شبكة ومنتديات زاد المسافر / زاد المسافر الآسيوية / زاد المسافر إلى باقي الدول الآسيوية

إضافة رد
30 / 10 / 2013, 01 : 04 PM
رقم المشاركة :  11 
خبير سويسرا



الملف الشخصي
تاريخ التسجيل : 28 / 06 / 2010
رقم العضوية : 15980
الإقامة : الامارات
المشاركات : 2,065
التقارير : 13
الجنس : ذكر
الحالة : مقدام غير متواجد حالياً
وسام خبير سياحي

رد: رحلتي لكوريا الجنوبيه سنــــ2013 ـــة (( سيئول ))

الحمدلله على السلامة خبيرتنا المتميزة

وبداية رائعة ,, وبانتظار باقي التقرير
30 / 10 / 2013, 54 : 09 PM
رقم المشاركة :  12 
مـشـرف زاد المسافر الى سـيـرلانــكـا



الملف الشخصي
تاريخ التسجيل : 19 / 07 / 2007
رقم العضوية : 227
الإقامة : في قلوب الأحبة
المشاركات : 5,874
التقارير : 10
الجنس : ذكر
الحالة : ALhindasi غير متواجد حالياً
رد: رحلتي لكوريا الجنوبيه سنــــ2013 ـــة (( سيئول ))

الحمدلله على السلامة أم عيسى


تعودنا أن تكون كتابة التقارير تعبيراً عن الإعجاب بالبلد ولكن هنا سوف يختلف الوضع ..... كوريا وكما عرفنا من بعض من زاروها وجهة غيرمفضلة للسياحة لنا كعرب وسوف نتابع الأسباب مع أم عيسى
30 / 10 / 2013, 54 : 09 PM
رقم المشاركة :  13 
خبيرة سفر وسياحة



الملف الشخصي
تاريخ التسجيل : 11 / 02 / 2008
رقم العضوية : 1140
الإقامة : الامارات
المشاركات : 2,023
التقارير : 15
الجنس : أنثى
الحالة : هداوه غير متواجد حالياً
وسام خبير سياحي

رد: رحلتي لكوريا الجنوبيه سنــــ2013 ـــة (( سيئول ))

اقتباس: المشاركة الأصلية كتبت بواسطة أبن السعودية
ماشاء الله تبارك الله
بداية قوية وجميلة من الخبيرة والمتميزة بتقاريرها
أم عيسى
تحياتي وتقديري وأحترامي لكي ..
ياهلا ومرحبا فيك أخويه ابن السعوديه

ماشاءالله انته هنيه

واتمنى ان شاءالله أقدملكم اللي فيه الفايده

وحياك الله بيننا




اقتباس: المشاركة الأصلية كتبت بواسطة بكادلى
السلام عليكم ورحمة الله وبركاته





ياسلام عليج ام عيسى عندها جديد والله لج وحشه اتمتع بتقاريرج يالغاليه ومتابع معاج
سجلي لي مقعد بالصفوف الاولي

ياهلااااا ومرحباااا بمشرفنا القدير بوعبدالله

وانا يسعدني ويشرفني انه تقاريري تنال اعجابكم

وحياك الله يابوعبدالله كرسيك موجود ع الدرجه الأولى




اقتباس: المشاركة الأصلية كتبت بواسطة ناصر كويتي
الحمدلله على السلامه ام عيسى ويارب العمر كله لعبادي وتشوفينه ريال وعنده عيال

فكره جميله كوريا الجنوبيه اصلا كرهناها بسب الكره لابارك الله في الكره

متابعين التقرير الجميل والبدايه الرائعه

الله يسلمك يارب

آمين ان شاءالله وافرح بأخوانه ان شاءالله

مدام كرهتوها بسبب الكره عيل ان شاءالله من خلال تقريري بزيد كرهكم لها باسباب ثانيه



اقتباس: المشاركة الأصلية كتبت بواسطة غدير
السلام عليكم ورحمة الله وبركاته


الحمدلله على السلامه اخت هدواه متابعين التقرير صديقتى وايد تمدحها تسكن لوتيه بنشوف فى تقريرج رايج عنها
وعليكم السلام ورحمة الله وبركاته

