السلام عليكم ورحمه الله وبركاته
حددت موعد للفيزا وكنت ادور على اي ملاحظه بخصوص المقابله والاجراءات
لقيت مواضيع كثيره ولكن مو دقيقه للدرجه المطلوبه خصوصا مقابله السفاره في الكويت
من المنطلق هذا حبيت انقل تجربتي في المقابله وشرح كل شي بالدقه والتفصيل (علشان الناس الي كانت تحاتي مثلي ويدورون اي شي بهالخصوص)
طبعا الكل عارف طريقه تعبئه الابلكيشن الخاص
بعد ما تعبي الابلكيشن تدخل على الموقع (النظام الجديد) وهو بالرابط التالي
https://cgifederal.secure.force.com
وتحدد الدوله الكويت وتسجل يوزر جديد باميلك وتعبي البيانات وترفق بيانات الي معاك
طريقه تحديد الموعد بهالنظام الجديد ارتب من النظام القديم
بعد التعبئه توصل لنقطه (جدوله موعدي)
تدخل عليها يفتحلك رسوم الدفع (ضروري تطبع الصفحه علشان توديها لبنك برقان لان ماراح يستقبلونك بدونها)
يكون فيها رقم حساب لك مربوط بنظام تحديد الموعد
مجرد انك تدفع ببنك برقان بعدها ب24ساعه يوصلك اميل انه تم ايداع المبلغ بالحساب وتقدر تحدد موعد
تحدد موعد وتروحلهم
-------------------------------------------------------------------------
موضوعنا
تروح للسفاره باليوم المحدد وضروري تجي قبلها بنص ساعه على الاقل
تصف دور عند البوابه الرئيسيه ومعاك صوره الابلكيشن وصوره من تحديد الموعد
يستقبلك الي على الباب وعلى طاولته نفس الايباد مربوط فيه سيستم المواعيد مجرد انه يحط رقمك الخاص الي بالابلكيشن يتاكد ويطلع ستيكر باركود ويلزقه بجوازك
بعده على طول غرفه تفتيش (كل شي ممنوع فانت مو بحاجه اي شي غير نظارتك خلها معاك ومفتاح السياره انا ردوني لان المفتاح كان فيه فلاش مومري ورحت رديته ورجعتلهم)
تدخل على اليسار دريشه (للحين انت ما دشيت السفاره) تعطيه الاوراق والجوازات و(بطاقتك المدنيه وبطاقه منو معاك الحاضر بس ويعطيك رقم تعلقه بثوبك )
يساره على طول باب كهرباء يفتحونه لك وتدخل نفس الموضوع تفتيش جهاز وانت ماشي
تطلع من هالمكتب تكون داخل السفاره تروح للباب الي على اليسار (مافي غيره)
تدخل تلقى نفسك بالشارع لالالا اضحك
تدخل تلقى بوابه تاخذ رقم و ادخل الصاله الي على اليمين
زحمه وزحمه وزحمه
انطر لين يجي دورك تروح تعطيها الاوراق من غير ما تكلمك تقولك صف بالدور علشان تروح لكاونتر (5او6او7) وهذولي حق البصمه
توصل طريقه البصمه سهله من تقولك الموظفه حط اصابعك حطهم اليسار وبعدين اليمين وبعدين الاثنين
تذكر هالنقطه : الرقم الي اخذته اول مره وانت داخل الصاله الي على اليمين راح تشوف اول موظفه تكتب الرقم على الابلكيشن مالك
بعد ما تخلص من البصمه اقعد على الكراسي وانطر لين يجي نفس الرقم الي اخذته اول مادشيت ونفس الرقم الي كتبته الموظفه على الابلكيشن
تروح للمقابله طبعا الصاله كلها درايش وانت واقف بكل الحالات الي ذكرتها اللهم انتظار الرقم بس تقدر ترتاح اما البصمه تصف سرا مع الناس
الموظف الي يقابلنا بالكاونتر رقم 8 طول اليوم يلعلع ويحقق مع الناس بشكل استفزازي وطول اليوم قاعد ادعي اني ما اطيح بايده لاني كلمه انجليزي و20 كلمه عربي
قدر الله وماشاء فعل وحصلت مشكله مع احد الاخوان تعاند هو مع الموظف واسمعه يقوله انت مو دكتور ومو بكيفك طبعا بالانجليزي وهذا الي قدرت افهمه لان الصوت كان عالي ونادوا الامن وطلع الولد وهو يسب ويلعن بالسفاره
مصائب قوما عند قوم فوائد شلون؟؟؟
الموظف طول اليوم يحقق وهو الوحيد الي فاتح المايك وصوته بالصاله والناس اجباري تطالع شنو في بعد الي صارله من الاخ الي صراحه الله يجزاه خير وتناشب معاه صار الموظف هاااااادئ جدا لدرجه انه طفا المايك
جا دوري طلع عنده عطيته الاوراق وانا قاعد افكر بطريقه الطرده شلون بيطردني بادب ولا بخربها معاه
طالع الشاشه والواضح انه كان يقرا الابلكيشن الي بالموقع
سالني بالانجليزي (ركز بالانجليزي مو مثل ماكانو يقولون الاخوان كل شي عربي طلع السفاره محد يتكلم فيها عربي الا اشخاص انت مو بحاجتهم مثل الامن وحرس البوابه )
سالني ليش بتروح قلت بشوف امريكا
شنو تشتغل قلتله عسكري بالداخليه
كم تبي تقعد بامريكا قلتله شهر قالي انت كاتب بالابلكيشن 3 شهور (توهق البطل) قلتله بشوف اذا عجبني الوضع بقعد 3 او 5 شهور وبثقه طبعا
قالي اوكي فنش
طيب شنو فينش قال 3 ايام ويتصلون عليك ورجعلي الصور الشخصيه وما عطاني ولا ورقه للعلم اني شفت ناس فيهم البجيه وبيدهم اوراق حمر
طلعت ورجعت للبوابه الاولى وعطيته الكرت الي عطاني اياه واخذت بطاقتي المدنيه

