شبكة ومنتديات زاد المسافر / زاد المسافر الآسيوية / زاد المسافر إلى باقي الدول الآسيوية

إضافة رد
24 / 11 / 2013, 46 : 02 PM
رقم المشاركة :  81 
درجة سياحية



الملف الشخصي
تاريخ التسجيل : 28 / 05 / 2013
رقم العضوية : 56927
الإقامة : الرياض
المشاركات : 150
الجنس : أنثى
الحالة : Canada غير متواجد حالياً
رد: رحلتي لكوريا الجنوبيه سنــــ2013 ـــة (( سيئول ))

كالعاده اسلوب مشوق وتفاصيل مهمه بس من الاشياء اللي تحمسني لتقاريرك الطباخ خساره ماجبتي العده وياك


متابعين اليوميات بكل شوق
اكثرو من الاستغفار فإنه مفتاح المعجزات❤❤
استغفر الله واتوب اليه
اللهم صـل على نبينا محمد وعلى آله وصحبه اجمعين
25 / 11 / 2013, 11 : 03 PM
رقم المشاركة :  82 
خبيرة سفر وسياحة



الملف الشخصي
تاريخ التسجيل : 11 / 02 / 2008
رقم العضوية : 1140
الإقامة : الامارات
المشاركات : 2,023
التقارير : 15
الجنس : أنثى
الحالة : هداوه غير متواجد حالياً
وسام خبير سياحي

رد: رحلتي لكوريا الجنوبيه سنــــ2013 ـــة (( سيئول ))


مساكم الله يالخير



اقتباس: المشاركة الأصلية كتبت بواسطة رحال 2020
أم عيسى تقرير في قمة الإبداع وملاحظاتك في محلها ومنتظرين للنهاية لنتعرف على باقي التفاصيل المثيرة وفعلاً المرات الجايية لاتنسين شنطة صغيرة للأكل وتقبلي خالص تحياتي

ان شاءالله اليوم بيوصلكم الجديد

والمره اليايه بشل سحاره مب شنطه صغيره

خصوصا اذا سايره صوب هاي البلدان



اقتباس: المشاركة الأصلية كتبت بواسطة BUSHARAF
السلام عليكم ورحمة الله وبركاته

الحمدلله على السلامة ،،،، دائماً تقاريرك دسمة ومليئة بالمعلومات ماشاء الله.

أنا سافرت بعدكم وتحديداً في 24 / 10 / 2013 م ولكن وجهتي كانت مدينة بوسان في أقصى الجنوب لحضور مؤتمر هناك لمدة 5 أيام ومنها طيران إلى اليابان.

كثيرين قالو أن بوسان أجمل بكثير من سيؤول.

متابع تقريرك الجذاب .


وعليكم السلام ورحمة الله وبركاته

الله يسلمك ويسلم غاليك

الحمدالله نحاول نبذل كل جهدنا عشان نفيدكم

عيل اذا نزلت تقرير عن بوسان خبرني عشان اعرف تجربتك

وأكيد انتوا ماعانيتوا في الأكل لأنهم بيهتمون فيكم دام انكم في مهمه رسميه




اقتباس: المشاركة الأصلية كتبت بواسطة BUSHARAF
الحمدلله أخذت معايا علب تونة وجبنة وحمص وجبن.

ولكني وجدت في منطقتي مطعم هندي ،، تركي ،، إيطالي وكلهم روعة.

ماشاءالله عليك

طلعت أشطر عني

وحظك زين انه هاي المطاعم قريبه منك



اقتباس: المشاركة الأصلية كتبت بواسطة Canada
كالعاده اسلوب مشوق وتفاصيل مهمه بس من الاشياء اللي تحمسني لتقاريرك الطباخ خساره ماجبتي العده وياك


متابعين اليوميات بكل شوق

لاتذكرني بروحي حسيت بالغصه اني ماشليت العده

لكن تابعني وبتشوف مفاجأه




25 / 11 / 2013, 20 : 03 PM
رقم المشاركة :  83 
خبيرة سفر وسياحة



الملف الشخصي
تاريخ التسجيل : 11 / 02 / 2008
رقم العضوية : 1140
الإقامة : الامارات
المشاركات : 2,023
التقارير : 15
الجنس : أنثى
الحالة : هداوه غير متواجد حالياً
وسام خبير سياحي

رد: رحلتي لكوريا الجنوبيه سنــــ2013 ـــة (( سيئول ))



مقدمه


تولهت ع المقدمات


كوريا من ناحية النظافه

هي نظيفه ومب نظيفه

نظيفه ...