الله يسلمج يالغاليه

لوتيه جدا جميل وكان خاطري اسكن فيه بس كان غالي وايد

بس يلست في اللوبي فيه وتفرجت عليه

عيل خبري صديقتج تتابع تقريري عشان تقول رآيها في الأجزاء اللي بكتبها

نفيد ونستفيد



اقتباس: المشاركة الأصلية كتبت بواسطة سلطان1
الحمدلله على السلامة اختي الكريمة ام عيسى

وبداية موفقة وجميلة وان شاء الله متابعين لنشاهد كوريا الجنوبية بعدستك
ياهلا وسهلا فيك أخويه سلطان

والله يسلمك يارب

واتمنى من الله انه يوفقني ان انقل لكم نظره واضحه عن كوريا الجنوبيه



31 / 10 / 2013, 04 : 02 PM
رقم المشاركة :  14 
خبيرة سفر وسياحة



الملف الشخصي
تاريخ التسجيل : 11 / 02 / 2008
رقم العضوية : 1140
الإقامة : الامارات
المشاركات : 2,023
التقارير : 15
الجنس : أنثى
الحالة : هداوه غير متواجد حالياً
وسام خبير سياحي

رد: رحلتي لكوريا الجنوبيه سنــــ2013 ـــة (( سيئول ))

اقتباس: المشاركة الأصلية كتبت بواسطة ربيع الصحراء
رحله الى الشرق هذه المره
ما شاء الله في الامارات كانت اجازة العيد حلوه
واكثر الناس عيد برع البلاد
بتابع معك اريد اعرف ليش ما عجبتك
لا يكون الاكل ؟! ما اظن هداوه ما تحاتي الطبخ والاكل
ياهلا ومرحبا فيك أخويه

فعلا كانت اجازه حلوه ونحن عاد مانصدق وع طول نركب الطياره

تابعني وبتعرف




اقتباس: المشاركة الأصلية كتبت بواسطة تشتاق
الحمد لله على السلامه

والله تحمست باقي التقرير

بس سؤال على الطاير هل اسبوع كافيه لكوريا الجنوبيه ؟؟

الله يسلمك يارب

أعتقد تكفي بس حق سيئول



اقتباس: المشاركة الأصلية كتبت بواسطة أبوعبدالعزيز
ماشاء الله لاقوة الا بالله
يستاهل السمي الله يصلحه ويطول عمره على الطاعة

تسجيل مقعد واكتشاف ليش كوريا ماعجبت هداوة وبسبق الاحداث واسأل كيف التسوق فيها

اللهم آمين ويطول بعمرك ويخليك

هههههههههههههههه

عاد أنا مابحرق تقريري وبجاوبك

تابعني وبتعرف كل شي


اقتباس: المشاركة الأصلية كتبت بواسطة * ابوعمر *
كوريا مره وحده ام عبسي الله يهنيكم بس سوال كيف 7 ساعات بالروحه و10 بالرجعه اتوقع فى شي غلط
الفرق نص ساعه الى ساعه على الكثير

حتى نحن استغربنا

الظاهر الدريول هههههههههه اقصد الكابتن حب انه يحوطنا شوي في الفضاء

توا أسأل بنتي ويلسنا نحسب الوقت وتقريبا في الرده أقل من 10 ساعات بس ما أعرف بالضبط

يمكن 9 ساعات ونص

عموما المده كانت وايد طويله في الرده مب شرات السيره



اقتباس: المشاركة الأصلية كتبت بواسطة مقدام
الحمدلله على السلامة خبيرتنا المتميزة

وبداية رائعة ,, وبانتظار باقي التقرير

ياهلا وسهلا

والله يسلمك يارب

وحياكم الله بيننا



اقتباس: المشاركة الأصلية كتبت بواسطة ALhindasi
الحمدلله على السلامة أم عيسى

تعودنا أن تكون كتابة التقارير تعبيراً عن الإعجاب بالبلد ولكن هنا سوف يختلف الوضع ..... كوريا وكما عرفنا من بعض من زاروها وجهة غيرمفضلة للسياحة لنا كعرب وسوف نتابع الأسباب مع أم عيسى


الله يسلمك ويعافيك

ان شاءالله بقولكم الايجابيات والسلبيات

ولكن ممكن تعجب غيري حتى لوماعجبتني

الأذواق تختلف

والصراحه أحيانا نشوف تقارير يمدحون بلد معينه وتحسها روعه وخصوصا اذا تصويرهم حلو يخليك تتجنن وتقول لازم أزورها