ملاحظات بسيطه : غير صحيح الي يقولك المقابله بالعربي
غير صحيح الي يقولك ان كل شي مرتب
غثه وحر وبعض ناس الله يجزاهم خير يبط الراس من السوالف
صفطت بمصافط السفاره الساعه 8:10 موعدي كان 8:45 طلعت من السفاره 10:00
اتمنى اكون وصلت بعض النقاط للاخوان الي متخوفين من المقابله
طبعا انا تعديت مرحله الخوف وصرت من مجموعه الانتظار

مو ضروري ترد بالموضوع لكن طيب منك تدعيلي بالتوفيق اذا كنت افدتك باي شي

اي استفسار انا حاضر ان شاء الله
ودمتم بود

جزاك الله خير والله يوفقك دنيا وآخره

والله شي يحز بالنفس الامريكان يعاملونا كأننا مجرمين لا وبعد ينتهكون كرامة المواطن برفع الصوت والاستفزاز والفضل كله لوزارات الخارجية الخليجية المفروض تتعامل مع هذه الاهانات بجدية........احنا مو رايحين نشحذ منهم رايحين بمالنا

Sent from my GT-I9300 using زاد المسافر

ومن قال يالغالي
وفعلا شي يحز بالخاطر لكن لو تفكر بالنهايه تقول محد جبرنا على تحمل هالمعامله لكن الواحد شيسوي

غريب صراحة تعاملهم

و السفارة الامريكية فيها اشخاص يتكلموا عربي و الامريكان انفسهم يخارجوا انفسهم بالعربي في السفارة


موفق إن شاء الله و طمنا عن الفيزا

السلام عليكم ورحمة الله وبركاته


اخي الفاضل للامانه جربت كذا سفاره الاوروبيه والامريكيه افضل تعامل وفوق الممتازه الامريكيه. بالكويت وكان بشهر فبراير كان هذاك الوقت مافي زحمه كلش والموظف بس سئل
سؤال. واحد وين تشتغل وتم التبصيم وبعدين يومين استلمت الفيزا

صحيح اخوي في ناس يتكلمون عربي لكن منت بحاجتهم مثل حرس الباب والامن فقط اما الي خذت البصمات امريكيه وكلمتني انجليزي والي قابلني نفس الموضوع لدرجه اني نسيت اسم وزاره الداخليه بالانجليزي وقعدت اقوله بالداخليه باللغه العربيه ما فهم مني لغايه ماقلت بوليس مان

اشكر مرورك المشرف وعسى الله يوفق الجميع

وعليكم السلام ورحمة الله وبركاته
لا ابشرك اليوم زحمه ومو اي زحمه حسيت اني بسوق الجمعه كل الجنسيات جايين غير الكويتيين

انا اتكلم عن موظفي المقابلات

في سفارة الرياض واحد مخصص للي ما عندهم لغة و البقية اذا ما فهم الواحد عليهم يرموا كلمة او ثنتين بالعربي

و الامريكان في السفارة افضل بمليون مرة من المتأمركين او بقية الموظفين

هذا سفارة الرياض اللي دخلتها اكثر من ١٠ مرات

ما اقدر احكم على قنصلية جدة او الظهران

جزاك الله خير على الافادة والله ييسر أمرك

في قنصلية الظهران الامريكان اللي يقابلون يطقطقون عربي وخلفهم موظفين عرب يشتغلون
بالاوراق ويستدعونهم اذا استدعت الحاجة

ممكن الوضع عندكم يختلف