انه الشوارع والاماكن العامه كلها نظيفه ومايرمون القاذورات ع الارض

ومب نظيفه من ناحيتين ...

الأولى.. في كثير من الشوارع نشم فيها روائح خايسه

وغير طبعا روائح
المطاعم اذا مريتوا من عدالها

والثانيه .. وهذا الشي تفاجأت فيه ولوع جبودنا وهو انهم وايد يتفلون ع الارض (يعني يبصقون )

الحين في بمبي عرفنا انهم ياكلون باان وعشان جذي يتفلون

بس هنيه شو ياكلون عشان يتفلون طول الوقت

والله كنت أقرف وانا أدوس الارض أحسها كلها تفال

وأذكر واحد ونحن نمشي عداله قام تفل جدامنا ومب أي تفاله

انزين يالوصخ راعينا





يوم الاثنين يوم وقفة عرفه

11/14/ 2013



لأنه اليوم صيام فقلنا بنخليها تسوق ومابنرهق عمارنا

اتفقت مع بوعيسى انه هو يظل نايم مع عبادي ويرتاحون في الفندق

وانا والبنات نسير مول كويكس ونتسوق لين العصر

وعقب بوعيسى ايينا هو وعبادي عشان ندخل الاكواريوم اللي في المول

وعقب نسير نفطر

مول كويكس

COEX



موقع المول ع النت


Welcome to Coex


خريطة المول





نشينا انا والبنات متأخرين وكانت حرارة الجو





ركبنا التكسي بعد ماراويناه العنوان





وخذا منا الطريج نص ساعه كان بعيد شوي

وراعي التكسي كان يعرف انجليزي


وسولفنا وياه وعطانا وايد معلومات بس ما اتذكر شي من اللي قاله

وصلنا المول ونحن كلنا حماس



الصراحه ونحن يايين كوريا ماخذين فكره انه أسواقها تجنن

فكنا متحمسين وايد للتسوق

والاماكن اللي زرناها قبل للتسوق ماعجبتنا وايد وماحصلنا اللي يرضينا


ملحوظه

ترا التسوق يفرق من شخص لشخص

حسب حاجته وحسب ستايله وحسب ميزانته

وعشان جذي انا أعطيكم رآيي الشخصي ومن واقع تجربتي

ممكن تناسبكم وممكن ماتناسبكم


نكمل أحداث اليوم





وصلنا المول ودخلنا

























لاحظنا انهم ينسقون الزهور بطريقه حلوه والظاهر انه فيه احتفال بيكون في هالمكان

بس ماندري متى





















ونحن نمشي كانت الصدمه المره





لقينا لافته تقول انه المول مسكر للصيانه




صابتنا خيبة أمل

قلنا خلاص بنتمشى وبنستكشفه

لقينا فيه جزء مفتوح داخل المبنى بس مب تابع لهالمول وفيه محلات

تمشينا فيه وماعجبنا شي وكانت عدد المحلات مب كبيره

وفيه قسم كبير للمطاعم









وعقب رجعنا نمشي في صوب ثاني

وشفنا سينمات والمكان كبير









كملنا في اتجاه الاكواريوم ولما وصلنا وعرفنا مكانه

كملنا سيده ( ع طول ) لين شفنا محلات لوتي للديوتي فري ( يعني اسواق حره ماعليها ضرايب )