ولكن ممكن تنصدم هناك وتشوفها ماتستحق وهنيه أكيد يرجع لذوق الشخص واللي يحبه

وانا ذوقي تقريبا واضح للجميع من خلال سفراتي وانطباعي عنها

والمشكله لما الله ينعم عليك وتلف وايد بلدان

فممن السهل انه تقتنع باي بلد وانته شايف اللي أحلى عنها




31 / 10 / 2013, 08 : 03 PM
رقم المشاركة :  15 
خبيرة سفر وسياحة



الملف الشخصي
تاريخ التسجيل : 11 / 02 / 2008
رقم العضوية : 1140
الإقامة : الامارات
المشاركات : 2,023
التقارير : 15
الجنس : أنثى
الحالة : هداوه غير متواجد حالياً
وسام خبير سياحي

رد: رحلتي لكوريا الجنوبيه سنــــ2013 ـــة (( سيئول ))





مقدمه



اول شي ..

خلوني اخبركم عن جزء اليوم


المفروض اني انزللكم المعلومات اللي جمعتها

وللاسف طلع عندي ملف مضروب وماطاع يفتح


شكله فيه فيروس والقهر انه أهم ملف اللي فيه كل الاماكن السياحيه في كوريا

من خلال اللي جمعتهم من التقارير اللي قريتها


وعشان ما ابا أحطلكم أي شي ، وعشان ما احتر وانقهر ، قررت

اني اعطيكم اليوم تفاصيل رحلتنا اليوميه

وبخلي هاي المعلومات في آخر التقرير

لين أقدر أودي لابي المصلح وأخليه يرجعلي الملف


ثانيا ...

قبل لا أسافر ومن خلال ماقريت عن كوريا من التقارير خذيت عنها فكره

انها جدا جدا جميله وراقيه ومتطوره
وخاصه سيئول

ولما وصلت اول يوم تفاجأت اني ماشفت اللي قريته وشفتها عاديه وبالعكس


في دول آسيويه أحلى وأرقى عنها شرات سنغافوره

ان شاءالله تفاصيل أكثر بتعرفونها من خلال التقرير

وع فكره انا سايره سيئول وانا عارفه اني بزور مدينه ومب مكان فيه طبيعه وجبال وبحيرات

وع هالاساس أعطيكم انطباعي

يالا تعالوا ويايي وعيشوا معاي ...



أحداث اليوم الأول

يوم المغادره




طلعنا من البيت الساعه 12 ونص بالليل وطيارتنا المفروض تطير الساعه 3 ونص

ولانه نحن عندنا البطاقه الذهبيه والفضيه من سكاي وورد قدرنا نسوي الشيك ان من صوب صالة البزنس

وقدرنا بعد ندخل اللاونج الخاص بدرجة رجال الأعمال

تمت اجراءاتنا بسرعه وسرنا نتعشى في اللاونج ونحن يالسين هناك سمعنا اعلان

انه الطياره بتتأخر وبتطير 4 وربع


والعيال خلاص منهارين يبون يرقدون

وموجود في درجة رجال الاعمال اسبا

قلت في خاطري خليني أسويلي مساج قبل لا اركب الطياره

ورايي درب وبكون ع السياحيه وأختكم متعوده ع البزنس


ودخلت سويت مساج لظهري مدة 25 دقيقه

ويوم طلعت أشوف بوعيسى والعيال واقفين برع يتريوني وانا مدوخه من المساج


ويقولولي : يالا تأخرنا

ونسير بسرعه صوب الجيت مالنا وكنا آخر الناس اللي واصله

زين ماطارت الطياره وانا حضرتي اسوي مساج

ركبنا الطياره وانصدمت انه الطياره شبه متروسه وأغلبهم كوريين

حشا من وين طلعوا

وزعت ع عيالي مخدات اللي تشبه حرف U وهاي دايما آخذها للرحلات الطويله وع طول رقدوا




موقف حلو صارلي



وانا يالسه ع كرسيي وبغيت اسدحه شوي مارضى ينسدح مثل كرسي ولدي

خبرت المظيفه عن الكرسي وقالت يمكن خربان ما اقدر أسويلج شي

قلتلها كيف يعني ؟

قالت اذا تبين بغير مكانج وبشوفلج اذا فيه كرسي فاضي

قلتلها : انا ما أقدر اسير ايلس بين الناس بعيد عن عائلتي

يلست وانا متضايقه واقول شو هالنحاسه

لابزنس ولا كرسي اروم اسدحه

وكل المظيفين كوريين ماعدا واحد مظيف مواطن

ولما يا صوبنا أقوله ..

