الثلاثاء 10/9/2013
أصبحنا وأصبح الملك لله والحمد لله ولا اله الا الله والله أكبر
أنا: بابا شو رايك نطلع نفطر برا بابا: لا يابا فش داعي خلص بنفطر بالبيت 
أنا: لأ بدنا نطلع، أقلك بنطلع نتغدى بابا: لليش هالمصاريف يابا خلص بناكل بالبيت (لليش هو مصطلح فلسطيني بمعني لماذا) أنا: بابا تروح على مطعم بوابة جرش بابا: ايه ... بوابة جرش ... طيب خلص اوكي 
هيك صار بالزبط يا جماعة وبمجرد اني أخدت الموافقة على طول اتصلت باختي ام يوسف وقلتلها البسي وتعالي يلا بدنا نطش (نطش يعني نتفسح)
طلعنا من الدوار السابع باتجاه جرش
ومعلش ما في صور كتير للطريق لاني كنت أنا اللي بسوق فكنت كل ما بدي أصور شى أوقف على جنب وأصور 
المطعم بعد جامعة فيلادلفيا وقبل جرش وهو وجهة سياحية بحد ذاته
أو ما تدخل بتلاقي مبنى المطعم الداخلي وكمان قاعة للأفراح والليالي الملاح 
بس طبعا القعدات الخارجية أحلى وألطف 
وهيك كان مطل قعدتنا الرائع 
تغدينا مقبلات ومشاوي كعادة هذا النوع من المطاعم مع انه بابا كان نفسه بكباب عراقي بس ما عندهم. قعدنا يمكن 3 ساعات وماحسينا بالوقت الحلو وصار لازم نروح 
وصلنا اختي ورجعنا على البيت والا التلفون يرن أختي من الكويت
ام خالد: بدي أفهم ليش بابا وماما طالعين ونازلين معك مع انه كنا نترجاهم بالصيف يطلعوا معنا ما يقبلوا؟ 
أنا: مش عارفه والله بس أنا على طول ما بقولوا لأ معي 
ام خالد: همه يعني بحبوك أكتر منا ولا خايفين منك تزعلي؟ 
أنا: أظني بحبوني أكتر منكم عنجد اني مشاغبة صح 
على المغرب اجت بنت اختي وعزمتني على حلويات حبيبة
موقعه فى شارع المدينة المنورة بالقرب من مطعم أبوجبارة
وهذا هو التدمير النفسي والعاطفي بعينه 
أنواع مدمرة من الكنافة اللذيذة
وهون كانت جلستنا
والبوظة كان طلب بنت اختي
مش تفكروا أنا كمان طلبت بوظه لالالالالا أنا قمت بالغوص فى صحن الكنافة الخشنة 
روحنا وبنت اختي نامت عنا عشان بكره فى مشروع لطلعة غير شكل
استنوني
"
خلص وانت راجع مر على الامارات بنعملك أحلى مسخن