المحلات كلها ماركات ولكن عددها قليل

وفي المول فندق الانتر




دخلنا شويه وطلعنا ماكنا متشجعين نشتري ماركات لأنه عندنا نيه نسير الأوت ليت

ع فكره أنا ما أتشجع اشتري ماركات الا من اوروبا نفسيا ما اثق فيهم

شفنا انه هالمشوار طلع ع الفاضي

وفكرت في بوعيسى وعبادي وقلت مافي داعي أوعيهم وأخليهم ايون هالمشوار

وفي نفس الوقت مانقدر نتريا لين لعصر لين يقومون وايونا

ونحن خلصنا تمشي وفاضيين

فقررنا ندخل الاكواريوم بدونهم

وعقب كلمت بوعيسى وخبرته

وقال أحسن

يبا الفكه من المشوار الريال صايم

بس اتفقنا مانخبر عبادي عشان مايحط في خاطره ويزعل منا








25 / 11 / 2013, 27 : 03 PM
رقم المشاركة :  84 
خبيرة سفر وسياحة



الملف الشخصي
تاريخ التسجيل : 11 / 02 / 2008
رقم العضوية : 1140
الإقامة : الامارات
المشاركات : 2,023
التقارير : 15
الجنس : أنثى
الحالة : هداوه غير متواجد حالياً
وسام خبير سياحي

رد: رحلتي لكوريا الجنوبيه سنــــ2013 ـــة (( سيئول ))


جولتنا في الاكواريوم




موقعهم ع النت


ؤع؟¢½؛ ¾ئؤي¾ئ¸®؟ٍ؟، ؟?½إ°ح?» ب¯؟µاص´د´ظ.


للاسف نسيت كم سعر التذاكر
























































































































































































































































































































في رحلتنا لكوريا حصلنا نظرات اعجاب وكم مره في كم موقف

يوقفون يقولنا عيونكم حلوه

ولكن في الاكواريوم حصلت اعجاب من نوع خاص

من واحد كوري

مب راضي يهدني كله يحاول يتلصق فيني

حتى في الأخير ماقدرت أقاومه وبادلته الاعجاب

وصورته عشان تكون عندي ذكرى


المعجب الكوري
















ويسويلي حركات







أحلى منظر شفته وانا في الاكواريوم

هم أطفال المدراس













وهاي تشرحلهم







في نهاية جولتنا لابد وان نشتري بعض المنتجات البحريه من الهدايا










































انطباعي عنه


اذا عندكم يهال بيكون حلو وممتع لكم

بس بالنسبه لنا كان عادي

لأنه نحن متشبعين من الاكواريوم وبناتي كبار

بس من قهرنا انه ضربنا هالخط ومابغينا نرجع ع الفاضي



نكمل أحداث هذا اليوم


بعد ماخلصنا الاكواريوم قررنا نرجع الفندق وقلنا الحمدالله ماضاع علينا هاليوم

ع الاقل سوينا شي

طبعا الحين بنرجع عند بوعيسى وعبادي

وبنطلع كلنا ندور مطعم نفطر فيه









25 / 11 / 2013, 31 : 03 PM
رقم المشاركة :  85 
خبيرة سفر وسياحة



الملف الشخصي
تاريخ التسجيل : 11 / 02 / 2008
رقم العضوية : 1140
الإقامة : الامارات
المشاركات : 2,023
التقارير : 15
الجنس : أنثى
الحالة : هداوه غير متواجد حالياً
وسام خبير سياحي

رد: رحلتي لكوريا الجنوبيه سنــــ2013 ـــة (( سيئول ))