كرسيي مب راضي ينسدح


قالي خوزي ، وسدحه لي

وشويه واتيني المظيفه الكوريه ، أثاري وحليلها أنا كاسره خاطرها

قالتلي

عندنا ورا 3 كراسي فاضيه وهاي حق استراحتنا


انا ممكن أخليج تنامين ساعه وعقب بوعيج ترجعين مكانج عشان نحن نرتاح

قلتلها موافقه وماخبرتها انه المظيف سدح كرسيي

وبوعيسى يقوللي عقب ساعه بتوعيج احسن لاتسيرين عشان ماتخرب ارقادج

قلتله برايه ساعه أمدد ظهري أحسن من لاشي

ويوم سرت ورا شفت الكوريات ماخذات صفين من الكراسي وكل صف فيه 3 كراسي وعازلينه بالستاره حق استراحتهم

قلت في خاطري مب هينات بعد هالكوريات


بس الغريبه أول مره أشوف جذي في طياره

عاد اختكم ماقصرت

شليت الحواجز اللي بين الكراسي واسدح عمري ورا الستار وأرقد هاذيج الرقده


قلت الحمدالله ماخسرت ع البزنس

وعقب نشيت من النوم أحس اني طولت وهي ماوعتني

قلت خلني اسير عند ريلي وعيالي الحمدالله ريحت شوي

ويوم رديت لقيت عبادي سادح عمره ع كرسيين منهم كرسيي

قلت فديته مابخرب ع ولدي وبرد ورا وبكمل ارقادي


ورقدت رقدت الاموات ومانشيت الا قبل لاتنزل الطياره بنص ساعه

بس السلبيه الوحيده في مكاني انه عزكم الله الحمامات ورايي وانزعجت شوي من فتح وتسكير الابواب

احمدي ربج بعد تتشرطين

الظاهر انه المظيفات ماحصلن وقت يرتاحن عشان جذي ماغثوني


وااااايد مهم



لما كنا في الطياره عطونا 3 أوراق نعبيهم

وبوعيسى رقد وماعباهم واضطرينا في المطار نعبيهم وتأخرنا عن الناس


فهاي نقطه وايد مهمه

عبوهم كلهم في الطياره وكلهم بتحتاجولهم


نكمل معاكم أحداث هذا اليوم



وصلنا بعد 7 ساعات ونص طيران

















وكانت الساعه وقت وصولنا







ومشينا ورا الناس لين الكاونترات







وطلعت هاي الكاونترات ماتحتاج الجوازات انما تاخذ ورقه من الاوراق اللي عبيتوها

وقفنا نعبي الاوراق مع بعض الناس اللي ماعبتهم شراتنا

وتأخرنا وروحوا عنا وظلينا آخر الناس






ويانا مال الأمن وقال يلا بسرعه


وعقب عبرنا بعد ماخذوا ورقه لونها أصفر

وسامحوني ماصورت الاوحده من الثلاث أوراق

عقب ماعدينا هاي الكاونترات تبعنا علامة استلام الشنط ونزلنا تحت بالسلم الكهربائي











ولكن شفنا الناس تركب قطار












وركبنا معاهم وشفنا كاونتر ثاني لختم الجوازات


وهنيه لازم نعطيهم ورقه ثانيه

ونفس السالفه وقفنا نعبي الأوراق


وهاي صورتها ، واعتقد يمكن هاي الفيزا






عقب ماعبينا كل البيانات خذونا واحد واحد عند الكاونتر وصورونا بالكاميرا اللي حاطنها عداله

وبعد خذوا بصمة الأصبع

كأنه بشاكير يصورنها ويبصمونا


وعقب خبرونا انه لازم عند خروجنا من المطار نعطي ريال الأمن الورقه الثالثه واللي عبيناها ويا هاي الورقه

