليهم فاتحين من الصبح احنا فى الاردن الله يحميهم تروح على السوق 10 ونص ولسه نص السوق مسكر.
تمشينا شوي وتسوقنا شويتين وكملنا مشي للسلطان أحمد.
بائعي الذرة Misir والبطيخ والكستناء فى حديقة السلطان أحمد
جزر الأميرات Prens Adaları
كانت طوابير الناس اللي بدهم يدخلوا على أيا صوفيا مرعبة. اجو العرسان على الموعد وطلعنا بالترام من محطة السلطان أحمد Sultanahmet الى محطة كاباتاش Kabataş (لاحظوا انه آخر حرف ş ينطق ش وليس س). لاحظنا انه تذكرة الترام غليانة وصارت 3 ليرة مش 2 زي السنة الماضية.
وصلنا كاباتاش وعلى طول طلعنا بالباخرة الخاصة ببلدية اسطنبول والمتوجهة الى جزر الأميرات وتحديدا آخر جزيرة بيوك أضا Buyuk Ada وكانت التذكرة تقريبا 3.5 ليرة. كانت الباخرة مزدحمة جدا وتقريبا بقينا واقفين أغلب الرحلة. ولكن جمال البحر والسماء والطيور والشمس والبيوت كله اجتمع عشان ينسينا تعب الطريق.
أخليكم تستمعوا شوي معانا – سبحان الله والحمد لله ولا اله الا الله والله أكبر
استغرقت الرحلة ساعة ونص تقريبا للوصول ولما وصلنا بدأنا نتمشى بين الطرقات ولقينا هذا الخضرجي اشترينا من عنده شوية فواكه ماشاء الله بتشهي ولذيذة جدا.
ولقينا محل الزهور هذا الله يجعل أيامكم كلها زهور
وشوي ونلاقي هذا الحنطور مقبل علينا وقفناه وطلعنا معه وأخذ 60 ليرة لجولة لمدة ساعة وتقاسمنا المبلغ احنا والعرسان
الله يهنيهم ببيوتهم الجميلة
وصلنا لمنطقة وقالنا الكابتن استراحة 10 دقائق
البقر مصر يشاركنا الاستراحة 
الغابات والشجر والبحر ما فارقونا سبحان الله جمال متواصل
وهذه المهرة الجميلة تتمشى فى المرابع التركية
بعد انتهاء جولتنا قررنا نتغدى فى نفس المطعم اللي تغدينا فيه السنة الماضية مطعم كوشم Koşem
وهاي غدانا وحلانا كمان تفضلوا
وهذا ياسين موظف المطعم وبيحكي عربي وعدته احطله صورته
تكلفة الغداء طلعت 46 ليرة
واحنا قاعدين اجى الكلب وقعد جمب البسس (القطط) وهمه ولا همه هون عادي 
أما هذا الباشا اجى وبكل ثقة تمدد وبعدين زبط القعدة وجعص وكان ناقصه كوباية شاي، بتصدقوا... أنا أول مرة أشوف قطه بتقعد هيك سبحان الله
خلصنا وقررنا نرجع اسطنبول على متن الباخرة السريعة وكانت ب 5 ليرة للشخص
وصلنا كاباتش وودعنا العرسان احنا عنا موعد مع أشخاص مهمين وهمه لازم يروحوا على يني كابي يحجزوا باخرة يلوا لليوم التالي.
أحلى لقاء فى اورتاكوي Ortakoy
انتظرنا الباص الذى يذهب لاورتاكوي لفترة طويلة ولم يأت فقررنا الذهاب بالتاكسي وطلع العداد 13 ليرة بسبب زحمة الطرقات.
وصلنا وكان الجو رائع ولكن للأسف لم تكن أعمال الصيانة فى جامع اورتاكوي قد انتهت 
فجلسنا فى مطعم ومقهى مادو Mado وطلبنا بوظه وكنافه مبرومه وقهوة وصلينا عندهم بالطابق الثاني. وتحت جسر البوسفور الشامخ التقى الأحباب فى الله، التقينا لأول مرة بالابنة الرائعة شهرزاد سفاري والتى ساهمت من غير أن تعلم بنجاح رحلتنا بسبب تقاريرها المبهرة.
أنهينا الليلة الجميلة بعزومة لذيذة على بطاطا مشوية Kumpir وكانت أطيب بطاطا مشوية ناكلها
طلعنا بباص لكاباتاش ثم الترام لبازيت وكان الترام مزدحم بطريقة مش طبيعية وعبينا رصيد لكرت اسطنبول ب 30 ليرة. وصلنا الفندق ونمنا يمكن قبل ما نوصل.
تصبحوا على خير
أشوفكم بجزء جديد من مغامراتنا فى تركيا