الافطار في المطعم الهندي



قررنا نفطر في المطعم الهندي ومانتعب عمارنا باللف والبحث عن مطعم مناسب

لبسنا وتمشينا لين المطعم

وفديته عبادي أصر انه يصوم ويانا الله يحفظه

طلعنا من الفندق وخذينا يمين

ونحن في الطريج فندق ذا بلازا










في طريجنا كان هذا الكوفي وللاسف ماجربته










خساره ماجربناه





وصلنا منطقة الاسواق والحياه

وهذا المول تقريبا مجابل فندق ايبس من الشارع المقابل






وهذا مول ثاني مقابلنه بس كله ماركات





وصلنا المطعم






























اليوم اخترنا غرفه خاصه

تعرفون صيام ومانبا فضايح وقرقعة صحون










فتحنا المنيو وبدينا نختار ونتشهى الاكل









































هاي الاطباق اللي لحقت اني أصورها




















طبعا مالحقت أصور كل شي

عند البطون تعمى العيون

هاي فاتورتنا





تقريبا بـ 650 درهم

طبعا السعر مبالغ فيه ع اختياراتنا من الاطباق

وعقب ماخلصنا فطورنا قررنا نسير جوله بحريه ع نهر هان

طبعا كنا ماخذين معلومات من الفندق

وراعي التكسي اللي خبرتكم عنه اللي سولفنا وياه بعد هو علمنا وين نسير

وركبنا التكسي في اتجاه مشوارنا الثالث في هاليوم








25 / 11 / 2013, 34 : 03 PM
رقم المشاركة :  86 
خبيرة سفر وسياحة



الملف الشخصي
تاريخ التسجيل : 11 / 02 / 2008
رقم العضوية : 1140
الإقامة : الامارات
المشاركات : 2,023
التقارير : 15
الجنس : أنثى
الحالة : هداوه غير متواجد حالياً
وسام خبير سياحي

رد: رحلتي لكوريا الجنوبيه سنــــ2013 ـــة (( سيئول ))

جولتنا النهريه



وقفنا التكسي وعطيناه العنوان





وهاي خريطة الموقع موظف الفندق طبعها لي





أول ماوصلنا ونزلنا مشينا صوب مبنى ولكن نشوفه انه كله مطاعم ومانشوف سفن





سألناهم وخبرونا انه نمشي جدام

مشينا وكان الجو جميل وسرنا عند المبنى الثاني





ولقينا في صوب ثاي مقابل هالمبنى بعد مبنى ثاني

لقطع التذاكر





قطعنا التذاكر ونسيت طبعا الاسعار بس اعتقد حسب التذكره الشخص بـ 95 الف





وعقب دخلنا المبنى





وخبرونا انه السفينه بتفتح بعد شويه





اشترينا أيس كريم ويلسنا نتصور وتيلسنا ع الكراسي

وشويه ونشوف قروب سياحي كبير ما أدري هم صينين ولاكوريين ور يابانيين

الله أعلم ، المهم كانوا مع المرشد

وكان هالقروب بيركب ويانا


بعض اللقطات ونحن ننتظر















وعقب فتحوا البوابه ودخلنا ع راحتنا وسرنا فوق ع سطح السفينه

وماشاءالله القروب خذا المكان كله ولاتركولنا كرسي

حاولنا نوقف ع طرف السفينه انا وعيالي عشان نتفرج

وتحركت السفينه ومشينا

كان الجو جميل والمناظر حلوه في الليل ، لين وصلنا الجسر




































عقب طلبوا منا ننزل عشان بتمر السفينه تحت الجسر

ومن هالجسر تنزل نوافير ماي وملونه بالاضاءه


























بعد مانزلنا شفنا يلسات ومسرح خذينا مكانا مع الناس ويلسنا

وشويه بدأ عرض مسرحي والمفاجأه انهم كانوا يقلدون النانتا

وللاسف ماعجبنا التقليد وخصوصا كان استهبال اللي يسوونه

الأصل كان أحلى بوايد




















ومن انتهى العرض المسرحي وصلنا للميناء وانتهت الرحله


انطباعي عن الرحله ..


أحسها ماتسوى وما استانسنا فيها وايد

وضيعنا وقتنا ع الفاضي



عقب طلعنا من السفينه نتمشى ع نهر هان

وكان الجو جميل وحلو

وفي عدد قليل من الناس اللي تمشي




















والصراحه ممتأكده اذا هذا الجزء من نهر هان اللي الناس تكلمت عنه ولا فيه مكان ثاني يقصدونه

المهم تمشينا في هالمكان وماطولنا فيه

وقررنا نسير السوق اللي يفتح من المغرب لين الفجر

قلنا بنعوض التسوق عقب ماصارلنا المقلب في مول كويكس

وبنكمل يومنا بمشوارنا الأخير للاسواق الليليه






25 / 11 / 2013, 38 : 03 PM
رقم المشاركة :  87 
خبيرة سفر وسياحة



الملف الشخصي
تاريخ التسجيل : 11 / 02 / 2008
رقم العضوية : 1140
الإقامة : الامارات
المشاركات : 2,023
التقارير : 15
الجنس : أنثى
الحالة : هداوه غير متواجد حالياً
وسام خبير سياحي

رد: رحلتي لكوريا الجنوبيه سنــــ2013 ـــة (( سيئول ))

الاسواق الليليه


ركبنا التكسي بعد ماعطيناه العنوان





وصلنا المنطقه المطلوبه وشفنا حياه ومجموعة مولات

دحلنا اهم مول عندهم وهو يتكون من عدة طوابق

أكثر البضائع الموجوده صناعه كوريه

واسمه ...