وعقب نزلنا تحت عشان نستلم شنطنا

ولأنه نحن آخر الناس والجميع خذا شنطه


لقينا شنطنا ساحبينهم من على السير ومنزلينهم ع الأرض

قلنا زين والله ماتعبونا نسحبهم

وعند خروجنا سلمناهم الورقه الاخيره

وطلعنا نبا نطلع برع ندور تكاسي المطار


انطباعي عن مطارهم



المطار نظيف ومرتب ومنظم ومتطور

وتعاملهم جدا راقي وبشوشين

وماشفنا الاجراءات الامنيه اللي نشوفها في مطارات العالم ، تحسهم مب خايفين من شي

والاجراءات مشت بكل سهوله ويسر




الغلطه اللي أباكم تنتبهون عليها



لاتغلطون غلطتنا

ونحن طالعين بعدنا ماطلعنا برع يانا واحد وقال تبون تكسي

قلناه أوكي : بكم

قال ع العداد

انا هاي الحركه أعرفها واتحذر منها وما آخذ أي واحد يقول تكسي

الا التاكسي الرسميه واللي تكون واقفه برع عند كل مطارات العالم



ولكن يوم قال ع العداد صدقته وقلت هذا مابيقص علينا

وهو ماقص علينا ولكن هو تكسي يتبع التكسي الاسود

وهالنوع اغلى التكاسي في كوريا


والصراحه السياره ممتازه بس مب كبيره

ولكن كفت كل شنطنا

والسايق يعرف انجليزي وجدا رآئع ويلس وايد يعطينا معلومات ويعلمنا بعض الكلمات الكوريه

ولكن للاسف طلع علينا غالي بـ 150 الف وون كوري


تقريبا 500 درهم أو أقل ما أدري بصراحه كم بالضبط لأنه عملتهم صعب نحسبها

وفي العوده أجرنا سياره فان أم 7 راكب وكبيره وفنانه بـ 90 الف عن طريق الفندق

جربوا انكم تسألون الفندق اذا بيرسللكم سياره وبكم بيكون سعرها

يمكن أرخص وأفضل من انكم تدورون ع التكسي المناسب

واذا ماقدروا أو ماناسبكم عن طريق الفندق في هاي الحاله

خذوا تكاسي المطار اللي صافه برع المهم ماتكون السودا



ملاحظه مهمه جدا



لازم تاخذون معاكم عنوان الفندق بالكوري وتطبعونه قبل لاتسافرون

عشان تراوون راعي التكسي


وايد منهم مايعرفون انجليزي ، يعني انته وحظك


معلومات عرفتها

قبل لا أسافر من الاعضاء عن التكاسي في كوريا الجنوبيه


أنواع التكاسي



Regular Taxi

وهو من التكاسي العادية

ويبدأ العداد من 1600 ون لأول 2 كيلو متر

ثم يبدأ بالتزايد ويمتاز بلونه الأبيض " التكاسي جدا نظيفة "

سعر التكاسي من المطار إلى المدينة بحدود الـ 45000 ألف ون


Deluxe Taxi


وهو من التكاسي الفخمة ويبدأ العداد من 4000 ون لأول 3 كيلو


يمتاز بلونه الأسود والأصفر وبمساحته الواسعة من الداخل ونظافته

سعر التكاسي من المطار إلى المدينة بحدود الـ 70000 ألف ون



شوفوا الفرق بين هاي المعلومه وبين اللي دفعناه

والواقع اللي شفناه


انه التكاسي السودا فعلا يبدأ العداد من 4000 وون كوري

والتكاسي الثانيه الملونه غير الأسود يبدأ العداد من

2200 وون كوري

وعقب كم يوم لاحظنا انه التعرفه زادت من 2200 الى 2800 وون كوري

واذا ركبنا التكسي من عقب المغرب ندفع فوق قيمة العداد 600 وون كوري اضافيه

وهذا متفق عليه وحتى في بعض التكاسي ورقه موضح فيها هذا الموضوع

وأحيانا هم يخبرونك قبل لاتركب وياهم خصوصا اذا السواق يعرف انجليزي







نتابع معاكم أحداث هذا اليوم في

الجزء الياي




01 / 11 / 2013, 20 : 01 AM
رقم المشاركة :  16 
مشرف زاد المسافر إلى أسبانيا



الملف الشخصي
تاريخ التسجيل : 16 / 02 / 2008
رقم العضوية : 1156
الإقامة : الرياض
المشاركات : 1,061
الجنس : ذكر
الحالة : تشتاق غير متواجد حالياً
رد: رحلتي لكوريا الجنوبيه سنــــ2013 ـــة (( سيئول ))