وبعد مالفينا فيه ماعجبنا التسوق فيه

الاسعار نوعا ما غاليه

( اعق فلوسي ع ماركه معروفه أفضللي )

أغلب مقاساتهم ماتناسبنا

موديلاتهم ماعجبتنا وايد وان حصلنا شي عجبنا ماحصلنا مقاسات أو الاسعار غاليه ماتسوى

المهم نحن تشرينا شويه والصراحه هي بنتي توتو أكثر اتشرت من عندهم لبس

لأنها صغيره وجسمها صغير وحصلت حركات ومقاسات تناسبها

وعقب بدأت المأساه


البحث عن الطعام



المول فيه مجموعة كوفيهات وفيه مطعم ايطالي

لما صارت الساعه 2 فليل خلاص حسينا بالتعب والانهاك

وقلنا بنتعشى في الايطالي وبنرجع الفندق

لما دخلنا المطعم الايطالي ويلسنا ع الكرسي

يانا الموظف الوحيد اللي شفناه في المطعم وقال سكرنا

قلناله المول يسكر الساعه 5 كيف سكرت

قال نحن سكرنا وخلاص

اضطرينا نطلع وسرنا الكوفيهات الموجوده

بس للاسف ماعندهم ساندويشات جبن واللي نحصله

يا إما ساندويشات فيها خنزير أو لحوم أو كيكات ومافن

ونحن طالعين من المول ، تذكرت بنتي انها ماسوت التاكس فري

قلتلهم انا بترياكم وياعبادي هنيه

وانتوا خلصوا التاكس فري

وفجأه ع الشارع المقابل في المول المقابل شفت مطعم بيتزا








قلتلهم خلاص انا وعبادي بنتجدم هناك وانتوا تعالولنا هناك

عشان نعبر كنا لازم نمشي من النفق والمسافه بعيده مب قريبه

نزلت وياعبادي والصراحه كنت خايفه أنزل في في نفق بروحنا

بس شفت محلات تحت تبيع بس ماوقفت عند أي محل

وتطمنت لما شفت سوق تحت وناس رايحه وجايه ولو انه مب زحمه

طلعنا ع الجهه الثانيه ومشيت صوب المطاعم أدور اللي مكتوب عليه بيتزا بس ماشفته





وطلع محل يبيع أظن كوكيز واشياء ماتناسبنا

دورت في المطاعم اللي عداله ، وماشفت شي مناسب

وانا قلبي متقطع ع عبادي فديته أحسه يوعان

دخلت المول واشوفه عباره عن طوابق بس مثل دواعيس وخياطين

ولأنه مب في بالي تسوق طلعت ع طول ورجعت من نفس النفق

ولكن قبل مانطلع من ع السلم شفت مخرج ثاني عداله

ويوم دخلته لقيته يدخلني في نفس المول اللي كنا فيه

وشفت جدامي كوفيهين وبعد دخلت أدور شي مناسب وماحصلت

مالت عليهم أكلهم ماينوكل

وشويه ويتصلون البنات

ماما انتي وين

نحن ييناج عند محل البيتزا ومانشوفج

قلتلهم ردوا أنا رديت وماطلع بيتزا بس كيف بسرعه خلصتوا

قالوا التاكس فري مسكر

مساكين رجعولي وعقب ركبنا التكسي ورجعنا فندقنا


انطباعي عن هاي الاسواق


بعد احسها ماتستاهل العنوه لامن حيث البضاعه ولا الخدمات

اللي أبا أفهمه فاتحين الاسواق لين الفجر وماشي عير مطعم

وكوفيهات وأغلبهم سكروا من الساعه 2

ومكتب التاكس فري مسكر وبعض من الناس ومن اللي يبيعون راقدين ع كراسيهم

أي تسوق هذا

ليش معذبينهم وحليلهم

جان خلوا الاسواق لين 12 بالليل وخلاص





لازال البحث عن الطعام مستمر


بعد مارجعنا الفندق سرنا سوبرماركت سفن الفن