الله يعطيك العافيه

ومشكوره على النصائح ومعلومات التكاسي


من جد غالي التاكسي مرره مره 500 درهم
02 / 11 / 2013, 18 : 12 PM
رقم المشاركة :  17 
مشرفة زاد المسافر للجزر



الملف الشخصي
تاريخ التسجيل : 13 / 01 / 2010
رقم العضوية : 11461
الإقامة : العراق - الدوحة - ألمانيا
المشاركات : 5,034
التقارير : 1
الجنس : أنثى
الحالة : بـغـــداد غير متواجد حالياً
رد: رحلتي لكوريا الجنوبيه سنــــ2013 ـــة (( سيئول ))

منورة اختي ام عيسى...
كعادتج جميلة بتفاصيلج وانتقاءاتج وملاحظاتج
متابعين بشوق


((قُلِ اللَّهُمَّ مَالِكَ الْمُلْكِ تُؤْتِي الْمُلْكَ مَن تَشَاء وَتَنزِعُ الْمُلْكَ مِمَّن تَشَاء وَتُعِزُّ مَن تَشَاء وَتُذِلُّ مَن تَشَاء بِيَدِكَ الْخَيْرُ إِنَّكَ عَلَىَ كُلِّ شَيْءٍ قَدِيرٌ))

وكم استودعنا في ودائعك عراقنا .. ولم يزل الدم يجري ..
ففرج اللهم برحمتك عليهم فأنت بمن ظلمهم وحدك تدري
اللهم بردا وسﻻما .. عليك ياعراق






03 / 11 / 2013, 57 : 09 AM
رقم المشاركة :  18 
خبيرة سفر وسياحة



الملف الشخصي
تاريخ التسجيل : 11 / 02 / 2008
رقم العضوية : 1140
الإقامة : الامارات
المشاركات : 2,023
التقارير : 15
الجنس : أنثى
الحالة : هداوه غير متواجد حالياً
وسام خبير سياحي

رد: رحلتي لكوريا الجنوبيه سنــــ2013 ـــة (( سيئول ))

صباح الخيرات



اقتباس: المشاركة الأصلية كتبت بواسطة تشتاق
الله يعطيك العافيه

ومشكوره على النصائح ومعلومات التكاسي


من جد غالي التاكسي مرره مره 500 درهم

الله يعافيك يارب

وفعلا غالي والبلد كلها عموما غاليه




اقتباس: المشاركة الأصلية كتبت بواسطة بـغـــداد
منورة اختي ام عيسى...
كعادتج جميلة بتفاصيلج وانتقاءاتج وملاحظاتج
متابعين بشوق
النور نوركم حبيبتي

حياالله أهل بغداد

تسعدني متابعتكم واحب تفاعلكم





03 / 11 / 2013, 25 : 10 AM
رقم المشاركة :  19 
خبيرة سفر وسياحة



الملف الشخصي
تاريخ التسجيل : 11 / 02 / 2008
رقم العضوية : 1140
الإقامة : الامارات
المشاركات : 2,023
التقارير : 15
الجنس : أنثى
الحالة : هداوه غير متواجد حالياً
وسام خبير سياحي

رد: رحلتي لكوريا الجنوبيه سنــــ2013 ـــة (( سيئول ))

نتابع معاكم أحداث يوم وصولنا..

لسيئول





أحداث هذا اليوم



طلعنا من المطار متجهين للفندقنا وكانت درجة الحراره





ونسيت كم خذينا من الوقت لين وصلنا

أول ماوصلنا سوينا الشيك ان وكنا تعبانين

بس قلنا بنريح شوي وبنطلع نستكشف المنطقه


وبنتعشى وبنرجع بدري نرتاح ونرتب أغراضنا

مثل ماخبرتكم قبل انه عجبنا فندقنا وكان اختيار موفق


صور سويتاتنا


أول مادخلنا السويتات فرحنا انه حجمهم كبير وفيهم كل شي

وكانوا جنب بعض سويتنا وسويت العيال وكاهم متشابهين



















قسم الشاي وتحته الميكرويف






جهة النوم







التسريحه والتلفزيون في غرفة النوم







وهنيه التلفزيون اللي صوب الصاله






الصالهه وقسم البانتري






قسم البانتري وفيه فرن وثلاجه وبعض اواني الطبخ

عاد القهر هاي اول مره أسافر لبلد وخصوصا مع العايله وما اشل أبدا أي أكل ولامعلبات ولاشي

وندمت أشد الندم

في الأجزاء اليايه بتعرفون كيف عانينا من الاكل ورغم انه الاعضاء نبهوا ع موضوع الاكل

ووصونا انه ناخذ معانا معلبات وغيره ، بس انا ما صدقت

فلت بلد كبيره ومتطوره أكيد بحصل في مطاعمها اللي ممكن يناسبنا غير اللحوم والدجاج

ولكن صدق صدق تعبنا من هالموضوع

ان شاءالله بتشوفون هالشي في الاجزاء اليايه








جهة الجلسه ، وهاي الكنبه ممكن تتحول سرير







وفي سويت العيال حولنا الكنبه لسرير حق عبادي







هذا الحاجز بين الصاله وغرفة النوم

وهو عباره عن باب سلايدنج






من الاشياء اللي موفرينها لنا











هذا جهاز التوست والجدر الكهربائي

ياسلام لو يبت العيش وبهاراتي والمعلبات

جان سويت أحلى الاطباق







الحمام ونتوا بكرامه












طبعا كان في الحمام فنتك من فناتك الكوريين


عاد انتوا بروحكم حاولوا تعرفون استخدامات هالجهاز الخاص بالمرحاض

عزكم الله





هذا الاكل الوحيد اللي يبته ويايي لكوريا

وهو شوكولا سويسريه كان جايبنها معاه بوعيسى من سويسرا






المنظر الخارجي من شباك غرفتنا

منظر ليلي





الصراحه مصوره صور أكثر للمنظر الليلي بس للاسف اغلبهم عاكسه صورتي

في الزجاج أو التصوير يكون مب حلو

واعتقد التصوير النهاري أفضل ويبين المناظر أفضل



























03 / 11 / 2013, 29 : 10 AM
رقم المشاركة :  20 
خبيرة سفر وسياحة



الملف الشخصي
تاريخ التسجيل : 11 / 02 / 2008
رقم العضوية : 1140
الإقامة : الامارات
المشاركات : 2,023
التقارير : 15
الجنس : أنثى
الحالة : هداوه غير متواجد حالياً
وسام خبير سياحي

رد: رحلتي لكوريا الجنوبيه سنــــ2013 ـــة (( سيئول ))

جولتنا الأولى في شوارع كوريا



بعد ماريحنا شويه في غرفنا ،كنا حاسين انه نشيطين ومتشوقين نمشي في شوارع كوريا

وفي نفس الوقت كنا نبا نطلع نتعشى

نزلنا وسألنا الرسبشن عن مكان الحياه ووين الاسواق والمطاعم

خبرونا انه قريب وقالوا من تطلعون من الفندق خذوا يسار

وعند نهاية الطريج لفوا يسار وامشوا ع طول وبتشوفون الحياه جدامكم

عاد نحن طلعنا ولما وصلنا لنهاية الطريج

استوى الخلاف العائلي الأول

أنا أقولهم لفوا يسار

وبوعيسى والعيال يقولون لا بعد مانقطع الشارع نلف في الشارع الياي

مشيت ورا شورهم ، شككوني في نفسي


بعد ماقطعنا الشارع كان جدامنا شارعين هنيه احترنا أي شارع ناخذ

قلت ماشي الا اسأل الاكوريين

سمعت عنهم انه شعب مبتسم وحبوب ويساعد ولو حتى البعض منهم مايعرف انجليزي



وشفت بنت مودرن تمشي تقربت منها واقولها

لو سمحتي ( طبعا بالانجليزي )