لعلى وعسى نحصل شي ناكله

الوقت متأخر والحيل مهدود

بعد البحث خذينا خبز سلايس وخذيت نودل بالسي فود ورجعنا الفندق

سويت نودل حقي وحق دودي والباقي كلوا خبز وجبن وكورن فليكس والفواكه

والحمدالله ع النعمه

بس المفاجأه انه النودل طلع حاااااااااااااااار فلفل

وعبادي من يوعه يآكله ومتحملنه فديته

وعقب ماقدر يكمل واعلن استسلامه

ورجع أكل خبز وجبن





انتهت صولاتنا وجولاتنا في هاليوم واللي خضنا فيه وايد تجارب


وان شاءالله نلتقي وياكم في الردود وفي جولات يديده

من رحلتنا الكوريه



25 / 11 / 2013, 09 : 04 PM
رقم المشاركة :  88 
مشرف زاد المسافر الى أستراليا ونيوزلاندا



الملف الشخصي
تاريخ التسجيل : 06 / 04 / 2008
رقم العضوية : 1318
الإقامة : جـ أم الشدةـدة
المشاركات : 6,951
التقارير : 14
الجنس : ذكر
الحالة : BUSHARAF غير متواجد حالياً
رد: رحلتي لكوريا الجنوبيه سنــــ2013 ـــة (( سيئول ))

حلقة ممتعة وجميلة وجزاكم الله خير على حرصكم علي الصيام هناك .

نتعرف أكثر وأكثر على سيؤول من خلال تقريرك.

26 / 11 / 2013, 11 : 02 PM
رقم المشاركة :  89 
خبيرة سفر وسياحة



الملف الشخصي
تاريخ التسجيل : 11 / 02 / 2008
رقم العضوية : 1140
الإقامة : الامارات
المشاركات : 2,023
التقارير : 15
الجنس : أنثى
الحالة : هداوه غير متواجد حالياً
وسام خبير سياحي

رد: رحلتي لكوريا الجنوبيه سنــــ2013 ـــة (( سيئول ))

ياجماعة الخير وينكم

نحن هنا

نبا تفاعل وحماس

عادي انتقدوني لاتمدحوني بس شاركوا




اقتباس: المشاركة الأصلية كتبت بواسطة BUSHARAF
حلقة ممتعة وجميلة وجزاكم الله خير على حرصكم علي الصيام هناك .

نتعرف أكثر وأكثر على سيؤول من خلال تقريرك.


حياك الله أخويه ومنورني بردودك ومبرد قلبي
26 / 11 / 2013, 18 : 08 PM
رقم المشاركة :  90 
درجة سياحية



الملف الشخصي
تاريخ التسجيل : 28 / 05 / 2013
رقم العضوية : 56927
الإقامة : الرياض
المشاركات : 150
الجنس : أنثى
الحالة : Canada غير متواجد حالياً
رد: رحلتي لكوريا الجنوبيه سنــــ2013 ـــة (( سيئول ))

متابعين معاك وبحماس

وتراي بنت مو ولد
اكثرو من الاستغفار فإنه مفتاح المعجزات❤❤
استغفر الله واتوب اليه
اللهم صـل على نبينا محمد وعلى آله وصحبه اجمعين
إضافة رد

المواضيع المتشابهه
الموضوع كاتب الموضوع المنتدى الردود آخر مشاركة
[ بـرنـامـج سياحي ] ملخص لكل شي يهمك عن كوريا الجنوبيه ( سيئول ) هداوه زاد المسافر إلى باقي الدول الآسيوية 29 18 / 01 / 2016 06 : 11 AM
اول مشاركاتي رحلتي السريعه للديار الجنوبيه ( الراحه ) ابوماجد999 زادك في المصايف 7 17 / 10 / 2013 24 : 09 PM


المواضيع ، تعبر عن رأي كاتبها ويتحمل مسؤوليتها فقط ، ولا تعبر بالضرورة عن رأي شبكة ومنتديات زاد المسافر .