تخيلوا انا أمشي أقولها لوسمحتي وهي مطنشتني وتمشي في طريجها

وأنا الحقها

واقول لو سمحتي لوسمحتي

حسستني كاني طلابه ( يعني شحاته ) تطلب وراها

تفاجأت من ردت فعلها وقلت معقوله تتجاهلني جذي

بعدين قلت في خاطري

مابحكم ع الشعب الكوري عشان هاي

شفت وحده ثانيه

ونفس المشهد يتكرر

لااااا معقوله

شو هاي المعامله الخايسه منهم

وعقب اجتهدنا ومشينا في الشارع اليسار

وهو نفس الجهه اللي اقترحتها بس في الشارع المقابل له

مشينا شوي وووقفنا ، نسيت منو قال من عائلتي

لا الشارع الثاني اللي ورا

تخيلوا

نسير ونرد نفس المكان

وعقب شفت عائله كوريه قلت مافي مجال لازم أحاول بعد

لازم حد يساعدنا مافينا نرجع الفندق

ولافينا طاقه نلفلف وايد بعدها أجسامنا مرهقه

والف لك حمد شكر يارب

وأخيرا عطونا ويه وردوا علينا

وخبرونا انه نكمل لين أخر هالشارع وعقب نقطعه ، ولاحظوا

انه نحن قطعنا الشارع قبل

وقال انتوا بتشوفون بروحكم المولات

ومشينا وصادف انهم مشوا معانا نفس الطريج

وعقب طلع الطريج اللي انا فهمته من موظف الفندق ، هو الصح



ع العموم هاي الجهه يسمون شارعها ميونغ دونغ

وفيها مولات وفنادق وأكشاك

وفيه شارع طويل وله تفرعات وكله محلات ع الجانبين وأكشاك في الوسط


ركزوا ويايه وبشرحلكم أكثر كيف هاي المنطقه


من نطلع من فندقنا ع جهة اليسار نمشي لين آخر الشارع وهي مسافه قصيره

وعقب نلف يسار ونمشي بعد لين آخر الشارع وهو شارع طويل

وهنيه

اذا لفينا يسار بتشوفون كل الاسواق اللي خبرتكم عنها

ولكن لو لفيتوا يمين

وقطعتوا الشارع وكملتوا سيده يعني ع طول بعد هنيه بتشوفون مولات واسواق شعبيه اسمها

نامديمون

وللاسف ماحصلت وقت اكتشف هالجزء رغم انه عدالنا


الحين بعطيكم صور من جولتنا في هاليوم

وفي الاجزاء اليايه بعطيكم صور أكثر لهالجزء





الصور مب واضحه وايد ومب كثيره لأنه كنا نحس بالتعب رغم الحماس اللي فينا

وماكان لي خاطر وايد وانا أصور



















تخبلنا ع هالمول يوم شفناه من برع بس عقب بخبركم سالفته







ونحن نمشي والعالم زحمه ، ندور مطعم بس مانشوف شي مناسب







طبعا الاكشاك اللي تسوي اكلاتهم موجوده بكثره

بس ولامره شفت لحم كلاب مثل ماسمعت



تخيلوا هالاكله جربتها في يوم ثاني

الصراحه اشتهيتها بس ماطلعت لذيذه لأنه الطبقه اللي تحتها كانت حلوه يعني سكريه

والبيضه مالحه عاديه






ونحن نمشي شفت فندق آيبس ( ibis)

وتذكرت انه قريت انه فيه مطعم هندي وأكله حلال

قلت يانا الفرج وأخيرا حصلنا مطعم ممكن ناكل فيه

دخلنا الفندق وسألنا عن الطعم لين حصلنا في الفندق في الدور الأرضي






شفنا في مدخل الفندق دعايه عن مطعم يقدم كباب ودونر

قلنا أكيد مطعم تركي ولكن خبرونا انه كوري ما أدري والله ممتأكده

بس المهم مايصلح لنا






وصلنا المطعم











































































انطباعي عن المطعم

من كل النواحي ممتاز مقارنه بالمطاعم المتوفره

سواء من الديكورات وأكله وخدمته ولكن عيبه انه شويه غالي

تقريبا 550 درهم طلع علينا رغم انه مب طالبين وايد






وعقب ماتعشينا رجعنا ع طول الفندق عشان نرتاح





تابعوني ...

في يوم جديد ورحلات جديده في سيئول

إضافة رد

المواضيع المتشابهه
الموضوع كاتب الموضوع المنتدى الردود آخر مشاركة
[ بـرنـامـج سياحي ] ملخص لكل شي يهمك عن كوريا الجنوبيه ( سيئول ) هداوه زاد المسافر إلى باقي الدول الآسيوية 29 18 / 01 / 2016 06 : 11 AM
اول مشاركاتي رحلتي السريعه للديار الجنوبيه ( الراحه ) ابوماجد999 زادك في المصايف 7 17 / 10 / 2013 24 : 09 PM


المواضيع ، تعبر عن رأي كاتبها ويتحمل مسؤوليتها فقط ، ولا تعبر بالضرورة عن رأي شبكة ومنتديات زاد المسافر .